Psalms 107 - Iñupiatun Mumiksat Uqalugiksuat

Tallimaŋat Makpiġaat Psalms-mi ( Psalms 107—150 ) Nanġaun God-im Nakuuniŋagun

¹ Quyyavigisiuŋ Ataniq, qanukkii ilaa nakuuruaguruq, nakuaqqutaa isuitchuamun ittuq.

² Uqallautigitqigḷugich uqaluich nanġaġlugu Ataniq, Iluqavsi ilaan annautiŋaraasi. Tasuqtauŋaruat argaŋiñiñ akiḷḷiimiŋ

³ utqutivlusi allaniñ nunauruaniñ, qavaŋŋamiñ avaŋŋamiḷḷu, suli kanaŋŋamiñ paaŋŋamiḷḷu.

⁴ Kukiḷuktuaŋarut apqutaitchuami nunagluktuami paqillaiŋarut sumi iniqpagmik inillagvigiyumiñaqtamignik.

⁵ Kaaksiuŋarut imiġuksiuvlutiglu suli qanuqsausiipiallakłutiŋ.

⁶ Iłuiḷḷiuġnimigni ququulanagutiŋagaat Ataniq, aasii annautiraġigaich iłuiḷḷiuġutiŋiññiñ.

⁷ Aullatiŋagaich sivukkiksuakun apqutikun iniqpagmun iñuuniaġviksraŋannun.

⁸ Quyyavigilirruŋ Ataniq nakuaqqutaagun ataramik ittuakun, aliuġnaqtuatigullu savaaŋigun iñugnun.

⁹ Katchuqtitchuugaich imiġuliqsuat suli kaaguiqsiłługich kaaktuat nakuuruanik.

¹⁰ Iḷaŋich iñuuruat ipiqtunami suli taaqtuami, tigutaaqtat nagliksaaqtuat qiḷiqsruurrat qivḷiġnik,

¹¹ paaqłaktuaguŋavlutikkii uqaluŋiñik Qutchigñiqtauruam God-im suli ayyaŋavlugich ilaata piraksriqsuutiŋich.

¹² Tavraasii minġulipiallaŋaniqsut siġġaġnaqtuanik savakpaił̣ł̣utiŋ; puukaġaluaġmata, kia unnii ikayulaiññiġaich.

¹³ Tavraasii iłuiḷḷiuḷiqamiŋ ququulaŋarut Ataniġmun, aasii annautiŋagaich iłuiḷḷiuġutiŋiññiñ.

¹⁴ Pilluutiraġigaich iñuuruat ipiqtunami suli taaqtuami suli navguqł̣ugich pituutaŋich qivḷiġich.

¹⁵ Quyyavigilirruŋ Ataniq nakuaqqutaagun ataramik ittuakun, aliuġnaqtuatigullu savaaŋigun iñugnun.

¹⁶ Upkuagiyaiḷḷaruq patukpagnik upkuanik suli siqummaaqługich savił̣hat sapukutat.

¹⁷ Iḷaŋich isumalluaġiitchuaguŋaniqsut, nagliksaaqłutiŋ pisigivlugich piḷuusiqiatiŋ suli pisigivlugich pigiiḷḷiqiatiŋ;

¹⁸ Qiñiġunġiŋagaich unnii niqiuraġniat tuquyasiḷġataqłutiŋ.

¹⁹ Tavraasii iłuiḷḷiuliqamiŋ ququulaŋarut Ataniġmun, aasii annautiŋagaich iłuiḷḷiuġutiŋiññiñ.

²⁰ Uqalugmiñik piraksriivḷuni, iłuaqsiŋagaich suli annautivlugich suksraunġiunmiñ.

²¹ Quyyatiqaġlich Ataniġmun ilaan nakuuniŋagun, aliuġnaqtuaniglu savautiŋammatiŋ.

²² Quyyatiqaġlich ilaanun ikipkautitigun, suli atuġlutiŋ quviasuunmi quliaqtuaġilugich ilaan savaaŋich.

