Proverbs 27 - Iñupiatun Mumiksat Uqalugiksuat

¹ Kamanniraaġutiginagu uvlaakuksraq. Nalurutin suniaqtilaamik akkupagmiñ uvlaakumun.

² Allat iñuich nanġaġlisin— nalugaluaqtaqpiḷḷu; iliŋnunhiñaŋiḷaaq.

³ Uqumaisilaaŋa uyaġaum naagga maġġaum suuŋitchuq siġġaġnaqtuamiñ tikitchuuruamiñ isumalluaġiiḷuktaqtuni.

⁴ Qinnautiqaġniq naglikkutaitchuq siquvsisuuruġlu, aglaan suuŋitchuq saŋiagniġmiñ.

⁵ Iluałhaaqtuq natqiksruqtuni avanmun iriqtaġiniġmiñ nakuaqqunmik iliŋiññun.

⁶ Avilaitqatauruat iluamik pisuurut, anniġaluaqłutin. Aglaan akiḷḷiqpich iqittaaqpatin—qaunakłaaġiñ!

⁷ Siḷviñŋaguvich honey-tuġugniaŋitchutin, aglaan kaakkuvich tipiglukkaluaqtuaq siiġñatun ittuq.

⁸ Kiñaliqaa unitchiruaq aimaaġvigmiñik qupałuktun ittuq uglumiñik unitchiruatun.

⁹ Tivraġiksautillu tivraġiksuallu uqsruqtiġutit quviasuutausuurut, aglaan siġġaġniuġutit siqumitchuugaat tutqiutiqaġniq.

¹⁰ Piiguġniaġnagich avilaitqatiitin naaggaunnii aapakpich availaitqatiiŋich. Siġġaġniuġnamun tikitkuvich, apiġinagu iḷan ikayuqulutin; qanittuam siḷalliqpich ikayułhaaġniaġaatin iḷagniñ uŋasiksuamiñ.

¹¹ Isumatulutin, miqłiqtuuŋ, aasii quviasugniaqtuŋa; kiggutiksraqaġniaqtuŋa kialiqaa uvyauqpaŋa.

¹² Isumaturuat iñuich iḷisimasuurut siġġaġnaq tikiññiaġman aasii pitchaiḷivḷugu, aglaan isumatuitchuam tikisaaġuugaa aasii isumaalugiaqsivḷugu aaqagumman.

¹³ Kiñaliqaa isumalluaġiisilaamisun unniqsuqłiiruaq naluraġmi iñuum akiiḷaŋa akiḷiġñiaġnivḷugu ilaan suġauttani akiḷiutigiyumaaqtuksraġigai.

¹⁴ Nipaturuaġlu quvianaqtuaġlu paġlan uvlaatchaurami uqamaqłuutitun ittuq.

¹⁵ Qaniġviḷuguuruaq tuvaaqan arriqaqtuq kutittuatun nutqautaiḷatun sialugman.

¹⁶ Qanuġlugu nipaiqsinniaqpiuŋ? Nutqaqtinniataŋaviuŋ anuġi naaggaunnii tigumiaġniataŋavich uqsrumik argagni?

¹⁷ Iñuich iḷitchisuurut avanmun, tainnaptauq savił̣ham ipiksaġmatun savił̣haq.

¹⁸ Qaunagigupku napaaqtuq siiġñiruaq fig-nik niqiksraqaġniaqtutin figs-nik. Kivgat qaunaksriruat umialimignik nanġaqtauniagtut.

¹⁹ Ilvich kiiñaqpich taġġaŋa tautuguugiñ immami aasii suli iliŋnun uummatigni tautuguummiutin.

²⁰ Iñuum pigiyumaraŋi arriqaqtut nunaŋani tuquŋaruat— iniksraiyuitchut.

²¹ Igniġum piupiaġmagaaġuugai kaviqsuaġlu qatiqtuaġlu maniich; aglaan iñuk uuktuqtausuuruq nanġaqtaukami.

²² Piyukpakkaluaġupku tuqutqayaqtaallaan isumalluaġiitchuaq isumalluaġiiñŋaiġumiñaitchuq.

²³ Qaunagimmaġiksaakkich imnaigutitillu pamiqsaagutitillu pisuqtilaaqtun,

²⁴ qanukkii piiḷḷiuŋiññiq taimuŋa inŋitchuq. Nunaqpauruat unnii taimuŋa inŋitchut.

²⁵ Ivigaat kivluqtuni niqiksriuqługich allamiḷi allat naupkaqługich.

²⁶ Annuġarriuġumiñaqtutin imnaich mitquŋiññiñ suli tauqsiġumiñaqtutin maniññaktaaġniñ tunigupkich iḷaŋich nagrulgich pamiqsaat.

²⁷ Aasii iḷakuŋiññiñ nagrulgich pamiqsaat immuqaġumiñaġniaqtusi iḷatillu aġnaŋiḷḷu kivgaqpich.