Proverbs 5 - Iñupiatun Mumiksat Uqalugiksuat

Siḷġiqsuutit Allatuġnikun

¹ Miqłiqtuuŋ, nipuŋaitchiñ naalaġniḷutillu isumattutimnun suli kaŋiqsimmatimnun.

² Aasii iḷisimalutin qanuq iluatun iñuuniaqtilaaġnik, suli uqaluktin iḷisimanaġniaqtut iḷitchiŋatilaaġnik.

³ Qaqłuuk alatuqtuam aġnam kutittuq honey-tun suli uqaluŋa piaktuq olive uqsruŋatun,

⁴ aglaan aquani, unitchiñiaġaatin uumiḷuqruunmik anniġñaunmiglu.

⁵ Anmuutiniaġaatin nunaŋanun tuquŋaruat; pisuaġviŋa apqutauruq tuqqunmun.

⁶ Iglauŋitchuq apqutikun iñuggunmun; aglaan sugnamulliqaaqtuq suli naluruq suliqitilaamiñik.

⁷ Naalaġnisiñŋa, iġñiġuruasii, suli piiguġnasi uqalumnik.

⁸ Tainnasimiñ aġnamiñ nayuutinak! Qalliñaguunnii igluata upkuaŋa!

⁹ Tainna piguvich, allat piññaqtaaġiniaġaat nanġausiaq pikkaluan aasii tuquniaġtutin nutaġaulutin argaŋiññin nagliksraitchuaniñ.

¹⁰ Ii, naluraqpich suġauttaiġñiaġaatin, aasii savaaġiqpaŋaratin allat piginiaġai.

¹¹ Nalaniaqtutin nagliqsaaġutin tuquaqsiguvich, timiñ auluni,

¹² aasii uqallagniaqtutin, “Summan imña iḷitchiŋaitpik? Summan imña iluaqsruqtinŋaitchuami?

¹³ Naalaġnisuŋił̣ł̣ugi iḷisaurritka. Suliqutigiŋaitkitka.

¹⁴ Tavraŋŋatchiaqaasiuvva kanŋunaqtuamiitkaqsivḷuŋa iñuich saaŋanni.”

¹⁵ Iviġagilugu kisian nulian imiqsraġmatun imiġmik nivviagniñ.

¹⁶ Suli kuuġuluuratun innak sumin kiñaliqaa aġnaq imiġuuminaqtuaq.

¹⁷ Munaġilutin ilignik nuliagnun suli nallaqasiġnak allanik aġnanik.

¹⁸ Tavraasii quviasuuttaġiuŋ tuvaaqatin suli quviagilugu aġnaq tuvaaqasiutiran—

¹⁹ aġnaġiksuaġlu pił̣ł̣aktaŋitchuaġlu. Ilaan quviasuktinniaġaatin; avallutin nakuaqqutimiñik.

²⁰ Iġñiiŋ, summan alla aġnaq nakuaġiniaqpiuŋ? Summan piyumaginiaqpiuŋ allam aŋutim tuvaaqataa?

²¹ Atanġum qiñiġaa iñuk suliqipayaaġman. Sumupayaaġman qiñiqtuaġaa.

²² Piḷuutiŋich pigiiliqiruam naniġiagurut. Kuvraqtittuatun ittut piḷuusiqiamiġnun.

²³ Tuqusuurut qanukkii inmignun qaunakłaaŋitchut. Iliŋisa qaunakłaaŋiññiŋisa maqunniaġaich.