Proverbs 20 - Iñupiatun Mumiksat Uqalugiksuat

¹ Taaŋŋaqpaiñiġum nipatusipkaġniaġaatillu isumalluaġiiqsinniaġaatillu. Isumalluaġiiññiġuruq taaŋŋaqpaiññiq.

² Iqsigiuŋ qinnaŋaruaq umialik iqsigiruatun ugialaruatun lion-tun; qinnairuni ilaa iñugutaiġsuatun ittuq.

³ Isumalluaġiitchuam isagutillagaa qanaaġun; pilluatałhaaġnaqtuq iḷḷatiŋitchuni.

⁴ Nautchialiqiri iqiasukhuni itqanaiŋitpauŋ nautchiivigrani tikitpan, naurrianik kivluiviksraqaġniaŋitchuq.

⁵ Iñuum isumaŋich ittut immatun itiruamiittuatun, aglaan iñuum kaŋiqsiummatilluataqaqtuam anillagaich.

⁶ Iñupayaat uqaġuurut iḷumutuuqtuagunivḷutik ukpiġnaġnivḷutiglu, aglaan ivaġnaqtut!

⁷ Miqłiqtut quviasuusiaqaġuurut aapaqaqtuat ukpiġnaqtuamik suli iluaqtuakuaqtuamik.

⁸ Umialik naipiqtutqiksuq aasii iḷisimaruq tautukkami piḷuktuamik.

⁹ Iñuk uqallakkumiñaqpa sumik isumaaluutaiññiḷuni, piḷuutaiññiḷuniḷu?

¹⁰ Atanġum uumigigaich iñuich pitqiksiġaqhutik uqumaisilaaqsiruallu aktilaaġsiruallu.

¹¹ Miqłiqtut unnii qiñiqtitchuurut qanuġitilaamignik surġausimiktigun; iḷisimaniaqtutin pitqiksiġautaisilaaŋiññik naagga iñugiksilaaŋiññik.

¹² Atanġum iriksriñŋagaatigut qiñiutiksraptignik suli siuttagnik tusaagutiksraptignik.

¹³ Siñiktuaġuvich, suiḷḷiuġniaqtutin. Aptaugaġuvich niqiksraukkaġniaqtutin.

¹⁴ Tausiġñiaqti uqaviḷuguuruq akiŋa akisuvaiññivḷugu, aglaan kamanniraanagutisuuruq akiiñaaġnivḷugu.

¹⁵ Iḷisimaguvich sumik uqausiqaqtilaaġnik, piqaqtutin akisułhaaqtuamik kaviqsuamin maniġmiḷḷu akisuruaniḷḷu uyaġagniñ.

¹⁶ Kiñaliqaa isumalluaġiisilaamisun uniqsuqłiiruaq naluraġmi iñuum akiiḷaŋa akiḷiġñiaġnivḷugu ilaan suġauttani akiḷiutigiyumaaqtuksraġigai.

¹⁷ Sunik piksraŋaguvich pitqiksiġautikun nakuaġiniaġaluaġitin tivraġiksigiruatun niqitun, aglaan taikani iḷiñiaqtuq uqummiaqaqtuatun maġġaġmik.

¹⁸ Siḷġiqsuusiaqalluataġuvich piḷḷuataġniaqtutin; aŋuyaktuanun tikisaaġnak sivunniuganiŋaiḷḷutin.

¹⁹ Uqautigliqsuaq nalunaqtuakun iriqtaqaġuminaitchuq. Nayuutinak iñugnun uqqaqturuanun.

²⁰ Uqamaqłuutigupkik aŋayuqaakiñ, iñuggutin isuqaġniaqtuq naniġuatun qamiruatun taaġmi.

²¹ Tigusiññaamik umiallakkuvich, iliŋnun ikayuutauniaŋitchuq.

²² Iliktuġruiññaq akisaġniaġnagu iluaŋitchuaq. Ukpiġiuŋ Ataniq ilaan iluaqsruġniaġaa.

²³ Atanġum uumigigaich iñuich pisaasuġmiaġaqtuat suli uqumaisilaaŋisigun.

²⁴ Atanġum sivunniutigianiŋagaa igliġniksraqput; qanuġuniasii kaŋiqsiñiaqpauŋ iñuusiġmi igliġniŋa?

²⁵ Isumalaaġutigimmaġiksaaġuŋ unniqsuqłiiŋaiñŋaqpich aitchuutiksraġnik God-mun. Nunuuraliqpiaqtutin aquvatigun.

²⁶ Isumaturuaq umialik iḷitchuġiniaqtuq kiña iluatun piŋisilaaŋanik aasii tatavsaġlugu nagliksrautaiḷakun.

²⁷ Atanġum aitchuŋagaatigut isumalaallasivḷutalu iluaqtuamik naagga iluaŋitchuamik; uvaptigniñ iriġuminaitchugut.

²⁸ Umialik umialgullaruq aullarriñiqtutilaamisun iluaqtuakuaġumi, nalaunŋaruakuaġumi, suli aŋalatchiḷḷuataġumi.

²⁹ Iluaġigivut suaŋaniŋat nutaqqat suli qutchigivlugu qirġiqaġniŋat utuqqanaat.

³⁰ Iḷaanni anniġñaqtuaq apqusaaqtuksraġigikput allaŋŋuġniaġupta pilġusiptigun.