Proverbs 15 - Iñupiatun Mumiksat Uqalugiksuat

¹ Kiurił̣ł̣aktaŋitchuam qinnaun suaŋaŋaiġuugaa, aglaan ipiktuam uqaluum piavsaisuugaa.

² Isumaturuat uqaqamik, iḷisimmatiqaġniq kipiġnaqsisuugaa, aglaan isumatuitchuat asiñik uqaġuurut.

³ Atanġum qiñiġaa sunapayaaq; ilaan qiñiġaatigut, iluaqtuakuaġapta naagga piġiitchuakuaġapta.

⁴ Arautauruat uqaluich ikayuutaurut iñuusiġmun, aglaan uqamaqłuutit anniaġutaurut iḷitqusimun.

⁵ Iluaŋitchuq suliqutigiŋitchuni aŋayuqaaguruak iḷisaurrutaak; ikayuutauruq akuqtuaġiruni iluaqsruutaak.

⁶ Nalaunŋaruakuaqtuat iñuich tammaisuitkaich suġallaktaatik, aglaan pigiiḷḷiqirauruat tammaisuugaich siġġaġnaqsimman.

⁷ Iḷisimman siamitchuugaat iñuich isumaturuat, siamitchuitkaat isumatuitchuat.

⁸ Ataniq iviġaguuruq iñulluatat aŋaiyyummata, aglaan piḷugigaich aitchuutiŋich pigiiḷḷiqirauruat iñuich.

⁹ Atanġum piḷugigaich piḷġusiŋich pigiiḷḷiqirauruat iñuich, aglaan nakuaġigaich nalaunŋaruakuaqtuat.

¹⁰ Killukuaqtaġuvich, tatavsaqtauniaqtutin; tuquniaqtutin kamagiŋitkupkich natqiksruutitin.

¹¹ Iniŋanni tuquŋaruat unnii iriqtuġumiñaitkaich sut Ataniġmiñ; qanuġutaasii iriqtuġumiñaqpisigik isumavut God-miñ?

¹² Inmiñun qutchigiruaq iñuk natqiksruqusuitchuq; ikayuqtisiuyuitchut isumaturuamiñ.

¹³ Iñuich quviasukkamik, iglaŋaaġuurut, aglaan ipiqtusukkamik ilitqusiŋat siqumitausuuruq.

¹⁴ Puqiksuat iñuich iḷitchivsaaġuguurut, aglaan isumalluaġiitchuat naamaruaġisuurut inmignun.

¹⁵ Iñuuniaġniq piiḷḷiuqhuni siġġaġnaqtuq, aglaan quviasukhutik iñuuruat quviagigaat iñuusiqtik.

¹⁶ Iluałhaaqtuq suiḷḷiuqtuni suli qiksigivlugu Ataniq umialguniġmiḷḷu isumaaluutiqpaqaġniġmiḷḷu.

¹⁷ Iluałhaaqtuq niġiqaqtiqaqtuni naammaktuamik piqpakun inman niġiñigmiñ niqilluatamik uumikkutiqaqtuami.

¹⁸ Uumitchałłaktaġniġum qanaaġun ititchuugaa, aglaan qiñuirrutim tutqiun ititchuugaa.

¹⁹ Iqiasuutuguvich siġġaġniuġniaqtutin sumiḷiqaa, aglaan iḷumutuuġuvich siġġaqiniaŋitchutin.

²⁰ Isumaturuat miqłiqtut aapatik quviasuktitchuugaich. Isumalluaġiitchuat uumigigaich aakatik.

²¹ Isumalluaġiitchuat quviagigaat asiḷiqqutiktik, aglaan isumaturuat siatqiksuakuaġuurut.

²² Ikayuqtisiusuŋaiññaġitchi siḷġiqsuiriniñ, aasii piḷḷuataġniaqtusi; tainna piŋitkuvsi piḷḷuataġniaŋitchusi.

²³ Qanutun quyanaqtigiva iluapiaġataqtuamik uqalugmik qaitchiruni!

²⁴ Isumaturuat iñuich tuvraġaat qunmun apqun iñuusiġmun, apqutauruaŋiḷaamun anmun tuqqunmun.

²⁵ Atanġum siquminniaġaich aimaaġviŋich arguaŋaaqtuat iñuich, aglaan qaunaginiaġaa uiḷgaŋaruam suġauttaŋa.

²⁶ Atanġum uumigigaich pigiitchuat isumat, aglaan iviġaumagigaich uqalulluatat.

²⁷ Saglutautikun sunnagniaġuvich siġġaġniuliqsinniaġitin aimaaġviqatiitin. Akuqtuġnagich akiḷiutit saglutautikun aasii iñuuqpagutin.

²⁸ Iluaqtuakun iñuuruat isumalaaġutigisuugaat kiggutiksraqtik. Pigiitchuat iñuich akkupauraq kiurisuurut, aglaan siġġaġniuġutausuuruq.

²⁹ Iluaqtuakun iñuuruat aŋaiyyummata Ataniq naalaġnisuuruq, aglaan naalaġnisuitkaich pigiitchuat.

³⁰ Iglaŋaaqtuat quviasaaġuugaatin, suli tusaayugaaġiksuat quviatchaisuugaatin.

³¹ Naalaġnisuuguvich iluaqsruġmatin iñuich isumaturutin.

³² Naalaġniŋitkuvich iliŋnun anniaqtutin. Iluaqsruutiŋich iñuich akuqtuġupkich isumatusiñiaqtutin.

³³ Qiksikkutiqaġniq Ataniġmun iḷisaurutausuuruq isumattunmun. Qiñuiqtuksraurutin akuqtuusiaqaġniaġuvich nanġautinik.