²³ Iḷaŋich tiŋilġairaqtut taġiukun umiaqpaktigun, iñuuniaġutiksraqtiŋ pisigivlugu taġiumiqsiuġaqtut.

²⁴ Qiñiŋarut qanuq Ataniq savallatilaaŋa, ilaata aliuġnaqtuatigun savaaŋigun itiruani.

²⁵ Ilaa piraksriimman, anuqłiġuqpagaqtuq qaiḷḷiġuqpakłuniḷu.

²⁶ Umiaqpaich qaŋattaġaqtut suli anmugmivḷutiŋ itiruanun. Tainnasimun anayanaqtuamun iḷikamiŋ tatamaalaliġaqtut;

²⁷ Kiavyaaŋaŋarut suli sanipaktuġaqhutiŋ imiŋaratun pisuġlipayaakkaluaŋat suuŋaiġaqtuq.

²⁸ Tavraasii isumaaluutiqpagmigni ququularaqtut Ataniġmun, aasii annautiraġigaich iłuiḷḷiuġutiqpaŋanniñ.

²⁹ Quunniġuqtittaġigaa anuqłiqpaktuaq, aasii qaiḷḷiŋaiqsiłługu.

³⁰ Quyyatiqaŋarut anuġaiġutimmatiŋ, aasii aullatiŋaniġaich uqqiyviksraŋannugataqtillugich.

³¹ Quyyatiqaqtuksraurut Ataniġmun nakuaqqutaa ataramik ittuaq pisigilugu, suli aliuġnaqtuanik savautiŋammatiŋ.

³² Qutchiksiḷiqtaksraġigaat atautchimugmata iñuich suli nanġaġlugu sivuġaanni atanaurat aullarriŋisa.

³³ Atanġum kuugich nunagluktuaġuqtitchuugaich maqsralukkaluaqtuallu kuugaurat paliumaruaġuqługich.

³⁴ Naurisuqtuaq nuna nauriḷaitchuaġuqtinŋagaa pisigivlugich pigiiḷḷiqivlutiŋ iñuuniaqtuat taavani.

³⁵ Nunagluktuaq maqsraluktuanik iminiktinŋagaa suli paliumaruaq nuna suvliktuanik maqsraluktuaniktiłługu.

³⁶ Kaaktuaguruat inillaktinŋagaich tavrani, aasii nappaivḷutiŋ iniqpagmik iñuuniaġviksramignik.

³⁷ Kanġaqsruiŋaniqsut nautchiivigñi suli nautchirriivḷutiŋ grape-nik aasii nauriḷḷuatapiaġataŋaniqsut.

³⁸ Atanġum quviasaaġunmik qaitchivḷugich piḷḷuatautiqaqtinŋaniġaich iñuni, suli iñugiaktuanik miqłiqsiŋarut; pamiqsaaŋich iñukłipkalaiñŋagaich.

³⁹ Atanġum iñuŋich akiisitauvlutiŋ anmuqsruqtauŋarut nagliksaaqtitauvlutiŋ suli isumaaġun igḷutuqługu,

⁴⁰ Atanġum suunnaġiŋiñŋagaich nagliksaaqtitchiruat iliŋiññik suli kukiḷuktiłługich apqutaiḷami nunagluktuami.

⁴¹ Annautiŋagaich piiḷḷiuqtuat iłuiḷḷiuġutiŋiññiñ suli iñugiaksipkaqługich qitunġaġiiksuaguruat kanŋuuruatun.

⁴² Iłuaqtualiqirauruat qiñiġaat taamna suli quviasuutigigaat, pigiiḷḷiqirauruat aglaan nipaiqsitaurut.

⁴³ Isumaturuaguruat isumalaaġutiqaġlich tamatkuniŋa; suli isumalaaġutigilugu Atanġum ataramik ittuaq nakuaqqutaa.