Psalms 119 - Iñupiatun Mumiksat Uqalugiksuat

Pitquraŋa Atanġum

¹ Quviasuglich iñuuniaġusiqaqtuat pasiraksraiḷḷutiŋ, iñuuvlutiŋ maliġuaqługu pitquraŋa Atanġum.

² Quviasuglich maliġuaqtuat piraksriutaiññik, ivaqłiqsuat ilaanik iluġaaqługu uummatimignik.

³ Killuliqilaitchut; pisuaqłutiŋ Atanġum piḷġusiŋigun.

⁴ Ataniiq, qaitchiŋagiptigut pitquraġnik suli uqallautivluta kamagitquvlugich iḷumutuuġluta.

⁵ Piyummatigigiga piŋitqataaŋiḷḷuŋa kamaksrisukłuŋa piraksriqsuutiŋnik!

⁶ Qaunakłaaġluŋa pigupkich piraksriutipayaatin, kanŋusuunmun tikiññiaŋitchuŋa.

⁷ Iḷitkupkich nalaunŋaruat isivġiutitin, nanġaġniaġikpiñ salumaruamiñ uummatimniñ.

⁸ Kamaginiaġitka pitquratin, suksraaġniaġnaŋa!

Kamaksriñiq Pitquraŋiññik Atanġum

⁹ Qanuġutiŋ makua nutaqqat salumapkaġniaqpatigiŋ iñuutchisiŋ? Kamaksriḷutiŋ uqalugiksuanik.

¹⁰ Iluqaaniñ uummatimniñ ivaġikpiñ; qaunagiŋŋa asivaŋitchumauŋa piraksriutigniñ.

¹¹ Pitquratin uummatiġmiutaġitka, piḷuksiyumaŋitkaluaqłuŋa paaqłaglutin.

¹² Nanġaġikpiñ Ataniiq; iḷisauttuŋŋa piḷġusiġñik.

¹³ Uqausiġitqigaaġniaġitka nipatusiḷuŋa pitqurapayaat qaiñŋakkatiin.

¹⁴ Qaamagigitka maliġuaġniaġniksraŋat piraksriurvich, quviasuktuatun iñuk umiallakkami.

¹⁵ Iḷisaaġigitka piraksriqsuutitin; puttuqsriñiaqługiḷḷu iḷisaurrutitin.

¹⁶ Quviasuuttaġigitka pitquratin; puiguiñiaŋitchuŋa pitqurriutiŋnik.

Quviasuuttaqaġniq Pitquraŋiññik Atanġum

¹⁷ Nakuutiŋŋa, kivgaġigigma, iñuuyumauŋa suli kamaksriḷuŋa iḷisaurrutignik.

¹⁸ Uisinŋa, tautukkumauŋa aliuġnaqtuanik iḷumun itilaaŋiññik pitquraqpich.

¹⁹ Nunamiinniksraġa sivikitchuq; iriġnagich piraksriutitin uvamniñ.

²⁰ Uummatiga anniġñaliqsuq unnii inuqsraliqł̣uni; iḷisimasukługich iñiġlugu isivġiutiksrautitin.

²¹ Suaguugitin arguaŋŋatitaqtuat; pimaqłuktitaulich kamaksriŋitchuat piraksriqsuutiŋnik.

²² Piiqsitkich pisaaŋŋataisa kipakkutaisalu, kamaksriŋaruŋakii pitquraġnik.

²³ Aŋalatchirit kasimavlutiŋ iluaŋitchuakun sivunniuġutigigaanŋa, aglaan iḷisaaġiniaġitka iḷisaurrutitin.

²⁴ Piraksriqsuutikpich qaamasuktitkaanŋa, silġiqsuurrigivlugich.

Kamaksriyumalaaġun Pitquraŋiññun Atanġum

²⁵ Ulġuŋaruŋa akiiḷirauvluŋa avyuġmi; aŋipkaŋŋa unniqsuqłiutiktun.

²⁶ Quliaqapkich suraġausipayaatka, aasii kiuŋagiŋma; iḷisautiŋŋa piḷġusiġñik.

