Psalms 141 - Iñupiatun Mumiksat Uqalugiksuat

Anaqami Aŋaiyyun

Psalm aglaaŋa David-gum.

¹ Ququulagikpiñ, Ataniiq; qaiñ akkupak! naalaġnisaġiŋma ququulaguma.

² Aŋaiyyutiga illi iliŋnun tivraġiksautitun aumaruatun, isaaġutigupkiglu argakka aitchuutauruatun anaqami.

³ Ataniiq, qaunaksriḷiġuŋ una qaniġa, qaunagilugich uqalutka.

⁴ Uummatimni savaaqaġuktinnaŋa pigiitchuanik piqasiutipkaġnaŋalu pigiiḷḷiqirauruat savaaŋiñun. Niġiqatauŋiḷḷaŋalu niqinaqikpata.

⁵ Iñulluatat atqunaġliñŋa natqiksruġluŋalu pił̣ł̣aktautaitchuakun, uqsruqtiġutitun inniaqtut niaqumni. Niaquġma ayyaktuġniaŋitkaa. Aŋaiyyuugaqtuŋa-aglaan akiḷḷiġivlugich pigiitchuat savaaŋich.

⁶ Atanniqsimariŋich kataktinniaġaich uyaġagni imnaniñ, iñuich uqallagniaqtut uqalutka tusaasuġnaġniḷugich.

⁷ Qiruktun quvluqtatun, anauttamik siquptatun, tainnatun sauniŋich siamitauniaqtut avataani iḷuvvivium.

⁸ Aglaan ukpiqsimaaqtuŋa iliŋnun, Qutchigñiqsrauruatiin Ataniiq. Annaksaqtuġvigigikpiñ; tuqutaupkaġnaŋa!

⁹ Annaktinŋa uvamnun naniġialiqsuutiŋiñiñ, nigatchialiqsuutiŋiñiñ pigiiḷḷiqirauruat.

¹⁰ Pigiiḷḷiqirauruat kataglittuq naniġialiqsuutimignun iliŋisa, uvaŋa surruisiłłuŋa.