Proverbs 2 - Iñupiatun Mumiksat Uqalugiksuat

Akiḷiusiat Isumattunmun

¹ Miqłiqtuuŋ, iḷitkich iḷisaurrutitka suli suuramikunnii piiguġnagich iliŋnun pitquuqtatka.

² Naalaktuaġlugich isumaturuat suli kaŋiqsiñialalugich.

³ Ii, iḷisimmatiqaġugutin iŋiqsruġiñ; qasiḷiiñ kaŋiqsisugutin.

⁴ Ivaġuŋ ivaqłiḷgutilauraqtuatun qatiqtaamik manigmik naagga sumik iriqtamik piññaġnaqtuamik.

⁵ Tainna piguvich, iḷitchuġiniaqtutin qiksiksrautiqaġniġmik Ataniġmun aasii iḷitchuġivaallugniaġiñ kiutilaaŋa God.

⁶ Ataniq tavra ilaa isumattutiksritchisuuruq; ilaaniñ qaimmiuk iḷitchuqqutiqaġniġlu kaŋiqsimmatiqaġniġlu.

⁷ Ikayuutiqaqtuġlu qaunakkutiqaqtuġlu iliŋiññun iluaqtuakuaqtuanun suli iḷumutuuqtuanun.

⁸ Qaunagigaich iliŋich aŋalatchilluataqtuat allanik iluaqtuakun, suli munaġigaich inmiñiñ iḷumutuuqtuat.

⁹ Naalaġnigumŋa, iḷitchuġiniaqtutin suna iluaqtilaaŋanik, nalaunŋatilaaŋanik, suli avanmun iluaqtilaaŋanik. Iḷisimaniaqtutin suruksrautilaaġnik.

¹⁰ Isumatusiñiaqtutin, suli iḷisimmatiqaġniqpich quviasuutiqaqtinniaġaatin.

¹¹ Kaŋiqsiummatikpiḷḷu puttuqsrisikpiḷḷu qaunaginiaġaatin

¹² suli killukuaqtaqtinŋiḷḷutin. Iñugniñ piisinniaġaatin maqutchiñiaqtuaniñ uqalugmikkun.

¹³ Tamatkunaŋŋa tunuttuaniñ iluaqtuakun iñuuniaġniġmik, iñuusukhutik taaqtuaŋani piḷuutim.

¹⁴ Tamatkunaŋŋa quviasuunmik paqittuaniñ piḷuusiqigamik suli quviagivlugu piḷuusiqiniq

¹⁵ pitqiksiġayugniñ ukpiġnaitchuaniñ.

¹⁶ Isumattutim annautiniaġaatin piḷuktuamiñ aġnamiñ payariñialakpatin uqayuqsaaġuni,

¹⁷ allatuqtuaq avataagun uigmi suli asivaqługich unniqsuqłiisiñi katinnamik Ataniġmun.

¹⁸ Igluanukkuvich, igliqtutin tuqqunmun; apqutauruq iḷuviġmun. Tavruŋaqtuni tavra ullauġnaqtuq iniŋa tuqqutim.

¹⁹ Kiñaunnii tavruŋa ullautiruaq utiġataŋaitchuq. Utiyuitchuq apqutaanun iñuggutim.

²⁰ Tavraasii maliġuaqtuksraġigitin nakuuruat iñuich suli iñuulutin nalaunŋaruakun.

²¹ Iluaqtuakuaqtuat iñuich—iḷumutuuqtuat iñuich—iñuuniaġniaqtut maani nunaptigni.

²² Aglaan God-im piiyaġniaġai pigiḷḷiqirauruat nunamiñ suli nuqiittaġlugich piḷuusiqirit nuqittairuatun naurianik nunamiñ.