Psalms 10 - Iñupiatun Mumiksat Uqalugiksuat

Aŋaiyyun Pitqiksiġautairrutiksraqaquriruamun

¹ Summan imña uŋasiksiqpakpich, Ataniiq? Summan iriġuuvich iluiḷḷiuliqapta?

² Piḷuktuat arguaŋaaqhutiŋ nagriaġinniktut iḷiappauruanik; iliŋiññun pimaqłuutaupkaġuŋ taamna savaaŋat.

³ Piḷuktuam arguaŋŋatigigaich piyumisuutipałłuni; piḷḷaturuam uqamaqłuutisuugaa ayyaktuqługulu Ataniq.

⁴ Piḷuktuaq suunnaqaŋitchuq Ataniġmik; Arguaŋŋanmigni God isummatigisuugaat suunnauŋitchuaġivlugu.

⁵ Piḷuktuaq suqaġupayaaqami suqallaruq. Kaŋiqsiḷaitchuq aglaan God isivġiisiŋiññik; suuŋiḷaġisuugai iqsuktaġvigivlugich akiḷḷiitiŋ.

⁶ Uqaġaqtut inmignun, “Itigaurraġumiñaitchugut; iluiḷḷiuqtitauyumiñaitchugullu.”

⁷ Uqaġuurut uqamaqłuktalgutilaaqhutiŋ, sagluuqhutiŋ, sivuuġasaaqłiqsuaqhutiglu; uqallayaruq uumisuutinik, uqamaqłuutiniglu.

⁸ Iriqsimaraqtut nunaaqqiñi, iñuaġuum utaqqivḷugich iñuich suŋiḷaat. Nikpaqtuaqługich inmignik sapunniaġumiñaitchuat;

⁹ Utaqqiuġaqtut iriġaqtuqhutiŋ iriqsimaruatun laiyaaluktun. Nikpaġaġigaich iḷiappauruat; qargisaqqaaqługich aasii kalikataaqsivlugich aullautivlugich.

¹⁰ Qanuqsaġviitchuat nallaġutiraqtut qanuġviiqhutiŋ; piaqłuktautaisa suaŋaruat akiisinmatiŋ.

¹¹ Piḷuktuat inmigni isumaraqtut, “God-im suunnaġiŋiñmirai! Siqunġiŋaruq pamma tautukkumiñaitkaaŋa!”

¹² Ataniiq, tatavsakkich makua piḷuusiqirit! Puiguġniaġnagich tamatkua nagliksaaqtuat!

¹³ Qanuqhutikkiaq piḷuktuat suuŋiḷaġisuuvarruŋ qaniġmignik God uqautivlutiŋ inmignun, “Ilaan tatavsaġniaŋitpaŋa”?

¹⁴ Aglaan Ilvich qiñiġuupiaqtutin; isumalaaġutigisuugitin iluiḷḷiuġutit nagliksautillu itqanaitchuummiutin ikayuiyumavlutin. Ikayuyuitchuat inmignik qaitchuurut Ilignun; Ilvich-kii ikayuqtuaġuuvlugich aapaiŋaruat.

¹⁵ Navgukkich talliŋich piḷuktuat piaġiitchuallu iñuich; tatavsaġlugich piaġiirrutaisigun tainna piḷḷaiġataqtillugich.

¹⁶ Ataniq-kii umialguruq taimuŋa isuksraiḷaamun. Tamatkua nanġairuat allanik god-inik tammaġniaqtut maaŋŋa nunamigniñ.

¹⁷ Naalagniaġitin Ataniiq, aŋaiyyutaich piuniaŋitchuat; qapiŋaivsaaqtillugiḷḷu.

¹⁸ Tusaalugich ququullataich nagliksaaqtuat aŋayuqaagitchuallu; isivġiutigni iviġaglugich, makua iñugruiññat tatamaalatchiugaŋaiġumagaich.