Proverbs 11 - Iñupiatun Mumiksat Uqalugiksuat

¹ Atanġum umigigaich iñuich saglutaġuuruat uqumaisilaaġutinik. Quviasuuttaġigaich iłuaqtuat uqumaisilaaġutit.

² Iñuich arguaŋaruat kanŋunaqtuamun tikiññiaqtut. Isumatulhaaqtuq piunialaŋitchuni.

³ Nakuuguvich, igliġutigaatin iluaqtuam. Iñuich ukpiġnaitchuat maqutausuurut ilimik saglutautimignun.

⁴ Umialgutit ikayuutauniaŋitchut uvluani tuqqutikpich, aglaan saglutautaiññiġum annautiniaġaa iñuggutin.

⁵ Nalaunŋasipkaqtauniġum ikayuġniaġaa patchisaitchuam iñuusiŋa, aglaan pigiitchualiqiruaq maqutauniaqtuq pigiitchualiqiniġmiġun.

⁶ Nalaunŋasiñiġum annautiniaġai ukpiġnaqtuat, aglaan ukpiġnaitchuat tigurausuurut ilimik kaviuqqutimigniñ.

⁷ Pigiiḷiqirauruaq tuqumman, niġiukkutaat tuquqatausuuruq. Nalupqisuutairrun inillaŋamman umialgutinun sunnautausuitchuq.

⁸ Nalaunŋaruat annaummisuurut iłuitchuamiñ; pigiitchuanuksiññaġuuruq.

⁹ Suksraunġiqsauyumiñaqtutin uqaluatigun god-aitchuat iñuich, aglaan isumattutaata nalaunŋaruakuaqtuat annautiyumiñaġaatin.

¹⁰ Iniqpak quviasuguurut ukpiġnaqtuat piḷḷuataġmata, suli quviasukhutik nipaalasuurut pigiitchuaq tuqumman.

¹¹ Iniqpak qutchiksiḷiġuuruq nalaunŋaruat ikayuġmarruŋ; aglaan iniqpak maqutausuuruq uqaluŋiññun pigiitchualiqiruam.

¹² Iluaŋitchuq uqautikłiqsuni kipagivlugi allat. Kaŋiqsisiqaġuvich, nipaisaaġniaqtutin.

¹³ Uqautikłiġuuruaq uqautisuġnaitchuq allanun iḷisimatquŋitchaġnik, aglaan uqautiyumiñaġiñ sunigliqaa ukpiġnaqtuaq iñuk.

¹⁴ Nunaqpauruaq suksraunġiġñiaqtuq aullarraitkumi. Natqiksruirit ikayuutausuurut payaŋaiññiġmun.

¹⁵ Unniqsuqłiiguvich akiḷiġñiaġniḷugu naluraqpich akiiḷaŋa, nunuuraġniaqtutin. Iluałhaaġniaqtuq iḷaksruutauŋitkuvich.

¹⁶ Aŋalatchiḷḷuataġuuruaq aġnaq qiksigisuugaat, aglaan nakłikkutaiḷat aŋutit umiallagniaqtut.

¹⁷ Iliŋnun ikayuutauruq aŋalatchisuukavich. Aŋalatchimaqłukkavich, iliŋnun anniaġutausiññaqtuq.

¹⁸ Pigiiḷḷiqirauruat iñuich sunnayuitchut, aglaan iluaqtuakuaġavich, nalunaitchuq akiññagniaqtutin.

¹⁹ Kiñaliqaa iluaqtuakuaġumaruaq iñuuniaqtuq, aglaan kiñaliqaa killukun iñuuruaq tuquniaqtuq.

²⁰ Atanġum naġġugipiallakkai pigiiḷḷiqirauruat iñuich, aglaan nakuaġigaich iluaqtuakuaqtuat.

²¹ Iḷisiminaqtuq piḷuktuat iñuich tatavsaqtauniaqtut, aglaan nalaunŋaruakuaqtuaq tatavsaqtauniaŋitchut.

²² Aġnaġigñiŋa aġnam iluaqtuakuaŋiḷḷaġmi qiññaqaqtuq qitiqłiaġutiliktun maniktun kaviqsuamik tuttuqłuum sigguatun.

²³ Kipiġniuġutiŋi nalaunŋarualiqiruam nakuusuurut; pigiiḷḷiqirauruat pisuutaat nalaunman, tatavsautausuuruq.

²⁴ Iñuum aitchuqtuutigiraġigaich atanġiḷaaqługu maniñi, aasii piññavsaaqłuni. Allaliasii anniqsrauturuaq, piiḷḷiulivsaaġhuni.

²⁵ Sigñataitchin, aasii sunnavsaaġniaqtutin. Ikayukkich allat, aasii ikayuusiaqaġniaqtutin.

²⁶ Iñuich pimaqłuktitchuugaat tutquqtuisuuruaq palauvaksranik akisusitchiaqługich, aglaan nanġaġuugaat tuniuqqaiyummatiqaqtuaq piqaqtuksraummata.

²⁷ Iłuaqtuakun savakkuvich iviġaumaginiaġaatin, aglaan pigiitchuamik ivaqłiġuvich, paqinniaġiñ.

²⁸ Iliŋich umialgutimignun katagaaġniaqtut akutuqpaktun ukiami, aglaan nalaunŋaruat nauniaqtut akutuqpaŋisun upinġaam.

²⁹ Iliŋich iluiḷḷiuqtitchiruat aimaaġviqatiimignik sunnagniaŋitchut. Asiḷiqiruat iñuich kivgausaġataqtut isumaturuanun.

³⁰ Nalaunŋasiñiq iñuggutauruq, aglaan pimaqłuktaġniġum piiġñiaġaa.

³¹ Iliŋich nalaunŋaruat akiññaguurut maani nunami, tavraasii iḷisimanatuq pigiitchuallu piḷuktuallu iñuich tatavsaqtauniaqtilaaŋiññik.