Proverbs 9 - Iñupiatun Mumiksat Uqalugiksuat

Isumattullu Isumalluaġiirullu

¹ Isumattutim nappaŋagaa igluni aasii tallimat malġugnik ayaliqł̣ugu.

² Tuqutitchiŋaruq niġrunmik niqinaqutiksramik, suli iḷauqługu wine, aasii niġġiviich itqanaiqł̣ugich.

³ Isumattutim aullaqtinŋagaich aġnat kivgani aiyugaaqłiquvlugich qutchigñiqsraniñ tavrani inimi inna:

⁴ “Isiġitchi, isumalluaġiitchuasii iñuich!” Isumatuitchuanun uqallaktuq,

⁵ “Qaiñ, niġikkich niqautitka suli imiġlugu wine iḷauŋaraġa.

⁶ Uniḷḷugich isumalluaġiitchuat iñuich, aasii iñuulusi. Maliġuaġlugu iḷisimman.”

⁷ Natqiksruġupkich kamanniraaġuuruat iñuich, pisaaŋatchiqsiññaġniaqtutin. Suakkupkich pigiiḷḷiqiruat iñuich, anniaqtausiññaġniaqtutin.

⁸ Natqiksruġnagich kamanniraalguruat iñuich; uumigisiññaġniaġaatin. Aglaan natqiksruġupkich isumaturuat, qiksiginiaġaatin.

⁹ Sumigliqaa uqautigupkich isumaturuat isumatusivsaaġniaġaich. Sumigliqaa uqautigupkich nalaunŋarualiqiruat iḷḷatiniaqtuq iḷisimmataannun.

¹⁰ Qiksiksrautiqaġniq Ataniġmun aullaqisaaguruq isumattunmun. Iḷisimagupku Salumaruaq Ilaa, kaŋiqsimmatiqaqtutin.

¹¹ Isumattutim iñuuniqtusivsaaġniaġaatin.

¹² Ilvich tavra ikayuusiaqaġniaqtutin isumatuguvich, aasii asivaġupku, ilvich tavra nagliksaaġutiginiaġiñ.

¹³ Aġnaq isumalluaġiitchuaq inna ittuq: nipaturuq, naluruq, kanŋuitchuġlu.

¹⁴ Aquppisuuruq paaŋani igluŋmi naagga qutchigñiqsraŋani iniqpaum,

¹⁵ aasii ququulavlugich iñuich saniġatquttuat, inmiktuiññaq iglauruat:

¹⁶ “Isiġitchi, isumalluaġiitchuasii iñuich!” Isumatuitchuanun uqallaktuq.

¹⁷ “Tigliktaq imiq siiġñalaaqtuq. Tigliktaq punniq tivraġił̣haaqtuq.”

¹⁸ Aglaan nalurut tuquŋaruat tavraniitilaaŋiññik, aasii aiyugaaqtaŋit itiniqtapiaġatami iniŋanni tuquŋaruat ittut.