Psalms 140 - Iñupiatun Mumiksat Uqalugiksuat

Aŋaiyyun Munaġitquvluni

Atuqtit aullarriŋannun. Psalm aglaaŋa David-gum.

¹ Annautiŋŋa, Ataniiq, pigiiḷḷiqirauruaniñ; anayanniuqtinnaŋa piaqłuktaġuuruaniñ iñugniñ,

² sivunniuġuurut qanuq pigiiḷḷiqiaksramignik, ataramik uqaviḷugaqtut qanaaġutiksranik.

³ Uqaŋich irrusiqaqtut nimiġiatun tuqunaliktun; uqaluŋich tuqunaliktun ittut.

⁴ Munaġiŋŋa, Ataniiq, suaŋŋataanniñ pigiiḷḷiqirauruat; anayanniuqtinnaŋa piaqłuktaġuuruaniñ iñugniñ sivunniŋaruaniñ ulġutchukłuŋa.

⁵ Kamanniraaġuuruat nigatchialiqsuiŋarut, nigaġuqłuŋa; kuvraġukłuŋa isivinŋagaich kuvratiŋ, naniġialiqsuŋarut iglauyaamnun naniqtaġisukłuŋa.

⁶ Uqallaktuŋa Ataniġmun, “Ilvich God-igigikpiñ.” Tusaallagniaġuŋ qirratiga ikayuquvluŋa, Ataniiq!

⁷ Qutchigñiqsrauruatiin Ataniiq, suamaruaq annaurriga, matummisuugiñ niaquġa aŋuyaktuani.

⁸ Ataniiq, piqaqtinnagich pisuktaŋiññik pigiiḷḷiqirauruat; sivunniuġutiŋich akimapkaġnagich.

⁹ Avatkaanŋa kamanniraaqhutiŋ; sivuuġasaaġutiŋich iliŋiññun utiġlich.

¹⁰ Ikualaruat aluat kataglich iliŋiññun; miḷuqsautilich igniġmun salumaitchuanun iḷuqsranun, makitqikkumiñaiġḷugich.

¹¹ Saglunik uqautikłiġuuruat inillaktauŋiḷḷich nunami; pigiitchuam akiisilligich iñuich suksraunġiġḷugiḷḷu.

¹² Ataniiq, iḷisimaruŋa ikayuġuugitin piqaqtuksrauruat suli ikayuqługich iḷiappauruat.

¹³ Nalaunŋarualiqirauruat iḷumutun nanġaġniaġaatin; iñuuniaqtut nayuġlutin.