Psalms 111 - Iñupiatun Mumiksat Uqalugiksuat

Nanġaun Ataniġmun

¹ Nanġaqtauli Ataniq! Iluqaaġluŋa uummatimniñ quyyatiqaġniaqtuŋa Ataniġmun iluaqtualiqirauruat katitpata.

² Qanutun aliuġnaqtigivat Atanġum savaaŋich! Iluqaġmiŋ quyyatiqaqtuat tamatkuniŋa savaaŋiññik isumalaaġutigiraġigaich.

³ Ilaata savaaŋich qutchiksuagurut suli kamanaqtuaguvlutiŋ; nalaunŋaruaguniŋa isuitchuamun ittuq.

⁴ Atanġum itqaumapkaġaġigaich aliuġnaqtuat savaaġiŋarani; ilaa nagliktauruq suli siḷivinŋaruq iḷunŋusuunmik.

⁵ Niqiksraqaqtitchisuuruq qiksiksraqtuanik ilaanun; ilaata piigulaitkaa sivunniuġutiliani.

⁶ Iḷitchuġipkaŋagaa ilaan suaŋŋatini iñugmiñun kiŋuvaannaktiłługich nunaŋiñik allat nunaqpauruat.

⁷ Savaaŋich argaŋisa iḷumun ittuagurut suli nalaunŋaruagurut; iluqaġmiŋ piraksriutiŋich ukpiġnaqtut.

⁸ Inniaqtut taimuŋaaglaan isuitchuamun; qaisauŋarut iḷumun ittuakun suli nalaunŋaruakun.

⁹ Tasuqsaqtaupkaŋagaich iñugirani suli isuksraiḷaamun inniaqtuamik sivunniuġunmik inillaivḷuni. Salumaruaguruq suli qiksiġñaqtuaguvluni ilaan atqa!

¹⁰ Qiksiksrautiqaġniq Ataniġmun isagutisaaguruq isumattutiqaġniġmun; Kamaksriruat ilaan piraksriutiŋiñik kaŋiqsimalluataqtut. Ilaa nanġaqsimaaqtaksrauruq taimuŋa isuitchuamun.