Psalms 112 - Iñupiatun Mumiksat Uqalugiksuat

Quviasuutiŋa Iñulluatauruam

¹ Nanġaqtauli Ataniq! Quviasugli iñuk qiksiksraqtuaq Ataniġmik, Quviagivlugich piraksriutiŋiññik kamaksriruaq.

² Ilaata miqłiqtuŋich suaŋŋatiqaġniaqtut nunami; nalaunŋaruaguruat kiŋuniiŋich quviasaaqtauniaqtut.

³ Suġalġich suli umialgutit igluaniinniaqtut, suli iluaqtualiqirauniŋa inniaqtuq taimuŋa isuitchuamun.

⁴ Qaummaġiksiraqtuq taaqtuami iñulluatauruanun, nagliktauruanun, pikał̣ł̣aktautaitchuanun, suli iluaqtualiqirauruanun.

⁵ Nakuuruaq qaiñiaqtuq iñugmun sigñataił̣ł̣uni atuqtitchisuuruaq, savaamiñi aŋalatchisuuruq saglutautaitchuakun.

⁶ Iḷumutuuqtuaq aulayyaktauniaŋitchuq taimuŋa; iluaqtualiqirauruaq itqaumagisuuniaġaat taimuŋa isuitchuamun.

⁷ Ilaa sivuuqqataitchuq pigiitchuanik tusaayugaaġniaġumi; uummanmiñi ukpiġutaa aulayaitchuaguruq, ukpiqsraqtuq Ataniġmun.

⁸ Uummanmiñi aulayaitchuaguruq iqsisiqaġniaŋitchuq; nalupqinaitchuakun qiñiġñiaġaich akiḷḷiiñi akiisitauruat.

⁹ Sigñataił̣ł̣uni aitchuiraqtuq piiḷḷiuqtuanun, iluaqtualiqirauniŋa taimuŋa inniaqtuq; ilaa suaŋŋatiqaġniaqtuq suli qiksigirauluni qutchiksuakun.

¹⁰ Pigiiḷḷiqirauruat tautugniaġaat suli qinnaliġḷutiŋ; tiriqtitaġniaġaich kigutitiŋ suli qiñiġnaiġutiniaqtut; niġiukkutikkaluaŋich piiġñiaqtut.