Psalms 105 - Iñupiatun Mumiksat Uqalugiksuat

God Iñuniḷu

¹ Quyyavigisiuŋ Ataniq, ququulalusi atqanun; uqautilugich nunaqpauruat qanuq savaŋatilaaŋanik.

² Atuġitchi nanġautinik Ataniġmun; uqautigilugich aliuġnaqtuat ilaata savaaŋich.

³ Nanġaqtauli ilaata atqa; qiññuaqtuqtuat Ataniġmun quviasuutiqaġlich.

⁴ Saatchiuŋ Ataniq, suaŋŋatiksi; aŋaiyyuvigilugu ataramik.

^5-6 Kiŋuvaaguruasii Abraham-mun, kivgaŋanun God-im; kiŋuvaaguruasii Jacob-mun, naliġaaġiŋaraanun: Itqaumasigik aliuġnaqtuat God-im savaaġiŋaraŋich suli isivġiutigisuuŋaraŋich.

⁷ Ataniq God-igigikput; isivġiqsuutiŋich tunŋarut iñupayauraŋiññun nunam.

⁸ Piiguġumiñaitkaa sivunniuġutini taimuŋa isuitchuamun, unniqsuqłiisaa naamaniaqtuq 1,000-tun kiŋuniġiiksuanun.

⁹ Taamnauvva sivunniuġutiliaŋa Abraham-mun unniqsuqłiisigivlugulu Isaac-mun.

¹⁰ Nalupqinaiŋagaa Jacob-mun pitquraliamigun, aasii Israel-mun sivunniuġutauruakun inniaqtuakun taimuŋa isuitchuamun.

¹¹ “Aitchuġniaġikpiñ nunamik Canaan-mik,” Ilaa uqallaktuq. “Kiŋuvaannaktaaġiniaġiñ.”

¹² Iñugiakisuuraukamiŋ, iglaaguvlutiŋ nunaŋani Canaan,

¹³ kukiḷuktuaŋarut nunaqpagniñ suli allanun nunaqpauruanun, umialguviuruaniñ suli allanun iñugnun.

¹⁴ God-im aglaan nagliksaaqtitaġipkaŋaitkaich kimun unnii; anniquŋił̣ł̣ugich iñuni, iñiqtiŋagaich umialgich:

¹⁵ “Anniaġnasigich piksraqtaatka; uqaqtitka piyuaġnasigik.”

¹⁶ Atanġum kaagnaq iḷipkaŋamagaa nunamun niqiksraiġutipiallaktiłługich.

¹⁷ Tilisiŋamaruq sivuani Joseph-mik, tunirauŋaruaq kivgausaqługu.

¹⁸ Isigaŋich pituktuŋagaich kalimñanik tigluuraqtaallaan, suli savił̣hamik quŋusiġutiqaqługu,

¹⁹ nalautchautigiŋaraŋa nalautilġataqtillugu, Uqaluata Atanġum nalaunŋarualiuŋagaa.

²⁰ Tavraasii umialgata Egypt tigutaaqtauŋaiqsinŋaniġaa; aŋalatchiruam nunaqpauruanik qiḷġutaiyaqtinŋagaa.

²¹ Qaukłiḷiutiŋaniġaa kavamamiñun suli aŋalatchiriġuqługu nunapayaamiñun,

²² suaŋŋatiqallasivḷugu qulaułługich umialgum ilaata atanauraŋich suli ataniġnaqusiqł̣ugu iḷisautillasivḷugich ilaata natqiksruirini.

²³ Jacob Egypt-muŋaruq; aasii tavrani Ham-mi iñuuniagaqsivḷuni.

²⁴ Atanġum miqłiqtuukkaqsipkaŋanigaich iñuni suaŋasił̣haaqługiḷḷu akiḷḷiŋiññiñ.

²⁵ Ilaata Egypt-miunun uumigiliqtinŋaniġaich iñuni suli aŋalatiłługich saglutautitigun.

²⁶ Tavraasii tiliŋaniġaa kivgani Moses, Aaron-lu, naliġaaġiŋarani.

²⁷ Savaŋaniqsuk God-im kamanaqtuanik savaaŋiññik suli aliuġnaqtuanik savakłutik Egypt-mi.

²⁸ God-im taaqsipkaŋaniġaa nuna, aglaan Egypt-miut kamagiŋaiññiġaat piraksriutaa.

²⁹ Kuuŋich auguqtinŋaniġaich aasii tuqupkaqługich iqaluich.

³⁰ Nunaŋat naaġaayich iñugiaksivigiqpagniġaat; igluqpaŋat unnii siḷivinŋaniqsuq tamatkuniŋa.

³¹ Uqallagman, nuviuvaiḷḷu milugiatchiallu niviñiġaat iluqaan nunaŋat.

³² Natatquġnanik katagaaqtitchiŋaniqsuq sialuktuatun, igniġuuqpatiłługu nunaŋanni.

³³ Suksraunġiŋaniġaich napaaqtuayaat grape-giḷḷu napaaqtuŋiḷḷu fig-gich navguqługiḷḷu napaaqtupayauraŋich nunaŋanni.

³⁴ Piraksriimman, nuttagayuich qaiyaaniqsut, iñugiakpaił̣ł̣utiŋ kisiññaġumiñaitchut-unnii;

³⁵ niġivḷugich nuŋullagniġaich nauruat nunami; niġiḷḷagniġaich tamatkiqł̣ugich nauruat niqiksriat nunaŋanni.

³⁶ Ilaata tuqunŋagaich aŋayukłiŋich iñuich aŋutauruat aŋayukłiŋiḷḷu pamiqsaat aŋusallut iluqaani Egypt-mi.

³⁷ Tavra aullatiŋagaich iñuni annisivlugich Egypt-miñ; aullaurriŋaniqsut qatiqtuaniglu kaviqsuaniglu manigñik, suli iluqaqpiuraġmiŋ surruutaiñŋaniqsut timimigni suli saŋŋiruaguvlutiŋ.

³⁸ Egypt-miut iqsigiliutiŋaniġaich Israelite-guruat, suli quyaŋarut aullaġmata.

³⁹ God-im qulaŋiqsimaaŋaniġaich nuvuyamik iñuni suli igniġmik unnuami qaummatiksraŋannik.

⁴⁰ Apiqsriŋaniqsut, aasii aitchuŋagaich quail-nik; niqiksriñŋaniġaich qiḷaŋmiñ aasii niġisuiqsuaqtiłługich.

⁴¹ Agmaŋaniġaa uyaġak, aasii imiq maqipkaqługu, maqiŋaniqsuq nunagluktuami kuuktun.

⁴² Ilaata itqaumaŋaniġaa salumaruaq unniqsuqłiisini Abraham-mun kivgamiñun.

⁴³ Tavraasii aullatiŋaniġaich piksraqtaaġiŋarani iñuich, aasii quviasuunmi nipatuvlutiŋ atuŋaniqsut.

⁴⁴ Aitchuŋaniġaich nunaŋiñik allat iñuich aasii piññaktaaġipkaqługich nunaŋich,

⁴⁵ iñugmiñun kamagitquvlugich pitqurani suli maliġilugich piraksriutipayaani. Nanġaqtauli Ataniq!