Proverbs 14 - Iñupiatun Mumiksat Uqalugiksuat

¹ Aimaaġviich savaagurut isumattutaagun aġnam, aglaan isumalluaġiitchuam siqumitchuugaa argagmiñik.

² Iḷumutuuġiñ aasii qiñiqtitkiñ qiksiksrautin Ataniġmun, iḷumutuuŋiññavich iḷisimanaqtuq qiksiksrautaitchuatin.

³ Isumalluaġiitchuam uqaluŋisa maqutchuugaa arguaŋŋataata; uqaluŋisa isumaturuat ikayuġuugaich.

⁴ Qimuktaitkuvich nauriaqaġniaŋitchutin, aglaan qimuktiqaġuvich nauriaqaġniaqtutin.

⁵ Iḷumutuuqtuaq sagluuyuitchuq, aglaan iḷumutuuŋitchuaq sagluturuq.

⁶ Inmiñun qutchigiruaq isumatusiyumiñaitchuq, aglaan puqiksuaq iḷitchiyaruq.

⁷ Piqatiginagich isumatuitchuat; sumik iḷisautiyumiñaitkaatin.

⁸ Summan puqiksuaq isumatuva? Qanukkii iḷisimaruq suruksrautilaamiñik. Summan isumalluaġiitchuaq isumatuitpa? Qanukkii isumałhiñamiñi iḷisimanasugiruq.

⁹ Isumalluaġiitchuat sugiŋitkaat piḷuusiqigumik, aglaan iñulluatat suliqutigiŋaiġunmik apiqsrisuurut.

¹⁰ Quviasuutigiran ilvich pigigiñ; uumiḷuġruutin ilvich pigigiñ. Allam iñuum iḷisimayumiñaitkaa.

¹¹ Iluaqtuakun iñuuruam igluŋa makitaniaqtuq, piḷuusiqiruam igluŋa siqumitauganikpan.

¹² Apqun iluaġnasugigaluaqtan, aglaan tuqqunmun ittuq.

¹³ Iglaqhaqtaġniġum matullagaa ipiqtusuun. Quviasugniq nuŋumman ipiqtusuunsuli ittuq.

¹⁴ Nalaiñ iñuuŋitchuat piññagniaqtut nalliġiramignik. Iluatun iñuuruat akiññagniaqtut savaamikkun.

¹⁵ Isumalluaġiitchuam ukpiġiniaġaa sunaliqaa; isumaturuat iñuich qaunakłaaġuurut.

¹⁶ Isumaturuat iñuich pimaqłutchaiḷisuurut, aglaan isumatuitchuat isumalaaġaluaġatik pisuurut.

¹⁷ Iñuich piavsayaruat pimaqłuktaġuurut; isumaturuat pił̣ł̣aktayuitchut.

¹⁸ Naluruat iñuich piññaguurut isumatuisilaamiktun, aglaan puqiksuat aitchuusiaqaġuurut iḷisimmanmik.

¹⁹ Piḷuktuat iñuich punniaqtut nalaunŋarualiqiruamun suli ikayuqtisiuġvigilugu.

²⁰ Kia unnii nakuaġiŋitkaa suiḷḷiuqtuaq, siḷalliŋisa unnii, aglaan suiḷḷiuŋitchuaq avilaitqataukkaqtuq.

²¹ Quviasugukkuvich, nagligikkich suiḷḷiuqtuat, piḷuutauruq uumisuutiqaqtuni kimulliqaa.

²² Ukpiġiniaġaatillu qiksiginiaġaatillu savakkuvich nakuuruamun; savakkuvich piḷuktuamun, killukuaqtutin.

²³ Savaaqaġiñ aasii sunnagniaqtutin; aqupiksuaqsiññaġuvich uqaqsiññaġutin suiḷḷiuġniaqtutin.

²⁴ Isumaturuat iñuich suġallisuurut, aglaan isumatuitchuat qiñiqtitkaat isumatuiññini.

²⁵ Iḷisimarauruat annautisuugaich iñuusiŋich iñuich iḷumun uqaġamik; sagluuġami, aitchuutigisuugaich iñuich.

²⁶ Qiksiksrautiqaġniq Ataniġmun nalupqisuutairrutiqaqtitkaaŋa suli tuniqsimmatiqaqtitkaalu iñuk iḷaniḷu.

²⁷ Tuqusuŋitpich? Qiksiksrautiqaġnik Ataniġmun iñuggutauruq.

²⁸ Umialgum suaŋaniŋa tunŋaruq qanutun iñugiaktilaaŋiññik iñuich aŋalattaŋi; piitpata ilaa suuŋitchuq.

²⁹ Piavsautaitkuvich, isumaturutin, aglaan piavsayaguvich, qiñiqtittutin qanutun isumatuisilaaġnik.

³⁰ Tutqiksuam isumam timi iluaqtitkaa, aglaan saŋiaktuni naŋirrutiġruatun ittuq.

³¹ Aŋalamaqłukkupkich iḷiappauruat iñuich, kipagigiñ God savaŋaruaq iliŋiññik; aglaan aŋalalluataiñiq iliappauruanun nanġairuatun ittuq.

³² Pigiiḷḷiqirauruat iñuich inmignun maqutchuurut piḷuktualiqigamik, aglaan nakuuruat iñuich anayanniuŋitchut ilumutuuġuuvłutik.

³³ Isumattun ittuq isumapayaaŋani puqiksuam iñuum; isumalluaġiitchuat nalurut isumattunmik.

³⁴ Iluaqtuakuaġniġum suammatiqaqtitchuugaa nunaqpak; piḷuusiqiniq kanŋusautauruq nunaqpagmun.

³⁵ Umialgich iviġaumagigaich isumaturuat atanaurat, aglaan tatavsaġuugaich piḷḷuataŋitchuat.