Psalms 136 - Iñupiatun Mumiksat Uqalugiksuat

Quyanaaġutikun Atuun

¹ Quyyavigisiuŋ Ataniq, qanukkii ilaa nakuuruaguruq; nakuaqqutaa isuitchuamun ittuq.

² Quyyatiqaġitchi God-mun kamanaġniqsrauruamun god-ipayauraniñ; ilaan nakuaqqutaa isuitchuamun ittuq.

³ Quyyavigisiuŋ Atanġat atanġupayauraqtuat; ilaan nakuaqqutaa isuitchuamun ittuq.

⁴ Kisimitualuk savaguuruq aliuġnaqtuanik kamanaqtuanik; ilaan nakuaqqutaa isuitchuamun ittuq.

⁵ Ilaata isumattutimigun savaŋagaich qiḷaich; ilaan nakuaqqutaa isuitchuamun ittuq;

⁶ ilaata savaŋagaa nuna itiruani immani; ilaan nakuaqqutaa isuitchuamun ittuq.

⁷ Savaŋagaik siqiñiġlu tatqiġḷu; ilaan nakuaqqutaa isuitchuamun ittuq;

⁸ siqiñiq atanniqsimatquvlugu uvlumi; ilaan nakuaqqutaa isuitchuamun ittuq;

⁹ tatqiġḷu uvluġiallu atanniqsimatquvlugich unnuami; ilaan nakuaqqutaa isuitchuamun ittuq.

¹⁰ Ilaata tuqunŋagaich aŋayukłiupayaaqtuat Egypt-mi; ilaan nakuaqqutaa isuitchuamun ittuq.

¹¹ Akunġanniñ Ilaata aullatiŋagaich iñuŋich Israel; ilaan nakuaqqutaa isuitchuamun ittuq;

¹² saŋŋiruamik argagmiñik, suli suaŋaruamik taliġmiñik; ilaan nakuaqqutaa isuitchuamun ittuq.

¹³ Ilaan avgusiŋagaa Red Sea; ilaan nakuaqqutaa isuitchuamun ittuq;

¹⁴ ikaaġutiŋagai Israel-guruat qitiġaqługu; ilaan nakuaqqutaa isuitchuamun ittuq;

¹⁵ aglaan ipipkaŋagai Pharaoh-lu aŋuyaktiŋiḷḷu Egypt-miut; ilaan nakuaqqutaa isuitchuamun ittuq.

¹⁶ Ilaan aullatiŋagaich iñuni nunagluktuakun; ilaan nakuaqqutaa isuitchuamun ittuq.

¹⁷ Tuquttaŋagaich kamanaġaluaqtuat umialgich; ilaata nakuaqqutaa isuitchuamun ittuq;

¹⁸ ilaata tuquttaŋammigaich nuimaruagugaluaqtuat umialgich; ilaan nakuaqqutaa isuitchuamun ittuq;

¹⁹ Sihon, umialgat Amorite-guruat; ilaan nakuaqqutaa isuitchuamun ittuq;

²⁰ suli Og, umialga Bashan-gum; ilaan nakuaqqutaa isuitchuamun ittuq.

²¹ Aasii nunautiŋich kiŋuvaannaktaaġipkaqługich; ilaan nakuaqqutaa isuitchuamun ittuq;

²² Qaiñŋagaich kiŋuvaaġitquvlugich Israel-mun kivgamiñun; ilaan nakuaqqutaa isuitchuamun ittuq.

²³ Ilaata piiguŋaitkaatigut akiisitaukapta; ilaan nakuaqqutaa isuitchuamun ittuq;

²⁴ annautiŋagaatigut akiḷḷiiptigniñ; ilaan nakuaqqutaa isuitchuamun ittuq.

²⁵ Niqiksraqaqtitchisuuruq iñuggutiqapayauraqtuanun; ilaan nakuaqqutaa isuitchuamun ittuq.

²⁶ Quyyavigisiuŋ God-iŋa qiḷaum; ilaan nakuaqqutaa isuitchuamun ittuq.