Proverbs 28 - Iñupiatun Mumiksat Uqalugiksuat

¹ Pigiiḷḷiqirauruaq iñuk qimaasuuruq maliqataŋitkaluaqtilluni, aglaan iḷumutuuqtuaq iñuk iqsiitchuq lion-tun.

² Nunaqpauruaq piḷuusiqikpata, aqulliġaaġiiñik aullarriqaġuuruq. Aglaan nunaqpauruaq suaŋaniaqtuq suli tuniqtuniaqtuq aullarriqaġumi isumaturuanik.

³ Aullarri nagliksaaqtitchiruaq piiḷḷiuqtuanik iñugnik arriqaqtuq sialukpaktun maqutchiruatun naurianik.

⁴ Suliqutigiŋitkupkich pitqurat, iḷḷuliqsuġitin pigiiḷḷiqirauruat; aglaan kamaksriguvich, paaqłaktuġitin.

⁵ Piḷuktuat nalurut suutilaaŋanik atunim nalaunŋaruam, aglaan aŋaiyyuruat Ataniġmun kaŋiqsimagaat.

⁶ Nakuułhaaqtuq suiḷḷiuġniq iḷumutuuġuniḷu suiḷḷiuŋiññiġmiḷḷu pitqiksiġaġniġmiḷḷu.

⁷ Nutaġauruat kamagivlugu pitquraq isumaturut. Avilaitqatauruat iñuumaqłuktuanun kanŋusaaġaich aŋayuqaatik.

⁸ Umiallakkuvich qaaŋiġḷugu akiḷiipkairġaġutillu iñuiḷḷu pitqiksiġaġupkich, umialgutitin allamugniaqtut aŋalatchisuqtuamun piiḷḷiuqtuanik.

⁹ Kamagiŋitkupku pitquraq, God-im tusaaniaŋitkai aŋaiyyutitin uumisuutiqaqpaitchut.

¹⁰ Killukun iglaugutigupku iḷumutuuqtuaq iñuk piḷuktualiqipkaġupku, ilvich piraġipkaġniaqtutin. Patchisaitchuaq akiḷiusiaqaġniaqtuq.

¹¹ Suiḷḷiuŋitchuat iñuich isumasuurut isumatunasugivlutik, aglaan suiḷḷiuqtuaq iñuk sivuniksramik iḷisimaruaq iḷisimałhaaqtuq.

¹² Iluaqtualiqiruaq akimamman, iñupayaat quviasuutiqpaqaġuurut, aglaan iñuich iñuulluataŋitchuat inillagmata, iñuich iriqtuliġuurut.

¹³ Iñuuniaġniġmi sivunmukkumiñaitchutin iriqtuġupkich piḷuutitin. Quliakkich suli aġiukkich; tavraasii God-im nagliktuutini qiñiqtinniaġaa iliŋnun.

¹⁴ Kamagisuŋaiññaġuŋ Ataniq aasii quviasuutiqaġniaqtutin. Siqquqsimaguvich maqutauniaqtutin.

¹⁵ Suiḷḷiuqtuat iñuich qanuqsausiiqaġumiñaitchut akiḷḷiqsruġniḷukkumirruŋ pigiiḷḷiqirauruaq aullarri; anayanapiaġataqtuq lion-paktun naagga naġiuqtuatun akłatun.

¹⁶ Aullarri isumatuitkumi naglikkutaiññiaqtuq taluqsralliaġiññikkumi. Iñuk nakuaqsraŋitchuaq iḷumutuuŋiññiġmik aullarriñiaqtuq sivisuruamik.

¹⁷ Iñuk tuqutchiŋaruaq allamik iñugmik inmiñik iḷuvviviḷiuqtuq. Ilaatun pipkaġli.

¹⁸ Pitqiksiġautaitchiñ aasii annaumiñiaqtutin. Pitqiksiġautaitkuvich, ulġusiññaagurutin.

¹⁹ Savvaqturuaq nautchialiqiri niqiksraukkaġuuruq. Iñuich asiḷiqiugaqtuat suiḷḷiuŋaiġumiñaitchut.

²⁰ Iḷumutuuqtuat iñuich iñuuniaqtut naamalutiglu quviasugutiglu. Aglaan akkupapianiaq umiallagnialaguvich, tatavsaqtauniaqtutin.

²¹ Atunim aŋalatchisaiññiq iluaŋitchuq. Aglaan iḷaŋich isivġiirit killukuaġuurut mikiruuramik unnii saglutautikun akiññaksaġutik.

²² Signaturuat iñuich qilamik umiallagnialavaił̣ł̣utik nalurut piiḷḷiuġniq tikitkaqsitilaaŋanik.

²³ Iluaqsruġuŋ iñuk, aasii aaqagu quyyatigiłhaaġniaġaa nanġausiamiñ.

²⁴ Kiñaliqaa isumaruaq iluaġniḷugu tigligaġniq aŋayuqaamiñiñ nakuułhaaŋitchuq tigligaqtimiñ.

²⁵ Anniqsrautuniq tikiutisiññaġuuruq siġġaġniuġniġmun. Iluałhaaġniaqtutin ukpiqqutiqaġuvich Ataniġmun.

²⁶ Inmulhiñaq ukpiġraqtuat isumalluaġiitchut, aglaan maliġuaqtuat isumattutikkun annaksimaaġniaqtut.

²⁷ Aitchuiguiñ piiḷḷiuqtuanun aasii susuksiuniaŋitchutin. Suliqutigiŋitkupkich piiḷḷiuqtuat iñugiaktuat iñuich uqamaqługviginiaġaatin.

²⁸ Iñuich iriqsimaliġuurut pigiiḷḷiqirauruat suaŋŋasiqtaummata. Aglaan tavraŋŋa piiġmata iluaqtuakuaqtuat aullarriġuġuurut.