Proverbs 13 - Iñupiatun Mumiksat Uqalugiksuat

¹ Isumaturuat miqłiqtut naalaġnisuurut aŋayuqaagmik natqiksruġmatik, aglaan kipakłiqsuat quliayuitchut killukuaġniḷutik.

² Iluaqtuakun iñuuruat akiḷiusiaksraqaġniaqtut qanuq uqaġumik, aglaan saglutaġuuruat kaaktuatun ittut pimaqłuktaunmun.

³ Qaunakłaaġiñ uqalukkun aasii anayanniuġniaŋitchuq iñuusiñ. Suaqłaaŋitchuaq uqaġami inmiñun maqutchuuruq.

⁴ Suna pigisukpakkaluaġumiuŋ iqiasuaguruam iñuum, piññaktaaġiyumiñaitkaa. Savakpaguuruam iñuum piññaktaaġiniaġaich supayaat pigisuktani.

⁵ Pitqiksiġautaitchuakun iñuuruat piḷugigaich sagluuġutit, aglaan uqaluŋich pigiiḷḷiqirauruat iñuich kanŋunaqtullu ukpiġnaitchullu.

⁶ Nalaunŋasipkaqtauniġum qaunagigaa patchisaitchuaq; pigiiḷḷiqiniq maqutchiruq piḷuusiqiruamik.

⁷ Iḷaŋich iñuich umialguqpaktuatun itchuurut, aglaan suił̣ł̣utik. Allalli suiḷḷiuqtuatun itchuurut, aglaan suġauttaukkaqpakłutik.

⁸ Iñuum umialgutaata tasullagaa iñuggutini, aglaan piiḷḷiuqtuat anayasaaqtiqayuitchut.

⁹ Nalaunŋasipkaqtauniq ittut naniqtun qaummatittuatun; pigiiḷḷiqirauruat ittut naniqtun qamiaqsiruatun.

¹⁰ Arguaŋaaġniq patchisausuuruq siġġaqqutinun. Nakuulhaaqtuq ikayuqtisiuqtuni.

¹¹ Umialguġuvich siġġaġnaitchuakun, qilamik tammaiñiaġiñ. Siġġaqivluni piññaktaaġiruni nausuurut.

¹² Niġiukkun sukrauġigman, uumman sukraunġiġuummiuq, aglaan pisuun taŋŋiġman quviasuun ittuq.

¹³ Ayyaktuġupkich nakuuruat siḷġiqsuutit, iliŋnun siġġaġnaq piñiaqtuq; maliġuaġupkich anayanniuġniaŋitchutin.

¹⁴ Iḷisaurrutiŋich isumaturuam maqsraluktuagurut iñuggunmun; ikayuutauniaqtut annaksaġuvich iñuggutin anayanniuqpan.

¹⁵ Isumaturuaq iñuk qiksigirauniaqtuq, aglaan ukpiġnaitchuat maqutauniġmun igliqtut.

¹⁶ Isumaturuat isumalaaġiqqaaqługu kisian suliqisuurut, aglaan isumatuitchuat iḷisimanaqtut.

¹⁷ Isumatuitchuaq kiliksiyyaqti iluiḷiuqtitchuuruq, aglaan iluaqtuakuaqtuat qaġġirrisuurut tutqiunmik.

¹⁸ Iḷitchisuŋitchuaq piiḷḷiuġniaqtuġlu kanŋunaqtuamiinniaqtuġlu. Kiñaliqaa naalaġniruaq natqiksruġmanni qiksigirauniaqtuq.

¹⁹ Quvianaqtuq pigisuktaq pigiliutiruni! Aglaan isumalluaġiitchuat tunutchuitkaat piḷuktuaq.

²⁰ Isumaturuaniitkuvich isumatusiñiaġmiutin. Avilaitqasiutiguvich isumatuitchuanun, maqutauniaqtutin.

²¹ Iluaŋitchuam maliġisuugaich piḷuusiqiruat sumupayaaġmata, aglaan nalaunŋaruakuaqtuat akiññagniaqtut nakuuruanik.

²² Iñulluatat unisaksraqaġniaqtut tutaaluumignun, aglaan suġalliaŋich pigiiḷḷiqirauruat nalaunŋaruanugniaqtut.

²³ Nunaŋatunni iḷiappauruat naurrilluataġuuruq niqiġranik; tigligaipkaġmirraqtut nautchirriamiġniñ.

²⁴ Tatavsayuitkupkich miqłiqtutin, nakuaġiŋitkitin. Nakuaġigupkich qapiŋaiḷḷutin natqiksruġniaġitin.

²⁵ Nalaunŋaruaguruat niqaiḷḷiusuitchut, aglaan piḷuusiqiruat kaaktuaqtut.