²⁷ Ikayuŋŋa kaŋiqsitqulugich pitquratin; aasiiḷi isumalaaġutiginiaġitka aliuġnaqtuat iḷisaurrutitin.

²⁸ Qanuqsausiiġaaŋa isumaaġnaqtuam; suaŋŋasiŋŋa unniqsuqłiutiktun.

²⁹ Killunnamuksaaqtinnaŋa, nakuuniġni iḷisautiŋŋa pitquraġnik.

³⁰ Kamaksriyumalaaliŋaruŋa; qaunaksrivḷuŋalu isivġiutignik.

³¹ Maliġuaŋagitka maliġuagaksriatin, Ataniiq; kanŋunaqsiḷiqtinnaŋa.

³² Kamagiyumalaaġniaġitka piraksriutitin; qanukkii kaŋiqsipkavsaaġnialgitkiŋma.

Aŋaiyyun Kaŋiqsisiqavsaaġummanmik

³³ Iḷisauttuŋŋa Ataniiq, sivuniŋannik pitquraqpich, aasii kamaginiaġitka ataramik.

³⁴ Puttuqsripkakkich pitquratin uvamnun, aasii kamaginiaġitka; Kamaginiaġitka iluqaaġlugu uummatiga.

³⁵ Igliġutiŋŋa maliġuaqtillugich pitquratin; qanukkii quvianaqtuq kamaksriruni.

³⁶ Kamaksriyumalaaġutiksriñŋa pitquraġnun; umiallakkumalaaġniġmiñ unnii.

³⁷ Qaunakkutiqaqpaisinŋaiŋŋa anniqsuutauŋitchuanun; nakuutiŋŋa, unniqsuqłiutiktun.

³⁸ Nalautitkich unniqsuqłiutigiŋaratin uvamnun kivgaġnun, qiksigirauyumautin.

³⁹ Annauttuŋŋa pisaaŋŋatiniñ sivuuġagikkamniñ; qanutun aliuġnaqtigivat isivġiutitin!

⁴⁰ Kamaksrisuktuŋa piraksriutignik; iñuggutiga nutaqsaġuŋ, qanuq ilvich nalaunŋaruagurutin.

Ukpiqsraġniq Pitquraŋiññik Atanġum

⁴¹ Qiñiqtinŋa qanutun nakuaġitilaamnik iliŋnun Ataniiq, suli annautiluŋa ilvich unniqsuqłiutiktun.

⁴² Kiggutiksraqaġumauŋa pisaaŋarimnun atakkii ukpiġigiga uqaluiñ.

⁴³ Piiġñagu iḷumun ittuaq uqaluiñ qanimniñ, niġiukkutigaataŋ tunŋaruq isivġiutignun.

⁴⁴ Kamagisaġataġniaġitka pitquratin, taimuŋa isuitchuamun.

⁴⁵ Iñuuniaqtuŋa atanniqsimaraipiallagluŋa; ivaqsimaaġitkakii iḷisaurrutitin.

⁴⁶ Iḷisimapkaġniaġitka piraksriutitin umialignun kanŋusuutaiḷḷuŋa.

⁴⁷ Qaamagigitka kamagigupkich piraksriutitin, nakuaġigitkakii.

⁴⁸ Qiksigigitka nakuaġivlugiḷḷu pitqurriutitin; isumalaaġutiginiaġitka piraksriqsuutitin.

Nalupqisuutairrun Pitquraŋiññun Atanġum

⁴⁹ Itqaumalugu unniqsuqłiutin uvamnun kivgaġnun; taaptuma niġiukkutiqaqtitkaaŋa.

⁵⁰ Nagliksaaġnikkaluamni arausiaqaqtuŋa atakkiataŋ unniqsuqłiusikpich iñuupkaqłuŋa.

⁵¹ Arguaŋaaqtuat ataramik kipagisuugaanŋa, aglaan qimayuitkitka pitquratin.

⁵² Itqaumagitka isivġiutitin taimaŋŋaqaŋa, aasii araktuaġuugaanŋa, Ataniiq.

⁵³ Qiñiqapkich piḷuktuat navgimmata pitquraġnik, qinnalipiallagaqtuŋa.

