Psalms 103 - Iñupiatun Mumiksat Uqalugiksuat

Nakuaqqutaa God-im

Aglaaŋa David-gum.

¹ Nanġaġli Ataniq, iḷitqusimaaŋ! Iluqaqpiuraŋanik irrusiġma, nanġaġli salumaruaq atqa!

² Nanġaġuŋ Ataniq, iḷitqusimaaŋ, Suli piiguġnagich iluqaisa ikayuutiŋich.

³ Suliqutigiŋaiġuugaich iluqaisa piḷuutitka suli iluaqsivḷugich iluqaisa naŋirrutipayaatka.

⁴ Annautiŋagaaŋa tuqqunmiñ niaquġusikłuŋa nakuaqqunmiglu nagliktuunmiglu.

⁵ Ilaata immiġaġigaa iñuggutiga nakuuruanik, nutauruatun suaŋŋasiġmivḷuŋa tiŋmiaqpaktun.

⁶ Atanġum ikayuġuugaich iluaqtuakun nagliksaaqtitauruat aŋalalluataqługich nalaunŋaruakun.

⁷ Iḷitchuġipkaŋagaa Moses sivunniuġutimiñik suli iñuŋich Israel qiñiqtiłługich kamanaqtuanik savaamiñik.

⁸ Ataniq nagliktauruq, suli piqpaksriruq, qinnalitchiġiił̣ł̣uni suli nakuaqqutiqpaqaqłuni.

⁹ Pasiuqłiḷaitchuq ataramik; ilaasuli qinnautiqalaitchuq taimuŋa.

¹⁰ Tatavsaiḷaitchuq tatavsausiaksrakkaluaptignik naakkaunnii akisalaitchuq nalliġḷugich pigiiḷḷiqiavut.

¹¹ Qutchigñiŋatun qiḷaum nunamiñ, tainnatun uvva kamanaqtigiruq nakuaqqutaa qiksiksraqtuanun ilaanik.

¹² Uŋasiksilaaŋatun tatqavaŋŋamiñ taavuŋanmun tainnatun piiŋagaich piḷuutivut uvaptigniñ.

¹³ Aapatun nagliksraqtuatun miqłiqtumiñik, tainnaptauq Ataniq nagliksrautiqaġmiuq qiksiksrautiqaqtuanun ilaanik.

¹⁴ Ilaata sumik piḷiagutilaaptinnik iḷisimagaatigut; Itqaumaruq nunaviñiutilaaptinnik.

¹⁵ Uvagut aasii iñuusiqput ivigaatun ittuq. Iñuguġaqtugut nautchiatun naulluataqtuatun;

¹⁶ tavraasii anuġim tiŋinmauŋ qiñiġnatqiḷaitchuq— taututqiyuitkaat.

¹⁷ Aglaan Ataniġmik qiksiksraqtuanun, nakuaqqutaa inniaqtuq isuksraiḷaamun, aasii suli ilaata iluaqtuaguniŋa taimuŋaaglaan illuni kiŋuniġiiksuaguruanun

¹⁸ iliŋiññun iḷumutuuqłutiŋ kamaksriruanun sivunniuġutaanik suli ataramik kamaksrivḷutiŋ ilaata piraksriutiŋiññik.

¹⁹ Atanġum inillaŋagaa aquppiutaqpani qiḷaŋmi; suli umialgutaa aŋalatchiruq supayauranik.

²⁰ Nanġaqsiuŋ Ataniq, suaŋŋatiqaqtuasii isaġulgich, kamaksriugaqtuasii piraksriutiŋiññik, naalaġnivḷusi uqaluanik.

²¹ Nanġaqsiuŋ Ataniq, iluqasi qiḷaŋmiuguruasii, kivgauruasii ilaanun, savaktuaqługu ilaata pisuutaa!

²² Nanġaqsiuŋ Ataniq, savaapayaaguŋaruasii sumipayaaq atanniqsimaraŋiññi. Nanġaġli Ataniq, iḷitqusimaaŋ!