Psalms 106 - Iñupiatun Mumiksat Uqalugiksuat

Atanġum Nakuuruaguniŋa Iñugmiñun

¹ Nanġaqsiuŋ Ataniq! Quyyavigisiuŋ Ataniq, qanukkii ilaa nakuuruaguruq, nakuaqqutaa isuitchuamun ittuq.

² Kia quliaganikkumiñaqpagich iluqaisa kamanaqtuat savaaŋich? Kia nanġaanikkumiñaqpauŋ naamaruamik?

³ Quviasuglich iñuuruat pitqiksiġautaitchuakun, nalaunŋaruakun iñuuruat ataramik.

⁴ Itqaumasaġiŋma, Ataniiq, ikayuiguvich iñugiraġnik; iḷagisaġiŋma annautigupkich.

⁵ Qiñiġukkitka piḷḷuatautiqaqpata iñuksraqtaaġiŋaratin suli iḷaksruutiluŋa quviasuutaanni. Nanġaġukkikpiñ piqatigilugi iñugiratin.

⁶ Piḷuusiqiŋarugut maŋŋuuptituntauq; suli pigiitchualiqivluta.

⁷ Maŋŋuupta Egypt-mi kaŋiqsimaŋaitkaich aliuġnaqtuat God-im savaaŋich; piiguġruiññaŋarut iñugiaktuani maniraġimmagu nakuaqqutini, aglaan paaqłaŋagaat Red Sea-mi.

⁸ Aglaan annautiŋagaich atini pisigivlugu, iḷitchuġipkaqsaqługich kamanaqtuamik suaŋŋatiqpagmiñik.

⁹ Tiliŋagaa Red Sea, aasii paliumaruaġuŋaruq; aullatiŋagaich itiruatigun nunagluktuakuaġmatun.

¹⁰ Annautiŋagaich tamatkunaŋŋa uumigiriŋiññiñ; annautiŋagaich argaŋanniñ akiḷḷiiŋisa.

¹¹ Immam matuŋaniġaich akiḷḷiiŋich; atausiuraq-unnii kisiŋŋuqtauŋaiñŋaruq.

¹² Tavra iñuŋisa ukpiġiliŋagaich uqaluŋich suli atuqłutiŋ nanġautinik ilaanun.

¹³ Aglaan qilaminiaq piiguŋaniqsut savaaŋiñik suli utaqqigaluaġnatiŋ qanuq pitquniaqtilaamignik.

¹⁴ Aglaan atqunaq sutuġuksiulipiallaŋaniqsut nunagluktuamiillaġmiŋ suli God uuktuqługu;

¹⁵ aasii aitchuŋaniġaich apiqsriaġiraŋannik, aglaan iłuirrutiqpagmik naŋiliqsinŋaniġaich.

¹⁶ Nullaummivigmigni isummanŋutchautigiŋaniġaik Moses-lu Aaron-lu, Atanġum ilaaguaqtaġivlugu iñugiraa.

¹⁷ Tavraasii nunam agmautivlugu iiŋaniġaa Dathan suli iḷuviqługu Abiram itqatigiraŋiḷu;

¹⁸ Igniġum ikiniġaich maliġuaqtiŋich suli ikivlugich pigiiḷḷiqirauruat iñuich.

¹⁹ Kaviqsuamik manigmik immulivium aŋusalluanik nuġġaliuŋaniqsut Horeb-mi aasii aŋaiyyuvigiaqsivḷugu iñuuraqpak;

²⁰ Simmausiŋaniġaat qaumanġa God-im arriŋanun qimuktim ivigaanik niqiqaqtuam.

²¹ Piiguġruiññaqługu God annaurriktiŋ kamanapiaġataqtuanik savaŋaruaq Egypt-mi.

²² Qanutun taimma aliuġnaqtigiruanik savaŋava! Qanutun aliuġnaqtigiŋarut savaaŋich Red Sea-mi!

²³ God uqallagman suksraunġiġñiaġnivḷugich iñuni, piksraqtaaġivlugu kivgani, Moses, makitaŋaniqsuq sivuġaani God-im, paaqłaŋanigaa God aasii suksraunġiqsinŋił̣ł̣ugich iñuich.

²⁴ Tavraasii suksraġiŋiñŋaniġaat nakuuruaq nuna, ukpiġiŋił̣ł̣ugitkii unniqsuqłiisigiŋaraŋi.

