Proverbs 21 - Iñupiatun Mumiksat Uqalugiksuat

¹ Atanġum aŋalatkaa umialgum isumaŋa aŋalatchiñiġmisun igliġniksraŋanik kuuġuluuram.

² Isumasugnaġaluaqtutin suliqipayaaġavich iluaġnasugilugu, aglaan itqaumaiñ Atanġum naipiqtuġaatin summan tainna pisilaaġnik.

³ Iluaqtuakullu nalaunŋaruakullu savagiñ; iviġaumagiłhaaġaa Atanġum tainna pikavich ikipkaivikun aitchuiñiġmiñ.

⁴ Pigiiḷḷiqiruat iñuich atanniqsimapkaqtut inmignun qutchiginiġmignullu arguaŋaaġniġmignullu, tainnainniq piḷuutauruq.

⁵ Sivunniummaġiksaaġutin aasii suiḷḷiuġniaŋitchutin; akkupaiññaq surġaġuvich, naamaiḷḷiuġniaqtutin.

⁶ Umialgutitin pitqiksiġautikun nuŋuniaqtut, aglaan tuqqunmuutiqqaaŋaunnak.

⁷ Pigiiḷḷiqirauruat suksraunġiqsauniaqtut ilimik pimaqłuktautimiktigun; iliŋich iluaqtuakuaqsaiḷirut.

⁸ Pasirauruat killukuaqtautiŋisigun iñuich pisuaqtut saquuġaŋaruakun apqutikun; patchisaitchuat iluaqtuakuaqtut.

⁹ Iluałhaaqtuq iñuuniaġniq iglum qaaŋani iñuuniaqatiqaġniġmiñ tuvaaqanmik qaniġviḷuktuaqtuamik.

¹⁰ Pigiiḷḷiqirauruat iñuich kaaktuaqtut pigiitchuamun; naglikkutaitchut kimununnii.

¹¹ Iñuk inmiñułhiñaq piqpagiruaq tatavsaqtaumman, iḷitchiŋaitchuaqunnii iḷitchisuuruq taavsrumaŋŋa. Iñuk isumaturuaq iḷitchisuuruq sumik iḷisautimmanni.

¹² God, nalaunŋaruaguruaq, iḷisimaruq sunik piruanik aimaaġviŋanni pigiiḷḷiqirauruat, aasii pigiiḷḷiqirauruaq suksraunġiġñiaġaa.

¹³ Naalaġnisuŋipiaġupkich qirratiŋich suiḷḷiuqtuam, ilvittauq qirratitin ikayuqtisiuġuviñ tusaaniaŋiñmigaich.

¹⁴ Iñuum qinnautiŋakpatin, aitchuġupku sumik nalunaqtuakun qinnaŋaipayaaġniaqtuq.

¹⁵ Pitqiksiġautaitchuaq inman, nakuuruat iñuich quviasuguurut, aglaan pigiitchuat iñuich tutqiiḷisuurut.

¹⁶ Tuqqutim utaqqigaa kiñaliqaa iñuk isumattutaitchuaq.

¹⁷ Piviuttautiqaqpaiññiġum sunik akisuruanik, wine-nik, naagga niqilluatanik umiallaktinniaŋitkaatin.

¹⁸ Pigiiḷḷiqirauruat inmignun nagliksaaġusiuġuurut; iluaqtuakun iñuuruanik piñiaḷakkamiġnik.

¹⁹ Iluałhaaqtuq iñuuniaqtuni nunagluktuami iñuuniaqatiqaġniġmiñ uqamayuuturuamik nuliamik.

²⁰ Isumaturuat iñuich iñuuniaġuurut suiḷḷiuŋił̣ł̣utiglu umialguvlutiglu, aglaan isumatuitchuat maniiġutisuurut maniññapqauraġamik.

²¹ Aŋalatchiḷḷuataġiñ suli saglutuiḷḷutin aasii iñuuniqtuniaqtutin; qiksiginiaġaatin suli aŋalalluataġutin.

²² Isumaturuam umialiŋata aŋuyaktuat akiiḷiḷḷagaich inauruat suaŋagaluaqtuanik aŋuyaktiqaġaluaġmata, suli maqułługich katchiŋich annaummiviŋich.

²³ Sumun iluitchuamun tikitchuŋitkuvich, qaunakłaakkich uqaluktin.

²⁴ Tautuktinŋa iñugmik inmiñun qutchigiruamik; tautuktinniaġikpin iñugmik arguaŋaaqtuamik, piunialguruamik, suli allanun isumaaluutaitchuamik.

²⁵ Iqiasuuruat iñuich savagulaitchuat inmignun maquttut;

²⁶ isumaqatualuktut imma sumik pigisuktamignik. Iluamik aasii iñuuruat aitchuisuurut sigñataił̣ł̣utik.

²⁷ Atanġum nakuaġiŋitkaich piḷuktuat iñuich ikipkautinik aitchuiruat inmiñun, patchisiqaġmatapiksuaq imma sumik piḷuktuamik.

²⁸ Quliaqtuaŋa sagluturuam ukpiġnaitchuq, aglaan uqalua iñuum isumalaaqłuni ukpiġnaqtuq.

²⁹ Iluaqtuakun iñuuruat inmignun nalupqigiŋitchut; pigiiḷḷiqirauruat suuŋŋuaġuurut pisuqtilaamiktun.

³⁰ Iñuum isumattutaa, puqigñiŋa, kaŋiqsimmataa— ikayuutauŋitchut Atanġum akiḷḷiqsuqpatin.

³¹ Tuttuqpaich itqanaiġumiñaġitin aŋuyaktuanun, aglaan Atanġum akimman pigigaa.