⁵⁴ Sivikitchuami nunami iñuullagnimni atuusiraqtuŋa piraksriutignik.

⁵⁵ Unnuami itqaġuugikpiñ, Ataniiq, taimmaasii isumagiaqsivḷugich pitquratin.

⁵⁶ Quviasuutinnaguuruŋa kamagikapkich piraksriutitin.

Kamasuuttaqaġniq Pitquraŋiññun Atanġum

⁵⁷ Kisivitualuk pigisukkikpiñ, Ataniiq, unniqsuqłiiruŋa kamaginiaġnivḷugich pitquratin.

⁵⁸ Iŋiullavigigikpiñ iluqaanik uummatimnik naglikkutiqaquvlutin uvamnun, unniqsuqłiisiksun!

⁵⁹ Isumalaaġutigigitka piḷġusiġikkatka, aasii maliġuarraqsivḷugich piraksriutitin.

⁶⁰ Piñatchiaŋaiqł̣uŋa qilamiqsruqtuŋaunnii piraksriutiŋnik kamaksrisukłuŋa.

⁶¹ Pigiiḷḷiqirit piyaqquutiksriuġaluaġaanŋa, puiguisuitchuŋa aglaan pitquraġnik.

⁶² Unnuam qitqani iqiiġaqtuŋa nanġaġukłutin nalaunŋaruatigun isivġiutikkun

⁶³ Avilaitqatauruŋa iluqaiññun qiksiksraqtuanun iliŋnun, kamaksriruanun pitquraġnun.

⁶⁴ Ataniiq, nuna siḷiviŋaruq nuŋulaitchuamik nakuaqqutiŋnik; iḷisautiŋŋa pitquraġnik.

Akisutilaaŋa Pitquraŋata Atanġum

⁶⁵ Nalautitchuugitin unniqsuqłiutitin, Ataniiq nakuutivluŋalu kivgauruaŋa iliŋnun.

⁶⁶ Iḷisautiŋŋa isumattutiksramnik iḷisimmatiksramniglu, nalupqigiŋitkitkakii piraksriutitin.

⁶⁷ Sivuani tatavsaŋaiñŋaġma ilignun, killukuaġuuŋagaluaqtuaŋaa, aglaan pagmapak kamagisuugiga uqaluiñ.

⁶⁸ Qanutun nakuutigivich pikałaktautaisigivich! Iḷisauttuŋŋa piraksriutignik.

⁶⁹ Arguaŋaruat sagluuġutigiŋagaanŋa, iluġnaaqługu aglaan uummatiga kamaksriruŋa piraksriqsuutignik.

⁷⁰ Kaŋiqsiḷaitchut, uvaŋaaglaan quviagigitka pitquratin.

⁷¹ Tatavsausiaqaqama nakuuŋaruq uvamnun, iḷitchiyumauŋa piraksriutignik.

⁷² Pitquratin nuimaruagułhaaqtut uvamnun manipayauraŋiññiñ nunam.

Nalaunŋaniŋa Pitquraŋata Atanġum

⁷³ Savaaġiŋagigma ilvich, anayanniuqtitchuitkigma; kaŋiqsiumapkaŋŋa, iḷitchumagitka pitquratin.

⁷⁴ Qiksiksraqtuat ilignik quviatchaŋniaqtut tautukkumiñŋa, qanukkii ukpiġigitka unniqsuqłiutitin.

⁷⁵ Iḷitchuġiŋaruŋa isivġiutitin nalaunŋatilaaŋiññik, Ataniiq, suli tatavsaŋagigma ukpiġnaqtuaguvlutin.

⁷⁶ Isukłiḷaitchuam nakuaqqurvich aragliŋa, unniqsuqłiutiktun uvamnun, kivgaġiraġnun.

⁷⁷ Naglikkutiqaġiñ uvamnun, aasii iñuuniaqtuŋa atakkiataŋ quviagigitka pitquratin.

⁷⁸ Arguaŋaaqtuat kanŋusuliġlich asiñik sagluuġutigiqqaaqłuŋa; uvaŋali aglaan, isumalaaġutiginiaġitka piraksriqsuutitin.

