Psalms 116 - Iñupiatun Mumiksat Uqalugiksuat

Iñuum Annaurrauruam Tuqqunmiñ Nanġaġaa God

¹ Nakuaġigiga Ataniq, tusaasuugaaŋakii; naalaġnisuugaaŋa aŋaiyyukama.

² Naalaġnisuummaŋa ataramik Ququullavigisuuniaġiga iñuuniqtutilaaptun.

³ Isumaaġutaisa tuqqutim avanŋagaanŋa; iłuiḷḷiuġutiqpaŋan nagliksaaġvium tikiñmaŋa; Sivuuġatchakpaŋaruŋa suli isumaaliqł̣uŋa.

⁴ Tavraasii ququullavigiŋagiga Ataniq, “Iŋiqsruġvigigikpiñ, Ataniiq, annautiŋŋa!”

⁵ Ataniq nagliktauruq suli nalaunŋaruaguruq; God-ikput iḷunŋusuutiqaqtuq.

⁶ Atanġum munaġisuugaich ikayuqtiksraitchuat; Anayanniupiallakkama, ilaata annautiŋagaaŋa.

⁷ Unaŋuiqsiavsaaġiñ, iḷitqusimaaŋ, qanukkii uvva Atanġum aŋalalluatapiallaŋagaatin.

⁸ Atanġum annautiŋagaaŋa tuqqunmiñ; qulviŋaiqsinŋagaaŋa isigatkalu putukkiññiksrakkaluaŋanniñ.

⁹ Tavraasii pisuaġniaqtuŋa sivuġaani Atanġum nunaŋanni iñuuruaguruat.

¹⁰ Ukpiqsimaaqtuŋa, uqallakkaluaqłuŋaunnii, “Nagliksaaqtitaupiaġataqtuŋa.”

¹¹ Iqsisiqaġaluaqłuŋa aasii uqallaktuŋa, “Iñupayaurat sagluturuagurut.”

¹² Sumik aitchuutiqaġumiñaqpik Ataniġmun pisigilugich ilaata nakuugutisuuŋammaŋa?

¹³ Aitchuġniaġiga wine-mik, quyyavigilugu annautiŋammaŋa.

¹⁴ Taŋŋiġñiaġiga unniqsuqłiisiga Ataniġmun takkuanni iñugipayauraqtaŋisa.

¹⁵ Piññaġnaqtuaguruq Ataniġmun tuqumman ukpiqtuaguruaq.

¹⁶ Kivgaġigiŋma, Ataniiq; savautiniaġikpiñ tainnaptauq Aakaptun. Qiḷiqsimmatitka piiyaŋagitin tuqqunmiñ.

¹⁷ Qaitchiñiaqtuŋa iliŋnun ikipkautikun quyanaaġunmik suli ququullavigilugu atqa Atanġum.

^18-19 Kasimappata iluqaġmiŋ iñugiratin, siḷalliġmi kasimaviani Aŋaiyyuvikpakpich Jerusalem-mi, Qaitchiñiaġikpiñ unniqsuqłiisigiŋaramnik. Nanġaqtauli Ataniq!