²⁵ Tupiġmigniillaġmiŋ uqamayuguuŋaniqsut suli naalaġnisuŋił̣ł̣ugu Ataniq.

²⁶ Isaaġutivluguasii argani kiliŋaniġaich tuquġaaniaġnivḷugich nunagluktuamiillaġmiŋ

²⁷ tuquġaaqtillugich kiŋuvaaŋich akunġanni nunaqpauruat, siammayaaqtinniaġnivḷugich aasii allani nunani.

²⁸ Tavraasii God-im iñuŋich iḷḷatiŋaniqsut nanġairuanun Baal iġġiŋani Peor-m suli niġiñagutivlutiŋ aitchuutauruanik tuquŋaranun god-inun.

²⁹ Tavra qinnaliqsinŋaniġaat Ataniq suraġautchimiktigun, aasii igḷutulgunaitchuat naŋirrutit iḷiŋaniqsut akunġanni.

³⁰ Aglaan Phinehas maksriŋaniqsuq aasii tatavsaqługich pasirauruat, tavraasii naŋirrutiqpak nutqaŋaniqsuq.

³¹ Tavra taamna itqaumagisuuniġaat ilaa iłuaqtualiqirualivḷugu kiŋuniġiiksuaguruanun taimuŋa isuitchuamun.

³² Maqsraluktuaŋiñi Meribah-m iñuich qinnaliqsinŋamagaat Ataniq, aasii Moses ilaa pasiraupkaqługu pisigivlugich.

³³ Iñuich paaqłaŋavlugu Moses, isumalaaġaluaġnani uqallaŋaniqsuq.

³⁴ Tuquttaŋaiññiġaich ukpiqtuaguŋitchuat Atanġum piraksriutaatun iliŋiññun,

³⁵ iliŋich aglaan tuvaaqasiqsuqłutiŋ iḷaŋiññik suli piḷġusiŋich atuliqł̣ugich taapkua.

³⁶ Aŋaiyyuvigirraqsiŋaniġaich iñuuraqpaich, tavraasii iliŋiññun nigatchiatun iḷivḷutiŋ.

³⁷ Aitchuutigirraqsiŋamammigaich ikipkautikun iġñiġuraġniatiglu panitiglu iḷitqusiqł̣ugnun.

³⁸ Tuqutchiŋarut patchisaitchuanik, auŋich iġñiŋisalu paniŋisalu, aitchuutigivlugich iñuuraqpaŋiñun Canaan, aasii nuna salumaiḷivḷugu iñuaqtuqłutiŋ.

³⁹ Ilimignik salumaiḷiŋaniqsut savaamiktigun akiitchutun inŋaniqsut savaamigni.

⁴⁰ Tavraasii Atanġum qinnaliutiŋaniġaich iñuni; atqunaqłuni naġġugiliŋaniġaich ilaata kiŋuvaani.

⁴¹ Aasii ilaata qaiñŋaniġaich ukpiqtuaguŋitchuanun, suli akiḷḷiiŋisa atanniqsimanagutivlugich.

⁴² Nagliksaaqtitauŋaniqsut akiḷḷiimigniñ suli kamagivlugich sutqupayaaġmatiŋ.

⁴³ Iñugiaktuani Atanġum annautigaluaġaġigaich iñuni, aglaan paaqłaŋaaqsiraġigaat suli muġruktaaqsiññaqłutiŋ piḷuutimigni.

⁴⁴ Naagga suli tavra Atanġum tusaaraġniġaa qirrataat, suli tusaavlugich iluiḷḷiuġutiŋich.

⁴⁵ Itqaumaŋaniġaa sivunniuġutini iliŋiññun, suli nakuaqqutiqpagmiñi nagligiŋaniġaich.

⁴⁶ Iluqaisa nagliksaaqtitchiruat iliŋiññik naglikkunmik immiŋaniġaich.

⁴⁷ Annauttisigut, Ataniiq God-iiŋ, aasii utqutiluta akunġanniñ ukpiqtuaguŋitchuaniñ, quyyatiqaġumaugut suli nanġaġlugu salumaruaq atqiñ.

⁴⁸ Nanġaqtauli Ataniq, God-iŋa Israel; nanġaqsiuŋ taimaŋŋaqaŋa taimuŋaaglaan! Iñuich iluqaġmiŋ uqallaglich, “Aamian!” Nanġaqsiuŋ Ataniq!