Proverbs 19 - Iñupiatun Mumiksat Uqalugiksuat

¹ Iluałhaaqtuq suiḷḷiuġniq pitqiksiġautaiḷḷuni saglutuluni isumalluaġiiññiġmiñ.

² Suyummaqtuniq nalugaluallaġmi iluaŋitchuq; qiñuisaaŋitkuvich iłuiḷḷiuġunmun tikiññiaqtutin.

³ Iñuich iḷaŋich inmignun maqutchuurut pimaqłuktautimiksigun aasii taimma pasivḷugu Ataniq.

⁴ Suġalliruat iñuich avilaitqataukkaġuurut, aglaan suiḷḷiuqtuam avilaitqataiḷḷiuġuuruq.

⁵ Sagluuġuvich uqaqsitaaġvigmi, tatavsaqtauniaqtutin— qimagviksraitchuq.

⁶ Iluqatiŋ iñuich iviġaumagitqusuurut nuimaruanun iñugnun; iluqatiŋ iñuich avilaitqatausuguurut iñugnun ikayuisuuruanun.

⁷ Nanmiñiqunnii iḷauruat piiḷḷiutuamun suliqutigisuitkaat; avilaitqataitkaluaqtuġluuna. Pisuqtilaaġaluaġami, avilaitqatinnayuitchuq.

⁸ Iliŋnun ikayuġukkuvich iḷisaġiñ pisuqtilaaqtun; itqaumalugich iḷisaapayaatin aasii piḷḷuataġniaqtutin.

⁹ Kiñaliqaa sagluuqtuaq uqaqsitaaġvigmi tatavsaunmiñ qimagviksraitchuq; suksraunġiqsauruq.

¹⁰ Isumalluaġiitchuat iñuuniaqtuksrauŋitkaluaqtut suiḷḷiuŋiḷḷutik, suli kivgat umialguruksrauŋitkaluaġmiut atanġuruanun.

¹¹ Isumatuguvich piavsaktayuiññiaqtutin. Iñuum aŋalamaqłukpatin, ilvich piḷġusiġiksutin suliqutigiŋitkupku.

¹² Umialgum qinnautaa ittuq ugiallaqpaktuatun lion-tun, aglaan iviġaummataa ittuq uġġuksraatun ivigaani.

¹³ Isumalluaġiitchuat miqłiqtut maqullagaich aŋayuqaatik. Qaniġviḷusuŋaiññaġniŋa tuvaaqatauruam kusiqsuasuŋaiññaqtuatun ittuq.

¹⁴ Aŋun kiŋuvaannakkumiñaqtuq iglumiglu manigñiglu aŋayuqaamiñiñ, aglaan Atanġum kisimi piññaktillagaa isumaturuamik tuvaaqatiksraŋanik.

¹⁵ Iqiasuktuaġiñ; siñikpauraaġiñ, aglaan kaaksiuliġñiaqtutin.

¹⁶ Kamagikkich God-im pitquraŋich aasii iñuusugrugniaqtutin; suliqutigiŋitkupkich, tuquniaqtutin.

¹⁷ Aitchuiguvich piiḷḷiuqtuamun, atukkitchiruatun Ataniġmun ittuq, aasii Atanġum utiqtitchiñiaġaatin.

¹⁸ Iḷisautikkich iluaqtuakun miqłiqtutin iḷitchiḷḷaŋŋaisa. Iḷisautiŋitkupki, ikayuutaurutin inmignun maqunniŋannun.

¹⁹ Iñuk piavsayakpan, igḷutuġligich aquvaaksraŋich. Ikayutuaġupku pimaqłuktautiŋiññiñ, tainnasuŋaiññaq piruksrauniaqtutin.

²⁰ Naalaġnigupkich siḷġiqsuutauruat suli iḷitchiyummatiqaġlutin, uvlut iḷaŋanni isumatusiñiaqtutin.

²¹ Iñuich sivunniuġniaġaluaqtut uumatimigñiñ qanusiḷimaanik, aglaan Atanġum pisuutaa nalautinniaqtuq.

²² Kanŋunaqtuq suqaġummaqtuniq; suiḷḷiuqtuat iñuich iluałhaaqtut sagluturuaniñ.

²³ Qiksiksrautiqaġniq Ataniġmun apqutauruq iñuggunmun, tutqiutiqaġniaqtutin anayanniuŋiḷḷutillu.

²⁴ Iñuich iḷaŋich iqiasuuvaił̣ł̣utik iqiagigaatunnii niġiñiaġniq.

²⁵ Arguaŋŋan tatavsautiqaqtuksraugaluaqtuq, iñuich naluruat iluaqtuamik iḷitchiyumaut. Isumatuguvich iḷitchiñiaqtutin siḷġiqsuutiniñ.

²⁶ Kisian kanŋunaqtuam iñugiił̣ł̣uni aŋalamaqługniaġaa aapani naaggaunnii anillugu aakani iglumiñiñ.

²⁷ Miqłiqtuuŋ, naalagniŋaiġuvich iḷisaaksranik, sugiŋaiġñiaġitin iḷisimaaniktatin.

²⁸ Piġiitchuaq ilisimarauruaq kipakłiġuuruq nalaunŋaruamik, pigiiḷḷiqiruam qaniŋa iisuugaa piḷuun.

²⁹ Inmiñun qutchigivluni isumalluaġiitchuaq iñuk piyuktauniaqtuq.