Proverbs 12 - Iñupiatun Mumiksat Uqalugiksuat

¹ Kiñaliqaa piviuttaqsriruaq natqiksruunmik piviuttaqsriruq iḷitchuqqunmik; aglaan natqiksruqulaitchuaq isumalluaġiitchuq.

² Ataniġum iviġaumagigaich iñuich nakuuruat, aglaan suksraaġuugaich pigiitchuanik sivunniuqtuat.

³ Pigiitchualiqiniq tuniqsimmataitchuq, aglaan nalaunŋaruat iñuich tuniqturut.

⁴ Nulialluataq piqpagiqpakkaa uiŋata; aglaan tuvaaqan kanŋunaqtuaq naŋirrutiqpaktun ittuq sauniŋiñun.

⁵ Nalaunŋaruaguruat iñuich aŋalalluataġniaġaatin; silġiqsuutiŋa pigiitchuam pisaasuġmiaguruq.

⁶ Uqaluŋich pigiitchuam tuqutchiḷḷarut, aglaan uqaluŋich nalaunŋaruam annaurriḷḷarut anayanniuqtuamik.

⁷ Pigiitchuaq akiiññami piiġuuruq taimuŋaaglaan, aglaan igluqatigiich nalaunŋaruat iñuusuurut taimuŋa.

⁸ Isumatuguvich nanġaqtauniaqtutin; isumatuitkuvich samuŋaqsruqtauniaqtutin.

⁹ Nakuułhaaqtuq iñugruiññauruni iñuuniaġuni piŋŋuaġniġmiñ suqpauniḷutin kaaksiugaluaŋŋaqpich.

¹⁰ Iñulluatat iñuich aŋalalluataġuugaich niġrutitik, aglaan pigiiḷḷiqirauruat iñuich aŋalamaqługuugaich niġrutitik.

¹¹ Savakpaguuruaq naurivḷuni niqiksraukkaġuuruq, aglaan nakuuŋitchuq piuŋiḷanik savaktuni.

¹² Pigiiḷḷiqirauruat iñuich ivaqłiasiññaġuurut pigiitchualiqisukłutik, aglaan nalaunŋaruaguruat tuniqturut.

¹³ Pigiiḷḷiqirauruat maqutausuurut uqalugmiŋnun, aglaan saglutuitchuat annaummisuurut.

¹⁴ Siiġñaŋiññiñ qaqłuuŋisa iñuich immiŋarut nakuuruanik aasii savaaŋich argaŋisa akiḷḷiusiaqaġuurut.

¹⁵ Isumalluaġiitchuat iñuich iluaġnasugisuurut. Isumaturuat iñuich naalaġnisuurut siḷġiqsuutinik.

¹⁶ Isumalluaġiitchuaq uumitchakkami iḷisimanaqtuq. Isumaturuat suliqutigisuitkaat uumisaaqłiqsuaq.

¹⁷ Iḷumun ittuanik uqaġavich, nalaunŋaruaq itchuuruq, aglaan sagluuġutit nalaunŋaitchuamun tikitchuurut.

¹⁸ Isumalaaġaluaġnani uqaluich anniġñiguurut kiḷḷianiqtun savikpagmik, aglaan isumalaaqłuni uqaluich mamirrutaullarut.

¹⁹ Sagluuġniq akkupauraq ittuq, aglaan iḷumun ittuaq isuitchuamunaglaan ittuq.

²⁰ Iliŋich sivunniuġutiqaqtuat pigiitchuamik tikiññiaqtut nakuuŋitchuamun, aglaan iliŋich savaktuat tutqiunmun quviasuutiqaġniaqtut.

²¹ Piḷuktuamun tikitchuitchut nalaunŋaruakuaqtuat, aglaan pigiiḷḷiqiruat siġġaġniusuŋaiññaġuurut.

²² Atanġum uumigisuugaich sagluturuat, aglaan iviġaumagisuugaich uqalugmiguaqtuat.

²³ Isumaturuat nipaisaaġuurut iḷisimaramiktigun, aglaan isumatuitchuat nalunaisitchuugaich isumalluaġiiññiqtik.

²⁴ Savakpaguuguvich aullarriġuġniatutin; iqiasuguuguvich kivgaluguġniaqtutin.

²⁵ Isumaaluutim quviasuŋaiqsinniaġaatin, aglaan uqalulluatat quviatchaiñiaġaatin.

²⁶ Nalaunŋaruaqtuaq iñuk aullarrauruq avilaitqatiimiñun, aglaan apqutaa pigiitchualiqiruam asiñuktitchuugaich.

²⁷ Iqiasuuguvich niqsaniaŋitchutin, aglaan savakpaguuguvich niġipkaisuuniaqtutin aŋuraġnik.

²⁸ Nalaunŋaruaguruaq apqutauruq iñuuniġmun; pigiiḷḷiqiniq apqutauruq tuqqunmun.