Proverbs 17 - Iñupiatun Mumiksat Uqalugiksuat

¹ Iluałhaaqtuq punniqtuġniq pannaqłuŋaruamik tutqiksuaġuni niqinaqiniġmiñ iñugiaktuani qaniġviḷuktuani.

² Isumaturuaq kivgaq qaunaksriġuġniaqtuq umialgum miqłiqtuanun kanŋunaqtuamun aasii kiŋuvaannaguni miqłiqtuŋisun.

³ Maniich kaviqsuallu qatiqtuallu uuktuqtausuurut ignikun, aasii iñuum uummataa uuktuqtausuuruq Ataniptigun.

⁴ Piḷuktuat iñuich naalaġnisuurut piḷuktuanik isummatinik, suli sagluturuat naalaġnisuummiut sagluuġutinik.

⁵ Kipagigupkich suiḷḷiuqtuat iñuich, tavra pisaaŋagiñ God savaŋaruaq iliŋiññik. Tatavsaqtauniaqtutin quviasaaġutigigupku allam iluiḷḷiuġniŋa.

⁶ Ataataaguruat kamatchautigisuugaich tutaaluutik, tainnaptaup miqłiqtut kamatchautigimmatun aŋayuqaatik.

⁷ Qiksignaqtuat iñuich sagluuyuitchut, aasiiḷi isumalluaġiitchuat nipaisaaġumik iluałhaaqtut.

⁸ Iḷaŋich iñuich isumasuurut akiḷiun saglutautikun savallanasugilugu aanġuatun; ukpiġigaat sunigliqaa piḷḷanasugilugu.

⁹ Iñugnun nakuaġitquguvich, suliqutigiŋaikkich aŋalamaqłuutiŋich iliŋnun. Itqaumaniq killukuaqtautinik maqurrutausuuruq availatqatigiiksuanun.

¹⁰ Puqiksuaq iñuk iḷitchiłhaaġuuruq atausimiñ suagunmiñ isumalluaġiitchuam iḷiññiŋaniñ iñugiaktuani anaullaqługu tallimakipiatun (100x) iḷisautigaluaqtilluni.

¹¹ Pigiitchualiqirit ivaqłiġuurut paaqłaŋŋanmik Ataniġmun; tavraasii kiliksiri tuqqunmun tilirauniaqtuq paaqłiutauluni.

¹² Anayanaił̣haaqtuq kasuqsiñiq akłamik piayaamiñik tammairuamik kasuqsiñiġmiñ isumalluaġiitchuamik aptatiqaqtuamik piuŋiḷamik.

¹³ Utiqtitchivigigupku iluaqtuaq piḷuktuamik, piiġumiñaitkiñ pigiitchuaq iglugniñ.

¹⁴ Isagutipkaiñiq qanaaġniġmun arriqaqtuq maqipkaisaqpaalluktuatun sapukutaligmik imaġmun; nutqaqtirruŋ ayuuŋaiñŋaan.

¹⁵ Suksraunġiqsauniq patchisaitchuamun naagga pigiiḷḷiqiruamun suliqutigiŋaiqsiñiq— iluqaaktun Atanġum uumigigaik.

¹⁶ Ikayuutauŋitchuq maniksuġniq iḷisaqtitchaġlugu isumalluaġiitchuaq, qanukkii iluaqtuamik isumaitchuq.

¹⁷ Avilaitqatauruat nakuaqqutiktik qiñiqtitchuugaat. Nanmiñiq iḷat suuvat iluiḷḷiuġutinik ikayuutauŋitpata avanmun?

¹⁸ Isumatuitchuaq kisimi unniqsuqłiiñiaqtuq piginiaġniḷugich allam iñuum akiiḷaŋich.

¹⁹ Nakuuqsraġniq piḷuktuamik ittuq iluiḷḷiuġusiuqtuatun. Kamanirraaġuuguvich ataramik, iluiḷḷiuġutisiuqtutin.

²⁰ Kiñaliqaa isumaqaqtuaq naagga uqaluqaqtuaq pigiitchuanik paqitchiyuminaitchuq nakuuruamik—pimaqłuunmik kisian.

²¹ Allamik piitchuq aglaan ipiqtusuunmiglu isumaaġunmiglu aŋayuqaaguruagnun miqłiqtuŋi isumalluaġiitchuanik pimmata.

²² Quvianġutuniġum timin iluaqtinniaġaa. Tuquniugautauruq ipiqtususuŋaiññaġniq.

²³ Pigiiḷḷiqiruat isivġiqsit akuqtuġuugai akiḷiutit saglutautikun, taimmaasii iluaqtuamik isivġiutaił̣ł̣uni.

²⁴ Isumaturuaq iñuk iluaqtuakun savaguuruq, aglaan isumatuitchuaq isagutisuuruq avigaaŋavluni.

²⁵ Isumalluaġiitchuat miqłiqtut isumaaluutiqaqtitchuugaich aapatik suli nagliksaaqtiłługich aakatik.

²⁶ Iluaŋitchuq akiḷiipkaqtuni patchisaitchuaq iñuk; isivġiiñiq piḷuktuq iluakkuaqtuat iñuich tatavsaqtaukpata.

²⁷ Iñuich avigaaŋaŋitchuat uqqaqtuitchut. Iñuich piłłaktautaitchuat kaŋiqsimmatiqaqtut.

²⁸ Amiami, isumalluaġiitchuat unnii isummatauyumiñaqtut isumatuniḷugiḷḷu puqigñiḷugiḷḷu nipaisaaqpata.