⁷⁹ Qiksiksraqtuattuq ilignik ullagliñŋa iluqatiŋ iḷitchuqsriŋaruat piraksriutignik.

⁸⁰ Nalaupiaġlugittuq kamaksriḷaŋa pitquraġnik aasii kanŋusuutiksraiḷḷuŋa.

Aŋaiyyutauruaq Annaurauniġmun

⁸¹ Susallaipiallaktuŋa Ataniiq, annautitchiqsruqłuŋa iliŋnun; ukpiġutiga iliŋnun tuttitkiga.

⁸² Irraka qiñiñŋuliqsuk taŋŋiġñiaġmagaan unniqsuqłiutin, kaŋiqsiullaġma, “Qakuguimña aragniaqpiŋa?”

⁸³ Suunnauŋaiqsigiruŋauvva iktaksraġuqtuatun wine-qaġvialuktun; aglaan puiguŋaitkitka suli piraksriutitin

⁸⁴ Qanutun aglaan kivgaġiran utaqqiñiaqpa? Qakuguimña tatavsaġniaqpigich nagliksaaqtitchiruat uvamnik?

⁸⁵ Arguaŋaaqtuat, kamaksriḷaiḷat pitquraġnik, nivagaqtut katakhaqtaġviksramnik.

⁸⁶ Pitqurapayaatin ukpiġnaqtuagurut; iñuich nagliksaaqtitkaanŋa sagluuġutigivluŋa—ikayuŋŋa!

⁸⁷ Tuqunŋiḷuapiaġaluaġaanŋa, aglaan tununŋaitkitka piraksriutitin.

⁸⁸ Nuŋulaitchuaq nakuaqqutin pisigilugu nakuutiŋŋa, kamaksriyumauŋa pitquraġnik.

Ukpiqsraġniq Pitquraŋiññun Atanġum

⁸⁹ Uqaluiñ, Ataniiq, isuqaġumiñaiññiqsuq; taimuŋa itchaġataqtuq qiḷagmi.

⁹⁰ Ukpiġnaġniġiñ igḷutuutiniqsuq taimaŋŋa qaŋa; inillaanikkapku imma nuna aulanŋaiñmiuq.

⁹¹ Supayaurat inillagvigmiŋniittut uvlupagmuaglaan nalaułługu piraksriutin, atakkiataŋ iluqaisa kivgaġigitin.

⁹² Pitquratin quviasuutigiŋaisuaġupkich, tuquniaŋagaluaqtuŋa nagliksaaġutimni.

⁹³ Suuŋiḷaġiniaŋitkitka piraksriqsuutitin, maliġuaqapkitkii iñuupkaġigma.

⁹⁴ Pimaaqtuġigma annautiŋŋa! Kamaksriñiḷuguuruŋa piraksriutignik.

⁹⁵ Pigiitchualiqirit utaqqigaanŋa tuqutchumavluŋa, aglaan isumalaaġutiginiaġitka pitquratin.

⁹⁶ Sunapayaaq nutqaġviksraqaqsimaruq; aglaan pitquratin nalaunŋapiaġataqsiññaqtut.

Nakuaqsriñiq Pitquraŋiññik Atanġum

⁹⁷ Nakuaġiqpakkitka pitquratin! Isummatigisuugitka uvluqtutilaaŋatun.

⁹⁸ Pitquraqpich nayuŋaiyuitkaanŋa aasii isumatusipkałhaaqłuŋa akiḷḷiimniñ.

⁹⁹ Kaŋiqsiumałhaaqtuŋa iḷisaurrikkaluamniñ unnii, isumalaaġutigisuuvlugitkii piraksriqsuutitin.

¹⁰⁰ Isumattutiqałhaaqtuŋa utuqqanaaniñ, kamaksrivḷuŋakii piraksriutignik.

¹⁰¹ Naŋaaqataġuugitka iluqaisa killuliqipayaaqtuat, kamaksrisukłuŋa uqalugnik.

¹⁰² Suuŋiḷaġiŋitkitka piraksriqsuutitin, iḷisaurrigivlutinkiataŋ.

