Proverbs 22 - Iñupiatun Mumiksat Uqalugiksuat

¹ Nalliagnik piruksrauguvich iluaqtuakun iñuuniaġniġmik naagga umiallakpagniġmik, iluaqtuakun iñuuniaġniq piuŋ.

² Umialguruavlu piiḷḷiuqtuavlu una atunim pigigaak: Atanġum iluqaaktun savaaġiŋagaik.

³ Isumaturuat iñuich iḷisimaniaġaat iluiḷḷiuġnaqtuaq tikiaruaq aasii nalautchaiḷiñiaġaat aglaan isumatuitchuam nalautchaaġniaġaa aasii nunuurautigilugu aaqagukpan.

⁴ Kamagisiuŋ Ataniq, qiñuiġḷusi, aasii suiḷḷiuġniaŋitchusi, nanġausiqaġlusi, suli iñuusiqpaqaġlusi.

⁵ Iñuggutin piqpagigupku, piisinniaġiñ naniġiaŋiññiñ tigusisuktuat pigiiḷḷiqirauruat apqutiŋiññiñ.

⁶ Iḷisautikkich miqłiqtut iñuuniaġniġmik, aasii itqaumaniaġaat iñuuniqtutilaamiktun.

⁷ Suiḷḷiuqtuat iñuich kivgaurut umialguruanun. Maniatchiaġuvich maniatchiaġvikpich kivgaġigaatin.

⁸ Naupkaiguvich piḷuktuanik iluitpaktuat isagutiniaqtut, aasii nagliksaaqtitchiñiġiñ aġiuniaqtuq.

⁹ Sigñataitchin aasii aitchuqtuutigikkich niqautitin piiḷḷiuqtuanun. Tainna piguvich ikayuusiaqaġniaqtutin.

¹⁰ Anitkuvsiuŋ pisaaŋŋatiqaqtuaq, qapiqsaaġutaiññiaqtuq, qaniġviḷuutaiññiaqtuq, naagga atchiipał̣ł̣uktautaiññiaqtuq.

¹¹ Nakuaġiguvsiuŋ salumaruaq uumman suli uqaluqalluataġniq, umialik avilaitqatiginiaġiñ.

¹² Atanġum iḷumun ittuaq qaunagisuugaa piiyaqługich sagluuqtit uqaluŋich.

¹³ Iqiasuuturuat aimmisuurut; uqaqłutik lion-mun pisaġiniaġnivḷutik anigumik.

¹⁴ Allatuġniq naniġiatun ittuq— naniġuugaich Atanġum qinnautiraŋich.

¹⁵ Miqłiqtut iñuusiġmiŋni iḷałhuyuguurullu, suaqłaayuitchullu aglaan iqquaqtaqtuni iḷiññiaqtut iluakkuaġniġmik.

¹⁶ Aitchuiguvich umialguruanun iñugnun naagga piiḷḷiuqtuat piññaktitchaiḷigupkich, ilvich piiḷḷiuliġñiaġmiutin.

Iñuiññaq Qulit (30) Isumattutit

¹⁷ Atta, iḷisautiniaġikpiñ isumaturuat uqaluŋiññik. Iḷisakkich iḷisaurrutiŋich,

¹⁸ aasii quyaniaqtutin itqaumagupkich suli uqausiġiḷḷagupkich.

¹⁹ Ukpiqqutiqaqugikpiñ Ataniġmun; tainnamik uqautigisukkitka ilignun akkupak.

²⁰ Aglaŋaruŋa iñuiññaq qulit (30) uqaluŋnik piksraġnik. Iḷisimmataurut suli nakuurut siḷġiqsuutit,

²¹ suli iḷisautiniaġaatin iḷumutupiaq ittuamik. Tavraasii ivaqłiġiaqtitpatin iḷumun ittuamik, utiġniaqtutin iluaqtuamik kiggutiksraġnik.

-1-

²² Aŋalamaqługnagi piiḷḷiuqtuat piḷḷanivaiḷḷutin; aŋalamaqługnagi uqaqsitaaġvigmiittuat qanuġumiñaił̣ł̣utik.

²³ Ataniq uqaqtiginiaġaat aasii suli sivuuġasaaġniaġaich ilaan sivuuġasaaqparruŋ iñuggutaa.

-2-

²⁴ Avilaitqasiutinak iñugnun qinnaliyaruanun.

²⁵ Iḷitpiaqtutin piḷġusiŋiññik aasii allaŋŋuyuitkaksiḷutin.

-3-

²⁶ Unniqsuqłiiñak allam iñuum akiiḷaŋa ilvich piñiaġniḷugu.

²⁷ Akiḷiġumiñaitkupku, piññaktaaġiniaġaich tuŋiutitin unnii.

-4-

²⁸ Nuunniaġnagu nunakpich nalunaiñŋutaŋa kiŋuniiqpich iḷiŋaraŋat.

-5-

²⁹ Qiñiqtinŋa savagluataġuuruamik, aasiiḷi qiñiqtinniaġikpiñ piḷḷuatałhaaġuuruamik iñugiaktuaniñ suli aquppiqatauyumiñaqtuamun umialignun.