Psalms 115 - Iñupiatun Mumiksat Uqalugiksuat

Iḷumun Ittuaguruaq God

¹ Ilignun kisian, Atanġuruatiin, ilignun kisian, suli uvaptinnunŋiḷaaq, qaisaksrauruq nanġaun pisigilugu ataramik ittuaq nakuaqqutin suli ukpiġnaqtuaguniġiñ.

² Summan nunaqpauruat uqallagniaqpat, “Nauŋ imña God-iŋat?”

³ God-ikput qiḷaŋmiittuq; isumamisun suna savaaġisuugaa.

⁴ Iliŋisa god-iŋich piḷiagurut qatiqtuaniglu suli kaviqsuaniglu manigñik, iñugruiññat argamignik savaaŋich.

⁵ Qaniqaqtut, aglaan uqalalaitchut, suli iriqaġaluaqtut, aglaan tautuyuitchut.

⁶ Siutiqaġaluaqtut, aglaan tusaalaitchut, qiŋaqaqtut, aglaan sumik naisisuitchut.

⁷ Argaqaġaluaqtut, aglaan sumik aksialaitchut, suli isigaqaqłutiŋ, aglaan pisualaitchut; iggiamiktigun sumik nivliḷaiñmiut.

⁸ Iliŋich tamatkuniŋa savaŋaruat ittut iliŋisitun, tainnaptauq uqpiqsraqtuat iliŋiñun inniaġmiut.

⁹ Iñugiraasi Israel, ukpiġisiuŋ Ataniq. Ikayuġuugaasi suli akkiaġautauruq ilivsiññun.

¹⁰ Aŋaiyyuliqsiqpaich Aaron-gum kiŋuvaaŋi, ukpiġutiqaġitchi Ataniġmun. Ikayuġuugaasi suli akkiaġautauruq ilivsiññun.

¹¹ Qiksiksrautiqaqtuasii Ataniġmun, Ukpiġutiksi illi ilaanun. Ikayuġuugaasi suli anniyaitkutauruq ilivsiññun.

¹² Atanġum itqaumagaatigut suli quviasaaġniaġaatigut; quviasaaġunmik qaitchiñiaġaich Israel iñuŋich suli quviasaaġniaġaich igluaniittuat Aaron-gum aŋaiyyuliqsiqpaŋich God-im.

¹³ Quviasaaġunmik aitchuġniaġaich qiksiksraqtuat ilaanik, mikigaluaqtuallu kamanaqtuaguruallu atilugich.

¹⁴ Atanġumtuq iñugiaksipkaġumagaasi ilivsiḷu miqłiqtusiḷu!

¹⁵ Atanġumtuq quviasaaġumagaasi, savaŋaruam qiḷagmiglu nunamiglu!

¹⁶ Qiḷak, qiḷaiḷḷu Atanġum pigigaich, aglaalli qaiñŋagaa nuna iñupayaanun.

¹⁷ Ataniq nanġausiaqalaitchuq tuquŋaruaniñ, nipalaitchuanuŋaruaniñ unnii.

¹⁸ Aglaan uvagut iñuuruagut, quyyaviginiaġikput paŋmami suli taimuŋa isuitchuamun. Nanġaqtauli Ataniq.