Proverbs 4 - Iñupiatun Mumiksat Uqalugiksuat

Ikayuusiat Isumattutikun

¹ Miqłiqtuuŋ, naalaġnikkich aapakpich iḷisaurrutiŋich. Naalaktualluataġiñ, aasii kaŋiqsisiiññaġniaqtutin.

² Iḷisaurrutitka nakuurut, tavraasii itqaumasaġitin.

³ Nukatpiaġruuraukama, aŋayuqaagma iġñitualuŋak,

⁴ aapaa iḷisautiraġigaaŋa. Uqallaguuruq, “Itqaumalugich uqalutka suli piiguġnagich. Kamagiluŋa, aasii iñuuniaqtutin.

⁵ Isumatulutillu kaŋiqsimmatiqaġlutillu! Piiguġnagiḷḷu suliqutigiŋiññagiḷḷu uqalutka.

⁶ Suksraaġnagu isumattun, aasii qaunaginiaġaatin; piqpagilugu, aasii annausimaaġniaġaatin.

⁷ Isumatusiñiq nuimapiaġataqtuq. Sunnagniaġuvich kaŋiqsisiqaġiñ.

⁸ Piqpagiuŋ isumattutiqaġniq, aasii ikayuġniaġaatin. Iqimmaaġlugu aasii nanġautiqaqtinniaġaatin.

⁹ Niaquġutchiqsatun kamanaqtuamik itinniaġaatin.”

Iłuaqtuaġlu Iłuaŋitchuaġlu Apqutik

¹⁰ Naalaġniŋŋa, miqłiqtuuŋ. Kamagilugi uqalutka, aasii iñuuniqtuniaqtutin.

¹¹ Iḷisautiŋagikpiñ isumattutikuaġniġmik iluaqtuakuaġniġmiglu.

¹² Sapukutaqaġniaŋitchutin pisuaġuvich isumatulutin, suli putukkisaġniaŋitchutin aqpatkuvich.

¹³ Itqaumalugich iḷisaatin. Iḷisaġniġiñ iñuggutiginiaġiñ—qaunagilluataġlugu.

¹⁴ Malignagi iñuich pigiitchualiqirit. Pitqusiŋat tuvraġnagu iñumaqłuich.

¹⁵ Naumipiaġataq! Piḷuktuamugnak! Ayyaktuġuŋ aasii uniḷḷugu.

¹⁶ Pigiiḷiqirauruat iñuich siqulaitchut sumik piḷuktuamik piŋaiñŋaġmik. Itqumasuurut anniġñiŋisuaġamik.

¹⁷ Pigiiḷḷiqiniġlu pimaqłuktaġniġlu arriqaqtuk niqigiruatun imiġiruatullu iliŋiññun.

¹⁸ Apqutaat nalauŋarauruat igliġviŋat siqiñiq nuivaalluktuatun ittuq, qaummaġiksisiiññaqłuni uvluġataqtillugu.

¹⁹ Aglaan apqutaat pigiiḷḷiqirauruat taaqtuq unnuatun. Puukaġamik tautuyuitkaat putukkisautiktiŋ.

²⁰ Miqłiqtuuŋ, naalaġnikkich uqalutka. Naalaġnimmaġiksaaġutin.

²¹ Piiguġnagich suuramikunnii. Itqaumakkich suli uummatiġmiutaġlugich.

²² Taapkua iñuggutiqaqtinniaġaalu timiŋalu iluaqtillugu kaŋiqsiruaq taapkuniŋa.

²³ Supayauratigun qaunagilluataġlugu ummatin; qanukkii kaŋiŋa maqiruq iñugunmun.

²⁴ Uqallagnak suuramikunnii iḷumun inŋitchuamik. Suliqutiginagich sagluuġutillu asiñuurriñiaqtuallu uqaluich.

²⁵ Sivunmun qiñiġutin nalupqisuutaiḷḷutin; nalaaġipiallaglugu igliġniġiñ sivugni.

²⁶ Sivunniuġuvich qaunakłaaġlutin, aasii supayaaġuvich iluaġniaqtuq.

²⁷ Saniġatqullugu pigiitchuaq aasii sivunmun pisuaġutin. Atautchimik unnii avluġnak saniġaagun iluaqtuam.