Psalms 145 - Iñupiatun Mumiksat Uqalugiksuat

Nanġautikun Atuun

Aglaaŋa David-gum.

¹ Kamanaqsiḷiġniaġikpiñ, God-iiŋ, umialiiŋ; nanġaġlugulu atqiñ taimuŋa isuitchuamun.

² Uvlutuaġaġikpan quyyatiqaġniaqtuŋa iliŋnun; Nanġaġniaġiga atqiñ taimuŋa isuitchuamun.

³ Ataniq kamanaqtuaguruq suli nanġaqtaksraupiaqtuq; kamanaġniŋa kaŋiqsianignaġumiñaitchuq.

⁴ Kiŋuniġiiksuaguruat nanġaqsimaaġniaġaat savaaġiŋaran kiŋuvaaġillaaramignun; quliaqtuaġiniaġaich kamanaqtuat savaatin.

⁵ Uqautiginiaġaat kamanaqtuaguniġiñ, aasii suli isumalaaġutigilugich aliuġnaqtuat savaatin.

⁶ Uqautiginiaġaich suaŋŋatikkun savaatin, aasii suli uqautigilugu kamanaqtuagutilaan.

⁷ Quliaqtuaġiniaġaat qanutun ilvich nakuuruagutilaan, atuutigilugulu quviasuunmi nalaunŋaruaguniġiñ.

⁸ Ataniq piqpaksriruq suli nagliktauruq, qinnaliqsiġiitchuq, siḷvinŋaruġlu nakuaqqunmik.

⁹ Atanġum nakuugutisuugaa kiñapayauraq; suli nagliktuutiqaqtuq iluqaiññun suliaġiramiñun.

¹⁰ Iluqaġmiŋ iñuggusiŋaraqpich, Ataniiq, nanġaġniaġaatin, suli iñugipayaaqtaqpich quyyaviginiaġaatin.

¹¹ Uqautiginiaġaat kamanaqtuaguniŋa umialgutikpich suli quliaqtuaġilugu suaŋŋatin,

¹² iñupayaurat iḷitchuġuyumagaich suaŋŋatignik savaaġiŋaratin suli kamanaqtuaq umialgutin.

¹³ Umialgutin taimuŋa isuitchuamun umialgutauruq, suli umialguniaqtutin iluqaiññun kiŋuvaaġiiksuaguruanun. Ataniq iḷumun ittuq, unniqsuqłiisipayaani nalautitchuugaich; nagliktuutiqaqtuq surġaġnipayaamiñi;

¹⁴ Atanġum ikayuġuugaich iluiḷḷiuqtuat; suli kiviguugaich kataŋaruat.

¹⁵ Iñuggutiqapayauraqtuat iliŋnun qiñiġaqtut nigiukłutiŋ, aasii niqiksritchuugitin niqiqaqtuksraummata.

¹⁶ Naamapkaġitin piqaqtiłługich naamaruanik pigiraksraġiraŋiññik iñuggutiqapayaaqtuat.

¹⁷ Ataniq nalaunŋaruaguruq piḷġusipayauramiñi, suli nagliktauruq surġausipayaamiñi.

¹⁸ Ataniq qanittuq iluqaiññun ququularuanun ilaanun, iluqaiññun ququularuanun iḷumutuuqłutiŋ.

¹⁹ Piqaqtitchuugaich sunik pigiraksraġiraŋiñik qiksriksrautiqaqtuat ilaanun; tusaasuugaich qirratiŋich aasii annautivlugich.

²⁰ Ilaata munaġisuugaich iluqaisa piqpaksriruat ilaanik, aglaan suksraunġiġñiaġaich pigiiḷḷiqirauruat.

²¹ Nanġaġuuniaġiga Ataniq ataramik; Iluqaġmiŋ savaaġiŋaraŋisa nanġaġlirruŋ ilaata atqa isuitchuamun.