Psalms 132 - Iñupiatun Mumiksat Uqalugiksuat

Nanġautiqaġniq Aŋaiyyuvikpagmi

Atuun mayuġmata.

¹ Ataniiq, itqaumasaġiñ David siġġaġniuġutipayauraŋiḷḷu.

² Itqaumalugu, Ataniiq, qanuq unniqsuqłiiŋatilaaŋanik, unniqsuqłiikami iliŋnun, Suaŋŋatiqaqtuamun God-iŋanun Jacob:

³ David uqallaktuq: “Aiñiaŋitchuŋa naakkaunnii siñigvimñugluŋa;

⁴ Unaŋuiqsiaġniaŋitchuŋa naakkaunnii siquluŋa,

⁵ paqitanigataġluŋa iniksraŋanik Atanġum, aimmiviksraŋanik Suaŋaruam God-iŋata Jacob.”

⁶ Tusaaŋagikput Bethlehem-mi taamna Sivunniuġutim Kiguunniŋa, suli paqinŋagikput nautchiiviŋiñi Jaar-m.

⁷ Uqallaktugut, “Ilaata igluanukta; nanġaisa sivuġaani aquppiutaġpaŋata mayuġauttauraŋani.”

⁸ Makillutin, Ataniiq, qaiñ unaŋuiqsiġvigñun, irvianun Sivunniuġutim Kiguunniŋanun, suaŋŋatiqpakpich nalunaiñŋutaanun.

⁹ Aŋaiyyuliqsiqpagiratittuq annuġaaŋalich iluaqtualiqiniġmik; aasii iñugiratin nipaalayumaut quviasuunmi!

¹⁰ Ukkiqsuqłiiŋagiñ kivgan David; ayyagnagu nalunaiqsaġiŋaran.

¹¹ God-iiŋ, unniqsuqłiiŋarutin David-mun unniqsuqłiiñmik tasuġniaŋisaġnik: “Iḷaŋat iġñiġiraqpich umialiguqtinniaġiga, atanniqsimariġuġniaqtuq aqukkun.

¹² Iġñiġiraqpich iḷumutuuġlutiŋ maliġikparruŋ sivunniuġutiliaġa suli kamaksriḷutiŋ piraksriqsuutimnik, iliŋisaptauq iġñiŋich, aqupiḷḷaniaġmiut aquppiutaqpagiraġni taimuŋa isuitchuamun.”

¹³ Atanġum naliġaaġiŋagaa Zion; aimaaġviksramaaŋagaa:

¹⁴ “Tavra unaŋuiqsiġviginiaġiga taimuŋa isuitchuamun; tavraniinniaqtuŋa qanuq piksramaaŋagiga.

¹⁵ Inuaŋaiġḷugu piksraqaqtinniaġiga Zion pigiraksrapayauraŋiñik; niġisuiqsuaqtisimaaġlugiḷḷu tavrani iḷiappauruat.

¹⁶ Annuġaaqtinniaġmigitka aŋaiyyuliqsiqpaŋich annaunmik, suli God-im iñuŋich atuġniaqtut nipaqpaglutiŋ quviasuunmi.

¹⁷ Tavrani David kiŋuvaaŋisa iḷaŋat kamanaqtuagulugu umialiguqtinniaġiga; naliġaagiratkaasi umialigich qaummagigñiaqtut naniqtun.

¹⁸ Matuniaġitka akiḷḷiiŋich kanŋusuunmik, aglaan umialgutaa sivunmun iglauniaqtuq piḷḷuataqtuaguluni.”