Proverbs 25 - Iñupiatun Mumiksat Uqalugiksuat

Solomon-gum Alġaqsruutiŋich

¹ Uvva suli Solomon-gum alġaqsruutivsaaŋich, tuvraqtaŋich aglaktit iñuŋisa Hezekiah-m umialgata Judah-m.

² Qutchiksuaġigikput God iḷisimapkaisuŋaiññayuiñman; qutchiksuaġigivut umialgich kaŋiqsipkaimmata.

³ Nalunaqtuq qanuq umialik isumatilaaŋanik; isumagiraŋich qutchigigivut, siḷatun naagga natqatun taġium.

⁴ Suaqłuiyaġman qatiqtuaq manik sanaturuam suliaġillagaa qiñiyunaqpaktuamik.

⁵ Pigiitchuat siḷġiqsuirit piisittuni umialigmiñ kavamaŋa iḷisimanaġniaqtuq atunim aŋalatchisaagun.

⁶ Makitkuvich saaŋanun umialgum, qiññaġigñiatagnak naagga qutchiksiḷiġnak iliŋnun.

⁷ Nakuułhaaqtuq apiġikpatin nuutqulutin qutchiksuamun inaŋiqsauniġmiñ allamun qutchił̣haaqtuamun.

⁸ Uqaqsitaaġvigmuutisauraġnagich sut tautupqauraġupkich. Allam qiñiŋaruam killukuaŋaniqpatin iḷumun suniaqpich?

⁹ Siḷalliḷḷu atiŋitkuvsik, inillaksiuŋ kisivsik suli nalupkaġlugich allat qanuq pisilaavsigñik.

¹⁰ Qanukkii iluqatik iḷitchuġiniaqtut uqqaqtutilaaġnik, suli piiguġniaŋitkaat kanŋunaġniŋa.

¹¹ Uqalulluatauruaq ittuq maniksun kaviqsuatun iḷuani qatiqtaam manium.

¹² Kiliktuusiaq iñugmiñ iḷitpaŋaruamiñ naalaġniyumaruamun piqpagnałhaaqtuq kaviksuaniñ manigniñ qitiqłiaġusianiñ naagga qiñiyunaqutiniñ piḷianiñ nakuułhaaqtuaŋiññiñ kaviqsaat maniich.

¹³ Tiliraq kiliktuitquvlugu piḷḷuataġman aniqsaapautausuuruq tilisiruamun, arriqaqtuq qiiyanaqtuatun imiqtun uunnaġmi kivluiñaqsimman.

¹⁴ Iñuich unniqsuqłiiqqaaqhutik aitchuisuitchuat ittut nuviyatullu anuġitullu sialuksraitchuatun.

¹⁵ Qimaksautaiłłuni arakłiiruaq araaġillagaich umialgich kinatautiqpaqaġaluaqtuat.

¹⁶ Qaaŋiułaaġnak honey-tuġuvich; Iŋattaqpaitkuvich miġiaġaġniaqtutin.

¹⁷ Isiqattaaqpaiññak siḷalliġñuñ; piḷaiġutiviaġaatin aasii piḷugiliġutin.

¹⁸ Iḷumun inŋitchuaq pasikkun tuqutchiḷḷammiuq savikpaktun, kautatun, naagga ipiktuamik pisiksim qaġruŋatun.

¹⁹ Nalupqigiŋiññiq iñuk ukpiġnaitchuaq anayanniuqtuni ittuq tamuġniḷuktuatun kigun aulayagaluaŋŋaan naaggaunnii pisuaġniḷuktuatun isigaurraaŋallaġmi.

²⁰ Atuurriñiq iñugmun quviitchuamun ittuq annuġaiyaġnitun iñuk qiiyanaqtuami naaggaunnii nanugnitun iñuum kiḷḷiŋa taġiumik.

²¹ Akiḷḷiitin kaakpata niġipkakkich; imiġukpata imiksritkich.

²² Kanŋutchaiqpagniaġitin, suli Atanġum akiḷiññiaġaatin.

²³ Uqautikłiġñiq qinnaliqtitchisuuruq kanagniġum sialuŋatun.

²⁴ Iluałhaaqtuq iglum qaaŋani iñuuniq iglumiitqatiqaġniġmiñ uqaviḷusuŋaiññaġuuruamik tuvaaqatimik.

²⁵ Tavraasii tusaaruni tusaasuġnaqtuanik uŋasiksuamiñ nunamiñ imiqsiḷḷaktuatun qiiyanaqtuamik imiġmik imiġuliqpaŋavluni.

²⁶ Iñuk iñugiksuaq payaripkaġman iñugmun piḷuktuamun itqaqtitchuugaatin salumaitchuamik maqsraluktuamik imiġmik naaggaunnii tuqunaligmik nivviamik.

²⁷ Honey-tuqpaiññiq nakuuŋitchuq timignun, tainnaptauq inmiuq nanġaqtitchipkaiñiaġniq inmun.

²⁸ Atanniqsimayuitkupku qinnaliġaġniġiñ, ittutin qanuqsausiksraitchuatun nunaaqqitun avataitchuatun, pisaġipkallaruatun.