Proverbs 31 - Iñupiatun Mumiksat Uqalugiksuat

Siḷġiqsruutit Umialigmun

¹ Uvva ukua uqaluich Umialguruam Lemuel aakaŋata qaitchaŋich ilaanun:

² “Ilvich iġñiġigikpiñ piqpagnaqtuatiin, kiggutauruatiin aŋaayyutimnun. Sumik uqallautiniaqpigiñ?

³ Suaŋŋatin iluqaan atuġnagu aġnaqtuġutin naagga iluqaan maniiñ atuġlugu aġnanun; maqutchiŋarut umialignik.

⁴ Naalaġniiñ, Lemuel— Umialguruat imiqtuksrauŋitchut wine-mik naagga taaŋŋaqtuġuksiulutik.

⁵ Taaŋŋaġamik piiguġuugaich pitqurat aasii suli iñuich piiḷḷiuqtuat piiguqługich.

⁶ Taaŋŋaq una imiksrautaat iñuich tuquniugaqtuat, iñuich qanuqsausiiqsuat.

⁷ Iliŋich taaŋŋaġlich aasii piiguġlugich piiḷḷiuġniqtiglu quviasuutaiññiqtiglu.

⁸ Uqaqtaugguiñ iñugnun inmignik piyumiñaitchuanun. Qaunagilugi atunim pigiraksraŋi ikayuġuminaitchuat inmignun.

⁹ Uqaqtaugguiñ iliŋiññun suli iluaqtuakun isivġiiraugguiñ. Qaunagilugi atunim pigiraksraŋi iliappaiḷḷu piiḷḷiuqtuallu.”

Sunigliqaa Surġallavluni Nuliaguruaq

¹⁰ Qanutun siġġaġnaqtigiva paqinniaġniq supayaamik suraġallaruamik nuliaksramik! Ilaa akisułhaaqtuq uyaġagiksuaniñ!

¹¹ Uiŋata nalupqigiŋitkaa sullatilaaŋanik, tavraasii susuksiuyumiñaitchuq.

¹² Iñuuniqtutilaaŋatun nuliaŋata aŋalatkaa uiñi iluatun suli anniaŋitkaa.

¹³ Aptatigiraġigai savaaġivlugi kalikuliaksrat.

¹⁴ Aggisuurrivḷuni niqinik uŋasiksuaniñ, maniññagniaqtit umiaqpaŋisitun.

¹⁵ Makittaqtuq uvluŋaiñŋaan unnii niqiksriuġukługi iḷani suli aġnat savaktini savaaksraŋiññik uqautisukługi.

¹⁶ Naliġakługu nuna tauqsiaġiraġigaa, aasii maniññaktaamiñik nautchiivḷuni siiġñaksranik.

¹⁷ Savvaqturuq, saŋŋiruq suli iqaitchuq.

¹⁸ Iḷisimagai savaaġmi akisutilaaŋat, suli savagaqtuq unnuamunaglaan.

¹⁹ Ilimiñik ivaluliuġuuruq kalikuliuqłuniḷu.

²⁰ Sigñatisuitkaich piiḷḷiuqtuallu suqaġuksiuruallu.

²¹ Isumaaluyuitchuq qannigman, qanukkii iḷaŋich niġummaaktuanik annuġaaqaqtut.

²² Tuŋiutit qaliġualiuġuugai suli annuġaaġiguuruq tigluuraaqtaanik ukiłhaagiksuanik.

²³ Tuvaaqataa iñuich iḷisimagaat, aullarriñun iḷauvluni.

²⁴ Annuġarriuġuuruq tavsiksraniglu, aasii tunivḷugi tauqsiġñiaqtinun.

²⁵ Tuniqturuq suli iñuich qiksigigaat suli sivuuġagiŋitkaa tikitchaġiaq.

²⁶ Uqaġami pił̣ł̣aktautaitchuq suli isumaturuq.

²⁷ Aptaŋaiyuitchuq suli iḷani qaunagisuugaich suqaqtuksraummata.

²⁸ Miqłiqtuŋisa quyyatiktik iḷisimapkaġaat, suli tuvaaqataata nanġaġuugaa.

²⁹ Inna uqallakłuni, “Iñugiaktuat aġnat tuvaaqataulluatausuurut, aglaan ilvich nakuuniqsraurutin iliŋiññiñ.”

³⁰ Pisuqsaaġniq iḷumun inŋitchuq suli qiññaġigñiq piiġuuruq, aglaan aġnaq qiksiksraqtuaq Ataniġmik nanġaaksrauruq.

³¹ Iḷisimanaqtilli savaapayaaŋisigun. Qiksigirauruksrauruq iñupayaaniñ.