Psalms 102 - Iñupiatun Mumiksat Uqalugiksuat

Aŋaiyyutaa Isumaaluktuam Nutaqqam

Aŋaiyyutaa piḷaiqsuam nagliksautimiñik quliaqtuqługi isumaaluutini Ataniġmun.

¹ Naalaġniuŋ aŋaiyyutiga, Atanġuruatiin, suli tusaalugu ikayuquvluŋa qirratiga.

² Isumaaluunmun tikitkuma, tununniaġnaŋa! Naalaġniŋŋa, ququulaguma qilamik kiunasuaġluŋa!

³ Uvluksrautitka nuŋusaiññaqtut avyutun; saunitka ikualaruatun iḷirut.

⁴ Irrusiġa iḷiruq pannaqłuktatun ivigaatun; Kayumigiŋaipiallakkitka niqit.

⁵ Nipatuvluŋa iiqtualiqsuŋa; Sauniłhiñaġullaktuŋa.

⁶ Ukpiktun nunagluktuamiittuatun iḷiruŋa, ukpiktun iniġruaniittuatun.

⁷ Itqumaugaqłuŋa nalaraqtuŋa; tiŋmiaġruuratun kisimġiuqtuatun iḷiruŋa iglum qaaŋani.

⁸ Uvluqtutilaaŋatun akiḷḷiima kipagiraġigaanŋa; kipagirigma atiġa uqamaqłuktautigivlugu.

^9-10 Aġranik niqiqaġaqtuŋa, qulvitkalu iḷḷatiraqtut imiqtamnun, Pisigivlugu qinnautiqpaiñ, Ilvich kiviqqaaqłuŋa iginmiraġigiŋma.

¹¹ Iñuusiġa ittuq anaqaksraġman tanuġaaksiruatun; Tuquliruŋa ivigaatun panaqłuktatun.

¹² Aglaan ilvich Ataniiq, umialguniaqtutin taimuŋaaglaan; iluqaġmiŋ kiŋuniġiiksuat itqaumaniaġaatin.

¹³ Makinniaqtutin aasii nagligilugu Zion; Nagliginaqsiruq; Tavra piviksraq nalautittuq.

¹⁴ Kivgaġiraqpich piqpagigaa, suksraunġiqsauŋagaluaqtillugu; nagligiraġigaat, siqumitauŋagaluaqtillugu.

¹⁵ Tavraasii nunaqpauruat qiksiginiaġaat Ataniq; umialipayaat nunami qutchiksuaġiniaġaat kamanautaa.

¹⁶ Atanġum nappatqikpagu Zion, niptaġniaqtuq qaumaniqaġluni.

¹⁷ Ilaata tusaaniaġaa aŋaiyyutaat piiḷḷiuqtuaguruat, suli naalaġniḷugu aŋaiyyutaat.

¹⁸ Aglagiñ kiŋunġuniaqtuanun qanuq Ataniq savaŋatilaaŋanik, iñuich aniŋaitkaluaqtuat unnii nanġaġuuyumagaat.

¹⁹ Ataniq anmun qiñiŋaruq qutchiksuamiñ salumaruamiñ inimiñiñ, qiḷaŋmiñ anmun qiñiŋagaa nuna.

²⁰ Tusaaŋagaich iiqtuaqtuat tigutaaqtat aasii atanġiqsaupkaqługich tuquraksriakkaluat.

²¹ Aasii ilaan atqa nivliusiġiniaġaat Zion-mi, suli nanġaqtauluni ilaa Jerusalem-mi

²² nunaqpauruat umialgutiqaqtuallu katitpata aasii nanġaġlugu Ataniq.

²³ Iñuunimni suaŋŋatiga piiŋagaa; tainnamik sivikłiḷaaŋagaa iñuggutiga.

²⁴ God-auruatiin, aullautinaŋa paŋmami utuqqanaaġuŋaiñŋaġma. Atanġuruatiin, ukiutin inniaqtut kiŋuvaaksranuntaimuŋa isuitchuamun;

²⁵ Iŋiḷġaan inillaŋagitin maŋŋuŋich nunam, suli ilvich argagnik savaŋagitin qiḷaich.

²⁶ Piiġñiaqtut, aglaan ilvich inniaqtutin; iluqaġmiŋ nuŋuniaqtut annuġaatun maquliruatun. Simmausiġñiaġitin annuġaatqiksuatun, maquliŋaruat aasii igitauniaqtut.

²⁷ Aglaan ilvich allaŋŋuqtalaitchutin, suli ukiutin isuksraqaġumiñaitchut.

²⁸ Miqłiqtuŋisa kivgaqpich nayuġniaġaatin; aasii kiŋuvaaŋich nayuutiniaqtut iligni.