Psalms 104 - Iñupiatun Mumiksat Uqalugiksuat

Nanġaqługu Iññiqsiruaq

¹ Nanġaġli Ataniq, iḷitqusimaaŋ! Ataniiq, God-iiŋ, qanutun kamanaqtigivich! Annuġaaqaqtuatun qaumaniġmiglu kamanaunmiglu ikiaqtalaaġnaqtutin;

² Matuŋarutin qaumaniġmik annuġaaġmatun. Isivinŋagitin qiḷaich tupiqtun

³ aasii nappaqługu aimaaġviiñ imaŋiññi qiḷaum; nuviyat atuġaġigitin aksraktuuratun, suli anuġim isaġuŋisigun igliġutivlutin.

⁴ Anuġit atuqługich kiliktuutitun ikualaruat kivgaġiruatun itkitiñ.

⁵ Inillaŋagiñ nuna payaŋaiqł̣ugu maŋŋuŋiñun, aasii aulayyaktauyumiñaitchuq.

⁶ Inillaŋagiñ taġium itiruaŋaniñ qaliġuaġmatun, aasii immam matuŋagaich iġġich.

⁷ Suakkapkich immat, qimaŋarut; qilamik aullaŋarut tusaagamirruŋ kallugruan.

⁸ Qunmuŋarut immat iġġiñun anmukłutik aasii natiġnanun, iniksriutigiŋaraġnun.

⁹ Killiksriuŋarutin qaaŋiġumiñaisaŋannik, matutqiquŋił̣ł̣ugu nuna.

¹⁰ Kuuġuluurat iglaupkaġuugitin natiġnanun, aasii kuugich supivlutik akunġatigun iġġich.

¹¹ Imiksraqaqtitchuugaich niġrutit; tamaani pamiqsaaguŋitchuat kakaktit imiġuiqsuaġaqtut.

¹² Napaaqtuni immam siñaani tiŋmiaġruich ugluliraqtut atuqłutiglu.

¹³ Pamaŋŋa qiḷaŋmiñ sialuktittaġigiñ qimiqqanun, aasii nuna siḷiviłłuni savaaġnik.

¹⁴ Naupkaġitin ivigaat pamiqsaanun niqigitquvlugich, aasii nauriat uvaptignun atuquvlugich, nauriḷḷatquvluta niqłiaksranik

¹⁵ aasiisuli wine-liuġluta quviasaaġutiksraptignik, olive-lu uqsruanik nanuutiksraptignik kiiñaptignun, aasiisuli punniġnik niqiksraptignik.

¹⁶ Lebanon-gum napaaqtuŋich cedar-t imaiḷḷiulaitchut— Atanġum ilaata napaaqtut nautchirriaŋich.

¹⁷ Tavrani tiŋmiat ugluliraqtut; tatirgaich ugluliraqtut allakani napaaqtuni.

¹⁸ Nagrulgich itchuurut qutchiksuani iġġiñi, niġrugaurat iriqsimavlutik ikpigñi.

¹⁹ Tatqiḷiuŋarutin nalunaigutausaqługu suŋŋuqtilaaŋa ukium; siqiñiq iḷisimammiuq qakugu nipinaqsitilaamiñik.

²⁰ Unnualiuŋarutin, aasii taaqsimman niġrutipayaat napaaqtuniittuat kukiḷurraqsiraqtut.

²¹ Laiyangich ugialasuurut niqiksraqsiuqamiŋ, niqiksraqsiuqłutiŋ God-im aitchuutiŋiññik.

²² Siqiñiq nuiguraaġman, utaasuurut aasii quŋalugiaqłutiŋ sisimigni.

²³ Tavraliasii iñuich aniasuurut savaamignun savaaqsivḷutiŋ aasii unnuksraaġataqtillugu.

²⁴ Ataniiq, araa savaŋaratin iñugiakpaktut! Isumattutigni savaaġiŋagitin iluqaisa! Nuna siḷivinŋaruq savaaġnik iñuuruanik.

²⁵ Kamanaqtigiruq manna taġiuq, aŋiruq suli ikiqturuq, kisiññaġumiñaitchuat niġrutit iñuuvigigaat, aŋiruallu mikiruallu ativlugich.

²⁶ Tamaani umiaqpaich igliġaqtut, savaaġiŋaratillu niġrułłuich piuraaġvigigaat.

²⁷ Iluqaġmiŋ saatchuurut iliŋnun niqiksritquvlutiŋ kaaliqamiŋ.

²⁸ Aitchuġaġigitin, aasii niġiaqsivḷutiŋ; niqiksraqaqtittaġigitin, aasii iḷaŋaniiqsuaġaqtut.

²⁹ Tununnapkich, iqsiññiuġaqtut; aniġniŋat piiqapku, tavra tuquraqtut aasii nunaġutqikł̣utiŋ.

³⁰ Aniġniksritkapkich, tavra iñuguġaqtut; nutauruamik iñuggunmik qaitchiraqtutin nunamun.

³¹ Qaumanġatuq Atanġum taimuŋaaglaan itchumauq! Atanġum quviagiliuŋ ilaata savaaġirani!

³² Qiviaġmagu nuna, uulillaguuruq; aksigmagich iġġich avyuallaguurut.

³³ Atuutiqaġniaqtuŋa Ataniġmun iñuuniaġnimni; Atuġniaqtuŋa nanġautinik God-imnun iñuuniqtutilaamni.

³⁴ Isummatitkatuq iviġaumanaġlich ilaanun, quviasuutigakii ilaaniŋŋaqtauruq.

³⁵ Piḷuusiqirittuq piiqsauyumaut maaŋŋa nunamiñ; pigiiḷḷiqirittuq suksraunġiqsauyumaut. Nanġaġli Ataniq, iḷitqusimaaŋ! Nanġaqtauli Ataniq.