Proverbs 3 - Iñupiatun Mumiksat Uqalugiksuat

Siḷġiqsuutit Nutaġanun

¹ Miqłiqtuuŋ, piiguġnak iḷisaurrutimnik iliŋnun. Itqaumalugich tiliuġutitka.

² Iḷisaurrutigma iñuusugruktinniaġaatin iluqaapiallaglutillu.

³ Pilitchaanagik nakuaqqutillu iḷumutuuġñiġiḷḷu. Qiḷiġlugik quŋusiġñun; agliutikkich uumatignun.

⁴ Tainna piguvich God-ivlu iñuiḷḷu iviġaumaginiaġaatin.

⁵ Ukpiqqutiqaġiñ Ataniġmun iluqaaġlugu uummatin. Makittatiginagu ilvich isumagni kaŋiqsimmatignun.

⁶ Maliġuaġlugu Atanġum pisuutaa suliqipayauraġuvich, aasii ilaan iḷisimapkaġniaġaatin iluaqtuamik igliġviksraġnik.

⁷ Isummatiginak iliŋnun isumatuniḷutin; qiksigilugu Ataniq suli killuuruanik pisuŋiḷḷutin.

⁸ Tainna piguvich, nalauttuatun marasitun inniaqtuq, mamillugich kiḷitin suli anniġñautaiġutin.

⁹ Nanġaġuŋ Ataniq aitchuusiuġlugu nakuuniqsranik nunagniñ nauruanik.

¹⁰ Tainna piguvich, suġalliqpiktin siḷipkauraġniaqtut suli wine-gutitin siḷipkauraġniaġmiut.

¹¹ Miqłiqtuuŋ, Atanġum natqiksruqpatin, naalaġniŋiññagu suli akuqtuumalugu.

¹² Atanġum natqiksruġuugaich nakuaġirani, aŋayuqaaguruaktun natqiksruiruaktun miqłiqtumignik nakuaġivlugu.

¹³ Quviasugaqtuq kiñaliqaa isumatusiruaq—puttuqsrisiñiktuaglu.

¹⁴ Akisułhaaqtuq unnii qatiqtuamiñ manigmiñ; umiallałhaaġniaġaatin kaviqsuamiñ manigmiñ.

¹⁵ Isumattun akisułhaaqtuq piññaġnaqtuaniñ uyaġagniñ; sumun pigisukkaluaqtaġnun nalliummatiŋitchuq.

¹⁶ Isumattutim iñuulgupkaġniaġaatin, susuksiupkaŋiḷḷutillu kamanautiqaqtillutillu.

¹⁷ Isumattutim iñuusiñ quvianaktiniaġaa apqutiksraŋiḷu tutqigñiatut.

¹⁸ Tamatkua isumatusiruat quviasuguurut; isumattutim iñuggutiqaqtinniaġai.

¹⁹ Atanġum nuna savaŋagaa isumattunmigun; iḷisimmatimigun siḷa iḷiŋagaa.

²⁰ Isumattutaata kuugich igliqtinŋagaich suli nuviyat sialullasivḷugich nunamun.

²¹ Miqłiqtuuŋ, isumatuŋaiġñaglu kaŋiqsimmataiġñaglu. Iligniñ piiqtinnagik.

²² Iñuusiqaqtinniaġaatin tutqigñaqtuamik suli quvianaqtuamik.

²³ Igliġniaqtutin navianaitchuakun naagga putukkisautaiḷḷutin.

²⁴ Iqsiñiaŋitchutin tuttaaġuvich, suli siñigluataġutin unnuapak.

²⁵ Isumaaluutiqaġniaŋitchutin tavraŋŋatchiaq pimaqłuutinik, tikisaaġuuruanik pigiiḷḷiqirauruanun anuġiqłuktun.

²⁶ Atanġum qaunaginiaġaatin. Kataktinniaŋitkaatin naniġiamun.

²⁷ Piyumiñapayauraġuvich, aŋalalluatakkich ikayuaksrat.

²⁸ Uqallautinagi siḷalliitin utaqqitqulugi uvlaakumun ikayuġumiñaġupki akkupak.

²⁹ Sivunniuġnak anniutauniaqtuamik siḷalliġñun; qanigni iñuuniaqtut, ukpiġivlutin.

³⁰ Qapiqsaiḷiñagi allat patchisaiḷḷutin qanuq unnii anniŋaiñmatin.

³¹ Tusunagich pimaqłuktayuktuat naaggaunnii tuvraġlugich,

³² qanukkii Atanġum uumigigaich iñuich piḷuktualiqiruat, aglaan iluaqtuakuaqtuat ukpiġigaich.

³³ Atanġum piaġiiḷḷiuqtitkai aimaaġviŋi pigiitchualiqirauruat, aglaan piḷḷuatautiqaqtiłługich aimaaġviŋi nalaunŋaruat.

³⁴ Akiḷḷiḷiqsuġai kamasaaqtuat, aglaan aitchuiruq nagliktuutiqpaŋmik qiñuitchuanun.

³⁵ Isumaturuat nanġausiaqaġniaqtut, aglaan isumatuitchuat kanŋunaqsiḷiġñiaqtut.