Proverbs 6 - Iñupiatun Mumiksat Uqalugiksuat

Kiliktuutivsaat

¹ Miqłiqtuuŋ, unniqsuqłiiŋavich qaunaginiaġnivḷugich allam iñuum akiiḷaŋich?

² Piraġipkaŋavich uqalukkun, ilvich unniqsuqłiisiakkun?

³ Tavraasii, miqłiqtuuŋ, taavsruma iñuum suaŋŋataaniittutin, aglaan inna piiġumiñaqtutin: qilamik ullaglugu, aasii katchuŋaiḷḷutin apiqsruġlugu pilitqulutin.

⁴ Siqunak naaggaunnii nutqaġutin piḷaiŋaiqsiaġnak.

⁵ Naktinŋaŋaiġiñ qupałuktun naagga tuttutun qimaktuatun aŋuniaqtimiñ.

⁶ Iqiasuuturuat iḷisaqtuksraugaluaqtut iñuusiŋanniñ kiktuqsraligniñ.

⁷ Aullarraitchut, umialgitchut, naagga aŋalataitchut,

⁸ aglaan tutquqtuisuurut niqinik upinġaami, itqanaiyautivlugu ukiuksraq.

⁹ Qanutun imña iqiasuuruaq nalaqhiksuaġniaqpa? Qakuguuna makinniaqpa?

¹⁰ “Siqutqił̣auraġniaqtuŋa,” ilaa uqallaktuq; “Imulugich argatka aasii piḷaiŋaiqsiallagluŋa.”

¹¹ Aglaan siñiktillugu, piiḷḷiuġnam tikiññiaġaa satkuliktun tigligayuktitun.

¹² Iñupałłuich, piḷuusiqirit kukiḷugniaqtut sagluuġutik.

¹³ Iriŋmigaqhutiglu, aulałługiḷḷu isigaktiŋ, naakka tikkuaqtuġhutiglu sagluqisukhutin,

¹⁴ tainnasiġallaġmik sivunniuqtut pimakłuutiksramignik isumamigni, iluitchuamik siamitchivḷutik.

¹⁵ Tainnaġmata tavra iluitpaktuam tikiññiaġai tavraŋŋatchiaq, aasii iluaqsiyumiñaighutiŋ iñuuniqtutilaamiktun.

^16-19 Tallimat malġuurut Atanġum uumigipiallaktaŋich suli akuqtuaġiyumiñaitchaŋich: piġuqtiġhuni ilimiñik qiññaġmiñi, sagluturuaq qaniq, argaich tuquġairuaq patchisaitchuanik iñugnik, isumami sivunniuġniq pigiitchuanik, isigaich piḷuktualiqiyyaqsauraqtuat, qiñiqqaaqhuni quliaqtuaqtuaq sagluutqigaaqhuni, suli maqutchiñiq avilaitqatigiiksuanik.

Siḷġiqsuutit Allatuġnikun

²⁰ Iñuuŋ, kamagilugu aapan suli piiguġnagich aakakpich iḷisaurrutiŋich.

²¹ Uqaluŋich iliŋnun piiguġnagich, uummatiġmiutaġilugich.

²² Iḷisaurrutaisa aullatiniaġaatin iglauguvich, qaunagilutin unnuami, suli siḷġiqsuġutin uvlumi.

²³ Iḷisaurrutiŋich naniqtun ittut; natqiksruutiŋisa iḷisautiniaġaatin qanuq iñuuniaġniġmik.

²⁴ Piḷuktuaniñ aġnaniñ piisinniaġaatin, uqaluŋiññiñ ikłiguqsaaġutauruaniñ allat aŋutit tuvaaqatiŋiññiñ.

²⁵ Piyumitchaktaunak aġnaġigñilugich; akiiḷipkaġnak iriŋmigaqpatin.

²⁶ Aŋun akiḷiiḷuni akiitchumik akiŋatun punniġum, aglaan allatuqpan suġauttapayaaġiqsauniaqtuq.

²⁷ Tigumiaġumiñaqpiuŋ igniq satqagni ikigaluaġnagich annuġaatin?

²⁸ Pisuaġumiñaqpich ikumaruani aluani uutiqtitkaluaġnagich isigaktin?

²⁹ Tainnatuttauq anayanaqtigimmiuq siñiqatiqaġniaqtuni allam aŋutim tuvaaqataanik. Kiñaliqaa tainna piruaq nagliksaaġniaqtuq.

³⁰ Iñuich uumigiliyuitkaat tigligayukti tiglikpan niqimik qanukkii kaaktuq;

³¹ tavraaglaan aŋupkaqpan, utiqtitchiruksrauruq tallimat malġuiqsuaġlugu (7x)—ataullugich suġauttapayaani.

³² Aglaan aŋun allatuqtuaq isumatuipiallaktuq. Inmiñun maqusiññaqtuq.

³³ Suuŋiḷaġiliġñiaġaat suli piyuglugu; isuitchuamun kanŋunaqsirauniaqtuq.

³⁴ Qinnałhamaayuitchuq uiguruaq qinnagniġmiñiñ saŋiakłuni; akisaġumaniŋa isuksraitchuq.

³⁵ Akuqtuġniaŋitchuq akiḷiutikkaluanik; qanutun aitchuġaluaqpanni sunik qinnaŋaiġñiaŋitchuq.