Proverbs 26 - Iñupiatun Mumiksat Uqalugiksuat

¹ Nanġaiñiq isumalluaġiitchuamun iluaŋitchuq, aputitun upinġaaguruami naagga sialuktuami nautchianik kivluivigmi.

² Pimaqłuktinniaġutit anniġumiñaitkaatin patchisauŋisuaġuvich. Qupałuktun arriqaqtut qulausiññaqtuatun.

³ Ipiġaqtuksraġigiñ tuttuqpak, kigmirriqsraġigiñ kakakti, suli anaullaqtuksraġigiñ isumalluaġiitchuaq.

⁴ Sivunġitchuaq apiqqun kiugupku, taaptumatun apiqsriruatun ittutin.

⁵ Sivuniqtuitpan kiggutin apiqqutauruamun sivunġitchuamun, apiqsriruaq iḷitchuġiniaqtuq puqipiaŋisilaamiñik.

⁶ Isumalluaġiitchuamik tilisiguvich uqallaurritqulugu, isigaktin ilignik kipiruatun ittuq; iluitchuamun tikiññiaqtutin.

⁷ Isumalluaġiitchuam alġaqsruutiŋich arriqaqtut qilluutatuqtuatun iñuktun pisuaġnitchuatun.

⁸ Nanġaqtuni isumalluaġiitchuaq arriqaqtuq uyaġagmik qiḷiqsruutiŋaratun illuunmun.

⁹ Isumalluaġiitchuam uqallausiġimmauŋ isumaturuam alġaqsruutaa itqaġnaqtuq immaġluŋaruaq qauqqutaiqsiñiataktuaq argagmiñiñ.

¹⁰ Savaktitchiri savaktiksraġman isumalluaġiitchuamik apqusaaqsiññaqtuamik anniaqłiqsiññaqtuq kimunliqaa.

¹¹ Isumalluaġiitchuaq isumalluaġiiḷuktatqigaaġman arriqaqtuq qimmisun utiqtuatun miġiamiñun.

¹² Isumalluaġiił̣haaqtuaq iluałhaaqtuq iñugmiñ isumatunasugiruamiñ isumatuitkaluaŋŋaġmi.

¹³ Summan iqiasuuruat iñuich anisuitpat iglumigñin? Iqsivat lion-nik?

¹⁴ Iqiasuuruat iñuich mumiksiññaġuurut tuŋiutimigñi. Upkuatun aŋmaġaaqtuatun umimmaġmi ittut nuullanatik.

¹⁵ Iḷaŋich iñuich iqiasuuvaił̣ł̣utik uqummirriġumiñaitchutunnii.

¹⁶ Iqiasuuruaq iñuk isumaqaqtuq puqił̣haanasugivluni tallimat malġugniñ iñugniñ uqalumignik tunulliqsuiḷḷaruaniñ.

¹⁷ Qanaaqtuanun iḷaksruutiniq nalugaluallaġmi sunik arriqaqtuq tiguniqłaktuatun qimmim siuttak.

^18-19 Iñuum pisaasuġmiaġmauŋ alla aasii mitaaqsiññaġnivḷuni arriqaqtuq isumaiḷatun iñuktun piuraaqaqtuatun tuqutchiḷḷaruamik satkumik.

²⁰ Qiruiġman igniq qamisuuruq; uqautikłiqsuagitpan qanaaqtuaqaġniaŋitchuq.

²¹ Aumam ikumapkaġuugaa aġra, qiruum igniq ikumapkaġuugaa, suli maqutchirit paaqłaktaun ititchuugaa.

²² Uqautikłiġñiq tipigiksuq! Iisisuġnaqtuq!

²³ Uqausiqłiġñiġum iriġaqtuġuugaa isumagipiaqtan arriqaqtuq qivliqsaŋaruatun akiisuuram qikuyyam puggutaŋatun.

²⁴ Ukpiŋŋuaqtuam iriqsimagaa uumikkun uqayuġniġmiñik.

²⁵ Tusaasuġnaġaluaqtuq, ukpiġinagu, qanukkii uummataa siḷvinŋaruq uumisuunmik.

²⁶ Iḷisaġnaiyaġniaġaluaġaa uumikkutini, aglaan iñupayaam qiñiġniaġai piḷuktuat piḷġusiŋi.

²⁷ Iñuich pisaasuġmiaġniaqtuat allanun iñugnun pirausuurut. Iñuich aksraktitchiruat nunamik naniqtausuurut.

²⁸ Uumikkutiqaġniaqtutin anniġumagupku iñuk sagluuġutinik. Iḷumun inŋitchuat uqaluich maqutchisiññaġuurut.