¹⁰³ Qanutun siiġñaaqtigivat piraksriqsuutitin siiġñaaġniŋaniñ unnii honey-m!

¹⁰⁴ Isumattutinnaguuruŋa pitquraġniñ, tainnamik uumiksraġuuruŋa piḷġusiġiiḷanik.

Kaŋiqsimmatiqaġniq Pitquraŋiññun Atanġum

¹⁰⁵ Uqalukpich nanniqsimaaġaa sivuniġa qaummaaġiksiłługulu iglauyaaġa.

¹⁰⁶ Taŋŋiġñiaġiga unniqsuqłiutigiŋaraġa kamaginiaġnivḷugich nalaunŋaruat piraksriqsuutitin.

¹⁰⁷ Nagliksaaġutitka Ataniiq, nagliksaaġnapiaġaluaqtut iḷumutun; iñuupkallagniaŋŋa aasii unniqsuqłiisiksun.

¹⁰⁸ Akuqtuġuŋ quyyatikun aŋaiyyutigiraġa, Ataniiq, iḷisautiŋŋalu piraksriutignik.

¹⁰⁹ Itqanaisimaaġaqtuŋa isukłiññiaġniksramnun; piiguyuitkitka pitquratin.

¹¹⁰ Pigiitchualiqirit nigatchialiġaluaġaġigaanŋa, aglaan kamaksriŋaiyuitchuŋa piraksriutignik.

¹¹¹ Pitquratin taimuŋa kiŋuvaaġisaġataġitka; quviasuuttaġivlugich uummanma.

¹¹² Sivunniŋaruŋa kamaksrisukłuŋa piraksriutignik tuqulġataġnimnun aglaan.

Navianniuġnaiññiŋat Pitquraŋisa Atanġum

¹¹³ Uumigigitka iḷumuuŋitchuat ilignun, aglaan nakuaġigitka pitquratin.

¹¹⁴ Ilvich annaksaġvigigikpiñ suli munaqsrigivlutin; niġiukkutiqaqtuŋa unniqsuqłiutiŋnun.

¹¹⁵ Unitchiñŋa piḷuusiqirauruasii. Kamaksriñiaqtuŋa piraksriutaiññik God-igma.

¹¹⁶ Suaŋŋatiksriñŋa, unniqsuqłiutiktun, aasii iñuuniaqtuŋa; qapiqpaŋŋatiqaqtinnaŋa niġiukkutipkun!

¹¹⁷ Nayummiŋŋa, anayanniuŋitchumauŋa, aasii qaunagisaġataġniaġitka piraksriutitin.

¹¹⁸ Ayyaktuġuugitin kamaksriŋipayaaqtuat pitqurriutignik; pisaasuġmiaġutikkaluaŋich suunnauŋitchut.

¹¹⁹ Piḷuusiqiripayaat iktaksratun iḷiuġuugitin, tainnamik nakuaġigitka piraksriqsuutitin.

¹²⁰ Pisigivlutin iqsitchagaqtuŋa, sivuuqqiutivlugich isivġiutitin.

Kamakkutiqaġniq Pitquraŋiññun Atanġum

¹²¹ Savaŋaruŋa iluaqtuakun nakuuruakullu; ipiġaiññaġnaŋa akiḷḷiimnun!

¹²² Unniqsuqłiigguiñ ikayuġisiñiḷugu kivgaġikkaan; arguaŋaaqtuanun piuġrugipkaġnaŋa!

¹²³ Irraka qiñiñŋuliqsuk ikayuġisimmagaaġma ilignun, annautiniaġnivḷuŋa unniqsuqłiutigiŋaraġnun.

¹²⁴ Aŋalanŋa maliġuaġlugu nuŋulaitchuaq nakuaqqutin, suli iḷisautiluŋa piraksriutignik.

¹²⁵ Kivgaġigigma, kaŋiqsipkaŋŋa, iḷisimayumagitka iḷisaurrutitin.

¹²⁶ Ataniiq; uvva sunaqsigaatin, marrakii iñuich kamaksrisunġiqsut pitquraġnik.

