Proverbs 18 - Iñupiatun Mumiksat Uqalugiksuat

¹ Iñuich atunim iñuuniaqatiqayuitchuat allanik iñugnik inmignun kisian isummatigisuurut; akiḷḷiqsruġniaġaat sunaliqaa kialiqaa iluaġiraŋa.

² Isumalluaġiitchuam suliqutigiŋitkaa sumik kaŋiqsiŋitkaluaqami; kamanniraaġuksiññaqtuq qanutun puqiksilaamiñik.

³ Piḷuullu kanŋunaqtuaġlu atautchikuaqtuk. Qiksiksrautiqaġniġiñ piiqpan, kipakkutim simmausiġñiaġaa.

⁴ Iñuum uqaluŋich isumattunmun ikayuutaurut, ititigirut taġiutun, nutaurut kuuġuluuratun.

⁵ Iluaŋitchuq qutchiksiḷiġniq patchisauruamik aasii patchisaitchuaq ikayuusiaqaqtinŋił̣ł̣ugu nalaunŋaruakun.

⁶ Isumatuitchuaq qanaaqtitchigami piyuktitchuuruq.

⁷ Isumatuitchuaq uqalugmigun inmiñuñ maqutchuuruq; uqaluŋisa utiġvigisuugaat.

⁸ Uqautikłiġñiq niqitun kayumiġnaqtuatun ittuq— niġisauraġuuraptiktun.

⁹ Iqiasuuruaq iñuk ittuq maqutchiritun.

¹⁰ Atanġum atiŋa ittuq anayanaitchuatun nasiqsruġviktun, nalaunŋaruat annaksimaaġviksraŋatun.

¹¹ Aglaan umialguruat iñuich isumasuurut umialgutigmignun annausimaniaġnasugilutik qutchiksuatullu suaŋaruatullu katchiqpauruatun inimigni.

¹² Kiñaliqaa qutchiksuaġisuitkaat qiñuiñŋisuaġman; arguaŋaruat iñuich igliqtut suksraunġiġvigmun.

¹³ Naalaġniiñ kiusiŋaiñŋaqpich. Naalaġniŋiññavich, isumalluaġiitchutillu kanŋunaqtutillu.

¹⁴ Iñuuyummatikpich sivunmuupkaġniaġaatin naŋitkuvich, aglaan iñuuyummataiġuvich niġiukkutaiġñiaqtutin.

¹⁵ Puqiksuat iñuich iḷitchiyummaqturut.

¹⁶ Kasuisukpich nuimarauruamik iñugmik? Aitchuutiksraqaġuvich siġġaġnaiññiaqtuq.

¹⁷ Sivulliq uqaqtuaq uqaqsitaaġvigmi iluamik uqaġnasuginaqtuq akiḷḷianun apiqsruqtaġnaqsiñiŋanunaglaan.

¹⁸ Malġuk piḷguruak iññuk akiḷḷiġiikpagnik uqaqsitaaġvigmi, nalautchaġaġutik akimaruaq akimaniaqtuq.

¹⁹ Ikayukkich iḷatin aasii ikayuġniaġaatin suaŋaruatun iniqpaum katchiŋatun, aglaan atiŋitkuvsi, umŋutiniaġaatin.

²⁰ Igḷutuqtuksraġigitin aquvaaksraŋich uqalupayaaqpich.

²¹ Uqalukpich annautillagaa iñuusiŋa iñuum naagga maqullagaa; tavraasii igḷutuqtuksraġigitin aquvaaksraŋich uqalukpich.

²² Tuvaaqatiniktuaq inmiñun ikayuqtuq; iviġaumaginiaġaa Atanġum.

²³ Suiḷḷiuqtuaq uqallakkami qiñuiḷaamik pisuuruq, aglaan umialguruaq kiusikami uqalugiitchuq.

²⁴ Iḷaanni avilaitqatigiigñiq naitchuuruq, aglaan iḷaŋich avilaitqatauruat piŋitqataayuił̣haaqtut aniqatauruaniñ.