Proverbs 24 - Iñupiatun Mumiksat Uqalugiksuat

-19-

¹ Tusunagich pigiitchuat iñuich, avilaitqasiutiniaġnagiḷḷu.

² Iluiḷḷiuqtitchiñiaġniq kisian isumagigaat; qaniqtik agmatuaġmarruŋ iñuk imma anniaqtauniaqtuq.

-20-

³ Aimaaġviich savaagurut maŋŋuqaqłutik isumattunmiglu kaŋiqsisiqaġniġmiglu.

⁴ Iḷisimmatikkun, inaurat imaqaqtut akisuruaniglu qiññaġikpaktuaniglu suġauttanik.

-21-

⁵ Isumatuniq iluałhaaqtuq saŋŋiñiġmiñ; aaŋ, iḷisimmatiqaġniq nuimałhaaqtuq suaŋŋanmiñ.

⁶ Uvvakii, qaunakłaaqtuksraurutin itqanaiyaġuvich aŋuyagiaqsaġutin, suli iñugiaktuanik siḷġiqsuirilluataqaġuvich, akimałhaaġniaqtutin.

-22-

⁷ Isumattutikun uqaluich siġġaġnaqpaił̣ł̣utik kaŋiqsiñaitchut isumalluaġiitchuanun iñugnun. Iliŋich uqallaksausiitchuurut sut nuimaruat uqausiġimmatigik.

-23-

⁸ Sivunniusuŋaiññaġuuguvich pigiitchuanik, iñuich iḷisimaniaġaatin pimaqłuktaġuutilaaġnik.

⁹ Sunaliqaa savaaŋa isumalluaġiitchuam piḷuktuq. Iñuich uumigigaat iñuk kipakkutiqałhiñaqtuaq allanun.

-24-

¹⁰ Suaŋaitkuvich suna siġġaġnaqsimman, tavra suaŋaipiallaktutin.

-25-

¹¹ Aaqagutaaġnak annaurraksraqaqpan tuqutauniaqtuamik patchisaitkaluaqtillugu.

¹² Uqallagniaġaluaqtutin taamna naluniḷugu aglaan God iḷisimaruq suli iḷisimagai sivuniġiratin. Qiñiġaatin; iḷisimaruq. Aasii akiḷiusiaqaġniaġtutin atunim savaaġiŋaraqtun.

-26-

¹³ Miqłiqtuuŋ, honey-tuġiñ; nakuuruq. Aasii honey uqaġni siiġñaaġuumman,

¹⁴ tainnaptauq nalupqisugnak isumattutiqaġniq iluaqtuq iḷitqusiġñun. Isumattutiqaġiñ aasii sivuniksran nalupqinaiññiaqtuq.

-27-

¹⁵ Pigiiḷḷiqirauruatun innak sivunniuqtuatun ivayaqtuġuqługich iluaqtuakun iñuuruat naaggaunnii igluiġukługich.

¹⁶ Qavsiiqsuaqhutik katakkaluaġmata iluaqtuakun iñuuruat, makitqiguurut; aglaan sukraunġiutim suunġiġuugaich pigiiḷḷiqirrauruat iñuich.

-28-

¹⁷ Quviaginagich akiḷḷiitin nagliksaaġunmun tikitpata, suli quviattalanak pimaqłuktaqpata.

¹⁸ Ataniq iḷisimaniaqtuq kamanniraaġuvich, suli nakuaġiniaŋitkaa; aasii suli iḷaanni tatavsaġniaŋiñmigaich.

-29-

¹⁹ Pigiitchuanun iñugnun uŋiarisaaqtinnak; tusunagich.

²⁰ Pigiiḷḷiqirauruaq iñuk sumik tikisaaksraitchuq— sumik tikiñŋaitchuamik qiñiġumalaaksraitchuq.

-30-

²¹ Qiksikkutiqaġiñ Ataniġmun, miqłiqtuuŋ, suli qutchiksuaġiuŋ umialik. Iḷaksruutinak iñugnun akiḷḷiqsruqtuanun;

²² tainnaittuat iñuich maqutaullarut akkupauraq. Kaŋiqsivich qanutun maqutchiyumiñaqtilaaŋa God naagga umialik?

Uqaluvsaat Isumattutikun

²³ Isumaturuam uqallausivsaaŋich marra: Iluaŋitchuq isivġiqsiiri atunim aŋalatchiŋiñman iñugnik.

²⁴ Iñuk patchisaitchuaq pasimmarruŋ, pimaqłuktaqtauniaqtut suli iñupayaat uumiginiaġaich.

²⁵ Aglaan isivġiqsim tatavsaqpauŋ pimaqłuktaqtuaq umialguniaqtuq suli iñuuniaqtuq qiññaŋa iñugnun nakuuluni.

²⁶ Iḷumun ittuaq kiggun nalunairrutauruq avilaitqataupiaġniġmun.

²⁷ Igluliuġnak aasii aimaaġviḷiutilugu nunautitin itqanaiŋaiñŋaisa, suli nalupqinaiŋalutin maniññaktuġniksraġnik.

²⁸ Uqausiġinagu paaqłakługu siḷalliñ patchisaiḷḷaqpiñ, naaggaunnii uqaġnak anniutauniaqtuanik iliŋiññun.

²⁹ Uqallagnak inna, “Piḷġusiatun uvamnun tainnaptauq piñiaġitka! Akisaġniaġitka!”

³⁰ Pisuaqtuaŋa nunaŋiññiḷu nauriaqaġviŋiññiḷu iqiasuuruam, makautaŋaam iñuum.

³¹ Siḷvinŋamarut kakiḷḷaġnaqtuanik uqpignik suli nauvigiqpaŋammivḷugu palauvakraġiitchuanik. Uyaġaich katchiuruat katagaŋammiut.

³² Qiñiqtuaŋagiga, isummatigiŋagiga, suli iḷitchivigiŋagiga:

³³ Ki, siqutqigiñ; ki, siñiktuaġiñ. Argaktin tiggutilugich piḷaiŋaiqsiaġiñ,

³⁴ aglaan siñiktillutin, piiḷḷiuġniġum tikiññiaġaatin satkuliktun tigligaqtitun.