¹²⁷ Nakuaġiłhaaġitka piraksriutitin maniŋmiñ kaviqsuamiñ unnii, piqpagiłhaaqługich nakuuniqsraŋiññiñ manium kaviqsuam.

¹²⁸ Tainnamik qaunagigitka tamatkiqł̣ugich piraksriutitin; uumigigitka pigiitchualiqutipayaat.

Kamakkutiqaġugniq Pitquraŋiññik Atanġum

¹²⁹ Iḷisaurrutigiratin aliuġnaqtut; kamagiraġigitka iluqaaqługu uummatiga.

¹³⁰ Kaŋiqsipkaġuŋ iḷisaurrutikkun qaummaaqtitchisuuruq isumattusiqł̣ugulu naluruaq.

¹³¹ Piraksriutitin quviasuuttaġivaił̣ł̣ugich aniqtipkaliqsuŋaunnii qanipkun.

¹³² Qiviaġluŋa nagligiŋŋa piḷġusikaaqtun kisumupayauraq nakuaqsriruagummata ilignun.

¹³³ Unniqsuqłiisiksun kataktinniaġnaŋa; akiiḷiraupkaġniaġnaŋalu pigiiḷḷiqunmun.

¹³⁴ Annauttuŋŋa nagliksaaqtitchirimniñ, kamaksriyumauŋa piraksriutignik.

¹³⁵ Quviasaaŋŋa nayuġluŋa iḷisautiluŋalu pitquraġnik.

¹³⁶ Qulviruŋa kuuktun maqiruatun, iñuich kiuvva kamaksriŋitpaił̣ł̣utiŋ pitqurriutignik.

Nalaunŋaruaguniŋa Pitquraŋisa Atanġum

¹³⁷ Killukualaitchutin, Ataniiq, pitquratillu nalaunŋaruagusuurut.

¹³⁸ Nalautaksriqsuutitin iviġaumanaqtut suli iluaqtuagurut.

¹³⁹ Qinnautiga ikualaruq iḷumni igniqtun, qanukkii akiḷḷiima suuŋiḷaġigaich piraksriutitin.

¹⁴⁰ Qanutun nalupqinaitchuagutigiva unniqsuqłiutin! Qanutun nakuaġitigigiga!

¹⁴¹ Uvaŋa nuimaruaguŋitchuŋa suuŋiḷaġirauruŋalu, piigulaitkitka aglaan iḷisaurrutitin.

¹⁴² Iluaqtuaguniġiñ isukłitchumiñaitchuq, pitqurallu ataramik iḷumun ittuaguruq.

¹⁴³ Siḷivinŋaruŋa isumaaluutinik uŋiarrisiniglu, aglaan pitquraqpich quviatchaisuugaanŋa.

¹⁴⁴ Piraksriqsuutitin iñiqłutiŋ nalaunŋasuurut; kaŋiqsipkaŋŋa, iñuuyumauŋa.

Aŋaiyyutauruaq Annautitquvluni

¹⁴⁵ Iluqaaqługu uummatimniñ ququullavigigikpiñ; kiuŋŋa, Ataniiq, kamagiyumagitka piraksriutitin!

¹⁴⁶ Ququullavigigikpiñ; annauttuŋŋa, qaunaksriyumauŋa pitquraġnik.

¹⁴⁷ Uvlaatchaurami siqiñġum nuisaŋaiññiŋani ikayuqtisiuġvigiraġigikpiñ; niġiukkutiqaqtuŋa unniqsuqłiutignun.

¹⁴⁸ Unnuaqtutilaaŋatun itqumaraqtuŋa, isumalaaġutigivlugich piraksriqsuutitin.

¹⁴⁹ Pisigivlugu nakuaqqutin isukłitchuitchuaq, tusaaŋŋa, Ataniiq; maniuġuŋ naglikkutin iñuupkaġluŋalu!

¹⁵⁰ Nagliksaaqtitchiriŋma tikitkaqsigaanŋa, kamaksriḷaiḷat pitquraġnik.

¹⁵¹ Aglaan qanipiallaktutin uvamnun, Ataniiq, suli piraksriutitin iluqaġmiŋ piiġumiñaitchut.

