Proverbs 23 - Iñupiatun Mumiksat Uqalugiksuat

-6-

¹ Aquvitkuvich niġiqatigisaġlugu iñuk nuimaruaq, itqaumalutin kiutilaaŋa.

² Niġġiqsuguvich, niġiqpatchaiḷiiñ.

³ Niġiñialaqpagnagi iluqaisa niqilluatat maniraŋich; Pisaasuġmialaviaġaatin.

-7-

⁴ Isumattutin atuġlugu ilignun iluiḷḷiġñak umiallagnialalutin.

⁵ Maniiñ nuŋuniaqtuq akkupauraq, isaġunikhuni tiŋiruatun tiŋmiaqpaktun.

-8-

⁶ Niġiñak niġġiviani sigñaturuam naaggaunnii niġiyumalaaġnagi kaviuġnaqtuat niqiŋi.

⁷ “Qaiḷutin niġivsaaġiñ,” uqallaktuq, aglaan isumamiñi tainna isumaqaŋitchuq. Isumagiramisun iñuusiŋa ittuq.

⁸ Miġiaġniaġitin niġigaluaqtatin, aasii nanġautigigaluaqtatin asiñun ittut.

-9-

⁹ Kaŋiqsipkaġniaġnagu isumalluaġiitchuaq; naalaġniñiaŋitchuq.

-10-

¹⁰ Nuunnagu utuqqaq nutim nalunaiñŋutaŋa nunam naagga piññaktaaġiniaġlugu aŋayuqaagitchuam nunaŋa.

¹¹ Ataniq tasuqsaqtiŋat suaŋaruaq uqaqtigigaat, aasii ilaan akiḷḷiġiniaġaatin uqaqsitaaġvigmi.

-11-

¹² Naalaġniuŋ iḷisaurriñ suli iḷisaġlutin pisuqtilaaqtun.

-12-

¹³ Siḷġiqsuŋiññagich miqłiqtut. Pattakkupkich tuquniaŋitchut.

¹⁴ Amiami, annautiniaġugnaġaich tuqqunmiñ.

-13-

¹⁵ Miqłiqtuuŋ, isumatusiguvich, quviaginiaġiga.

¹⁶ Kamasugniaqtuŋa tusaagupkiñ uqaqtuatin isumatuvlutin.

-14-

¹⁷ Tusunagich piḷuktuat iñuich; qiksikkutiqaġniq Ataniġmun iñuggutiġniilli.

¹⁸ Tavraasii niġiukkutiqaġniaqtutin piyumaaġtuanik.

-15-

¹⁹ Tusaaŋŋa, miqłiqtuuŋ, isumalaalluataġiñ; qanuq ilvich iñuuniaġnikkun.

²⁰ Nayuutinak iñugnun immaġluyuktuanun naagga niġġiqsuvaitchuanun.

²¹ Immaġluyuktuallu niġġiqsuvaitchuallu suiḷḷiuliġñiaqtut. Niġisiññaqtuaġutillu siñiksiññaqtuaġutillu piguvich annuġaaluktuliġñiaqtutin.

-16-

²² Naalaġniuŋ aapan; iñuguŋanayaitchutin piitpan. Aakan utuqqalikpan, iḷisimapkaġuŋ quyyatiqaqtilaaġnik ilaanun.

²³ Iḷumun ittuaq, isumatuniq, iḷitchiḷḷaniq suli kaŋiqsiummatiqaġniq— taapkua akiḷiġḷuqtumunnii pigiruni suŋitchuq, aglaan akiŋat akisuruq tuniñiaġupkich.

²⁴ Iluaqtuakun iñuuruam aŋayuqaaŋik patchisiqalluataqtuk quviagigumirruŋ. Kamasuutigiyumiñaġiñ isumaturuaq miqłiqtun.

²⁵ Aapakpiḷḷu aakakpiḷḷu kamasuutigilisin; aakan quviasuutiksrirruŋ.

-17-

²⁶ Naalaġniḷḷuataġiñ, iġñiiŋ; iñuusiġa tuvraaksriutauli iliŋnun.

²⁷ Akiitchuq aġnaq mitaiḷatun pututun ittuq allatukti aġnaq niġukitchuatun nivviatun inmiuq.

²⁸ Utaqqiuġuurut tigligayuktitun aasii aŋun allatuqtiłługu.

-18-

^29-30 Qiñiqtinŋa iñugnik immaġluguuruanik, uuktuaqtuksrausuuruanik qiññaġiksuanik taaŋŋaġnik; aasii qiñiqtinniaġikpiñ iñugnik quviasuutaitchuanik suli inmignun nagliksraqtuanik, iluiḷḷiuqtitchiŋaiyuiḷaallu uqaviḷuŋaiyuiḷaallu. Iriŋich kaviqsiŋarut, aasii suli tigluuraqtaŋarut itchumiñaitkaluaqtuanik.

³¹ Wine-mun piraġipkaġnak, kavviaġikkaluaqpan; suli qivliatitaġuni qallunmi, suli iiruni nakuummiuq.

³² Uvlaaku uvlaami inniaqtutin kiiraŋatun, tuqunaligum nimiġiam.

³³ Iluaŋitchuat qiñiġiat sivuġaani irrakpich inniaqtuq; suli isumasuiññiaqtutin naagga uqalluatayuiññiaqtutin.

³⁴ Taġiumiittuatun irrusiñ inniaqtuq, miġiaqsunŋulutin; takpauŋa qaiḷḷiġum aŋalallutin uvaaqataaqtuami umiami.

³⁵ “Anausugnaġniġaanŋaimña,” uqallagniaqtutin, “Piyugugnaġniġaanŋaimña, aglaan itqaumaŋitchuŋa. Summan imña itiyuitpik? Taaŋŋavsaaqtuksrauruŋa.”