Proverbs 7 - Iñupiatun Mumiksat Uqalugiksuat

¹ Miqłiqtuuŋ, itqaumalugich uqalutka suli piññaġilugich iliŋnun tiliuġutitka.

² Kamagiluŋa, aasii iñuuniaqtutin. Qaunakłaaġutin maliġuallaisa iḷisaurrutitka irrakiñ qaunagimmaġiksaaġmatun.

³ Iḷisaurrutitka nimmaaługich argagnun; agliutilugich uummatignun.

⁴ Aŋalallugu isumattun aniqatiktun, suli kaŋiqsiumatiqaqtuatun avilaitqatilluataqtun.

⁵ Piisiññiaġaatin aġnaniñ allatuqtuaniñ, ikł̣igusaaġutinik uqaluligniñ.

Allatuqti Aġnaq

⁶ Iḷaanni itchuaqtuqtuami igalaurakun iglumni,

⁷ aasii tautuŋaruŋa nukatpianik iñuuniaġniġmik iḷisimapiaŋitchuanik, aglaan iḷaŋat nalunaił̣haaġniqsuq asiḷiqiruaq.

⁸ Pisuaġniqsuq apqunmi qaniŋani aġnam iñuuniaġviata. Saniġatqunniġaa aġnam iglua

⁹ unnuksraaqtuami taaqsianiŋaruami.

¹⁰ Aasii aġnam kasuġniġaa; annuġaaqaġniqsuq akiitchutun suli isummianiŋavluni.

¹¹ Taamna aġnaq taluqsraiñŋaruq suli kanŋusuutaitchuq pisuaġaġikami apqutini

¹² naaggaunnii utaqqikami apqutit kaŋiġalluŋanni, iḷaanni apqunmi, iḷaanni iñuich katirvianni sumiliqaa.

¹³ Iqiviñaŋagaa nukatpiaq, kunikługu, kanŋuighuni qiñiŋagaa aasii uqallaghuni,

¹⁴ “Uvlupak aitchuiruaŋa aasii niqautiqaqtuŋa ikipkaamniñ.

¹⁵ Tavraasii aniruaŋaa ivaġiaqłutin. Paqitchuktaqpiñ, aasii uvva tavraniittutin!

¹⁶ Tuŋiusiuŋaruŋa qiññaġiksuanik kalikunik Egypt-miŋŋaqtanik.

¹⁷ Tivraġiksaŋagitka tivraġiksautinik myrrh-mik, aloes-nik, suli cinnamon-mik.

¹⁸ Qaiñ! Siñiqatigiigiaġluk unnuapak. Quviasugniaqtuguk atautchimiinniptigni.

¹⁹ Tuvaaqatiga aimmiŋitchuq; uŋasiksuamun aullaŋaruq.

²⁰ Maniligaapaluŋaruq utiġniaŋił̣ł̣uni malġuugni savaiññigni.”

²¹ Piyumisaaŋagaa uqalugmigun aasii uqayutiłłuni.

²² Tavrauvvaa maliksauraŋagaa qimuktitun tuqutauyyaqsaqtuatun, qunŋitun qargisaunmuktuqtuatun

²³ tavrani pisiksim qaġruata kapiniaġmigaa uummataa. Qupałuuratun inŋaruq matutamun tiŋmiruatun—naluŋaruq iñuggutini navianniuqtilaaŋanik.

²⁴ Tavraasii, iġñiġutiimaaŋ, naalaġnisiñŋa. Naalaktuaqsigik uqalutka.

²⁵ Tainnasimun aġnamun qaiññak; maliksugnagu.

²⁶ Maqutchiŋaruq iñugiaktuanik aŋutinik suli patchisauvluni tuqutaummata kisiñaitchuat iñugiakłutik.

²⁷ Igluanukkuvich, tavra iglaurutin tuqquŋaruat irviannun. Sivikitchuq tuqunmun.