Psalms 135 - Iñupiatun Mumiksat Uqalugiksuat

Nanġautikun Atuun

¹ Nanġaġli Ataniq! Nanġaqsiuŋ atqa, kivgauruasii Ataniġmun,

² ilivsi makitaruasii Atanġum igluani, Aŋaiyyuvikpaŋani God-ipta.

³ Nanġaqsiuŋ Ataniq, ilaakii nakuuruq; atuġitchi nanġautinik atqanun, pikałaktalaitchukkii.

⁴ Piksraqtaaġiŋagaa Jacob ilimiñun, iñuŋiḷḷu Israel ilaata iñugisukługich.

⁵ Iḷisimaruŋa Ataniqput kamanaqtuagutilaaŋanik, kamanałhaaqłuni allaniñ god-iniñ.

⁶ Ilaa savaguuruq isumamisun qiḷaŋmiḷu nunamiḷu, taġiuniḷu suli samani itiruani.

⁷ Nuviyaliqsitchuugaa nunapayaaq igniġuuqpatittualiŋaruq sialugnun, suli anuġit qaipkaqługich tutquqsimaviŋañiñ.

⁸ Egypt-mi tuqunŋagaich aŋayukłiupayaaqtuat iñuiḷḷu niġrutillu ativlugich.

⁹ Akunnavsiññi nalunainŋutanik aliuġnaqtuaniglu savaŋaruq akiḷḷiġivlugu Pharaoh kivgapayauraŋiḷḷu Egypt-mi.

¹⁰ Suksraunġiŋagaich iñugiaktuat nunaqpauruat suli tuqułługich suaŋŋatiqpaqaġaluaqtuat umialgich:

¹¹ Sihon, umialiŋat Amorite-gich, Og, umialiŋa Bashan, umialipayaallu Canaan-mi.

¹² Qaiñŋagaich nunautiŋich iñuŋmiñun; kiŋuvaaksrirrutigivlugich Israel-mun.

¹³ Ataniiq, uqallausiġisuuniaġaatin ilvich God-auniḷutin; kiŋuniġiipayauraqtuat itqaumasuuniaġaatin.

¹⁴ Atanġum tunulliḷiqsimaaġniaġaich iñugirani; ilaata nagliginiaġaich kivgaġirani.

¹⁵ Iñuuraqpaliaŋich nunaqpauruat piḷiagurut qatiqtuaniglu, kaviqsuaniglu manigñik; piḷiaġigaich iñugruiññat argamignik.

¹⁶ Qaniqaġaluaqtut, aglaan, uqalaitchut; iriqaġaluaġmiut, aglaan tautuyuitchut.

¹⁷ Siutiqaġaluaqtut, aglaan tusaalaitchut; aniġniġitchut unnii.

¹⁸ Piḷiuŋaruat tamatkuniŋa ukpiġiramignik tainnaptauq iḷiñiaġmiut irrusiñiglutiŋ iñuuraqpaliamiktun!

¹⁹ Nanġaqsiuŋ Ataniq, Israel-guruasii; nanġaqsiuŋ Ilaa, igluaniittuasii Aaron!

²⁰ Nanġaqsiuŋ Ataniq, Levite-guruasii; nanġaqsiuŋ, qiksiksraqtuasii Ilaanik!

²¹ Nanġaqsiuŋ Ataniq Zion-mi, Jerusalem-mi, ilaata aimmiviani. Nanġaqsiuŋ Ataniq!