¹⁵² Iŋiḷġaan imma iḷiñŋagitka piraksriqsuutitin; savaŋagitin taimuŋa piiġumiñaiqł̣ugich.

Iŋiqsruun Ikayuqtisiuġunmun

¹⁵³ Tautuguŋ nagliksaaġniġa, aasii annautiluŋa, suuŋiḷaqsriŋitchuŋakiuvva pitquraġnik.

¹⁵⁴ Iḷaalliqsuŋŋa, aasii annaktilluŋa; annautiŋŋa unniqsuqłiisiktun.

¹⁵⁵ Piḷuusiqirit annaurrauniaŋitchut, kamaksrisuitchutkii pitquraġnik.

¹⁵⁶ Aglaan iḷunŋusuutin, Ataniiq, kamanaqtuq; qiñiġnaqtirruŋ naglikkutin aasii annautiluŋa!

¹⁵⁷ Iñugiaktut akiḷḷiitka, nagliksaaqtitchiritkalu, aglaan kamagiŋaiyuitkitka pitquratin.

¹⁵⁸ Qiñiġaluaqapkich aitchuutiginniktuat, naġġutchautiraġigitka, kamaksriŋitchutkiuvva piraksriutignik.

¹⁵⁹ Qanutun piqpagitigigitka piraksriutitin, Ataniiq. Nakuaqqutin allaŋŋuyuitchuq, aasii annauttuŋŋa.

¹⁶⁰ Uqalupayaatin iḷumun ittuagurut, iluaqtuakullu isivġiutipayaatin isuitchuamun ittut.

Kamaksrisuŋaiññaġniq Pitquraŋiññik Atanġum

¹⁶¹ Aŋalitchirauruat iñuich nagliksaaqtitkaanŋa taŋiġiḷatigun, aglaan qiksigigitka pitquratin.

¹⁶² Quviasuuttaġigitka unniqsuqłiutitin quviasuktigivluŋa suġaliññakpaktuatun.

¹⁶³ Uumigigitka naġġugigitkalu sagluuġutipayaat, nakuaġigitka aglaan pitqurriutitin.

¹⁶⁴ Tallimat malġuiqsuaqługu uvlumi quyanaaġaġigikpiñ iluaqtuakkun isivġiutigirapkun.

¹⁶⁵ Nakuaqsriruat piraksriutignik navianniuġumiñaipiaqtut, sum unnii kataktitchumiñaitkaich.

¹⁶⁶ Upaluŋaitchuŋa annaurigisukłutin, Ataniiq, kamaksrivḷuŋalu piraksriutignik.

¹⁶⁷ Kamagigitka iḷisaurrutitin; nakuaġipiallakkitka uummatimniñ.

¹⁶⁸ Kamaksriruŋa piraksriutignik maliġuagaksriutigniglu; qiñiġigma surġapayaaqama.

Aŋaiyyutaa Ikayuqtisiuqtuam

¹⁶⁹ Iŋiullatigma tikiḷḷisin, Ataniiq! Puttuqsrisiqaqsimaaqtinŋa unniqsuqłiutin nalaullugu.

¹⁷⁰ Tusaagguuŋ aŋaiyyutiga, annautiluŋalu unniqsuqłiutin nalaullugu.

¹⁷¹ Nanġaġniaġikpiñ, iḷisautiŋagigmakii pitqurriutignik.

¹⁷² Atuutiġiñiaġitka pitqurriutitin, piraksriutitinkii nalaunŋarut.

¹⁷³ Ikayuqsiññaaġiraġuŋŋa, maliktuaġitkakii pitqurriutitin.

¹⁷⁴ Pigiyumapiaġuugiga annaurrisuuruaq ikayuutin, Ataniiq! Quviasuutinnagvigivlugich pitquratin.

¹⁷⁵ Iñuggusiqsimaaŋŋa, nanġaġumagikpiñ; piraksriqsuurvittuq ikayuqsimaagliñŋa.

¹⁷⁶ Asivaġuguuruŋa imnaisun tammaaruatun; ullagluŋa qiñaaŋŋa, ilvich kivgan, suuŋiḷaqsriŋitchuŋakii ilvich pitquraġnik.