Proverbs 10 - Iñupiatun Mumiksat Uqalugiksuat

Solomon-gum Alġaqsruutiŋich

¹ Ukua Solomon-gum alġaqsruutiŋich: Isumaturuat miqłiqtut quviasuktitchuugaich aapatiŋ; isumatupiaŋitchuat isumaaluktitchuugaich aakatiŋ.

² Suġallagnik pitqiksiġaġuni ikayuutauniaŋitchuq iliŋnun, aglaan pitqiksiġautaiññiġum annautiniaġaatin tuqqunmiñ.

³ Atanġum kaaksiupkaġniaŋitkaich iñuich nakuuruat, aglaan pigiitchuat piññaktinniaŋitkaich pigisuktaŋiññik.

⁴ Iqiasuuguvich suiḷḷiuġniaqtutin, aglaan savvaqtuguvich suġalliñiaqtutin.

⁵ Isumaturuam katitchuugaich nauruat itqanaiġmata; kanŋunaqtuq siñiktuaqtuni kivluiñaqsipkaqługu.

⁶ Ikayuusiat niaquġusiġuugaich nalaunŋarualiqiruat; aglaan piaqłuktautim payarisuugaa qaniŋa pigiiḷḷiqirauruam.

⁷ Nakuuruat iñuich itqaumaniaġaich ikayuutiŋisigun, aglaan pigiḷḷiqirauruat atiŋi auniaqtut.

⁸ Isumaturuat iñuich akuqtuumasuurut iluaqtuanik siḷġiqsuutinik. Iñuich asiḷiqiruat suksraunġiqsauniaqtut.

⁹ Saglutuitchuat iñuich anayanaitchuamiittut suli payaŋaitchuami, aglaan sagluturuat aŋurauniaqtut.

¹⁰ Iñuk iḷumutuuŋitchuaq iluiḷḷiuqtitchiñiaqtuq, aglaan natqiksruiruaq tutqiutiqaqtitchiñiaqtuq.

¹¹ Nakuuruam uqaluŋich iñuggutitun maqiruatun ittut, aglaan pigiiḷḷiqiruam uqaluŋich iriqtuġaat qinnayuŋniŋa.

¹² Uumisuutim aŋalatchuugaa pimakłuktaun, aglaan nakuaqqutim suliqutigiŋaiġuugaich killukuaqtautit.

¹³ Puqiksuat iñuich kaŋiqsiñaqtut uqaluŋich, aglaan isumatuitchuat tatavsaqtuksraurut.

¹⁴ Isumaturuat iḷitchuġiniaġuurut pisuqtilaamiktun, aglaan isumalluaġiitchuat uqaġmata, pimakłuktaun tikiyaruq.

¹⁵ Suġalliqaġniġum suaŋapkaġuugaa umialguruaq iñuk; suiḷḷiuġniġum suksraunġiġuugaa piiḷḷiuqtuaq.

¹⁶ Akiḷiusiaksraŋa iluatun iñuuniġum iñuggun, aglaan piḷuusiqiniq tikitchuuruq piḷuusiqinivsaamun.

¹⁷ Iñuich naalaġniruat natqiksruġmatiŋ iñuusiqaġniaqtut, aglaan iliŋich killukuaġniḷutik uqallaŋitchuat anayanaqtuamiittut.

¹⁸ Kiñaliqaa iriqtuiruaq uumisuutimiñik sagluturuq. Kiñaliqaa siamitchiruaq saŋurrutinik isumalluaġiitchuq.

¹⁹ Uqqaqtuguvich, uŋasiŋitchutin piḷuusiqiniġmiñ. Isumatuguvich nipaisaaġniaqtutin.

²⁰ Nakuuruam iñuum uqaluŋich ittut salumapiaġataqtuatun qatiqtuatun maniktun; pigiiḷḷiqiruam iñuum isumaŋich suksrauŋitchut.

²¹ Nakuuruam iñuum uqaluŋisa ikayuġniaġaich iñugiaktuat iñuich, aglaan tuqutauyumiñaqtutin isumatuiḷuktaġniġnun.

²² Atanġum ikayuutaata umiallaktitchuugaatin. Aasii suli Atanġum iḷasuitkaa umialgutin isumaaluutinik.

²³ Asiḷiqqutauruq quviagiruni killukuaqtaġniq. Puqiksuat iñuich quviagigaat isumatuniq.

²⁴ Nalaunŋarualiqiruat piññaguurut pigisuktamiŋnik, aglaan pigiiḷḷiqirauruat piññaguurut iqsigiłhaaqtamiŋnik.

²⁵ Anuġiqłuk tikiñman, pigiiḷḷiqiruat tiŋitausuurut, aglaan pitqiksiġautaitchuat anayanniusuitchut.

²⁶ Iqiasuuruamun savautipkaġnak; anniqsuutauŋitchuq vinegar-tun kigutignun naaggaunnii avyuqtun irragnun.

²⁷ Qiksiksrautiqaġniq Ataniġmun sivitchuqtaaġuugaa iñuggun. Pigiiḷḷiqirauruat tuqunaġiaġuurut.

²⁸ Niġiukkutiŋisa nakuuruat iñuich tikiutisuugaich quviasuunmun, aglaan pigiiḷḷiqirauruat iñuich sumik tikiññiaqtuamik niġiugaksraitchut.

²⁹ Atanġum anayanniuqtitchuitkaich iluaqtuakuaqtuat iñuich, aglaan suksraunġiġuugaich pigiiḷḷiqirauruat.

³⁰ Nalaunŋaruat iñuich anayanaitchuamiisuŋaiññaġniaqtut, aglaan pigiiḷḷiqirauruat nunamiitchumiñaitchut.

³¹ Nalaunŋaruat iñuich isumaturuakun uqaqtut, aglaan uqaqtuaq killukuaqtautikun nutqaqtitauniaqtuq.

³² Nalaunŋaruat iñuich iḷisimarut nakuuruamik uqaluksramiŋnik, aglaan pigiiḷḷiqirauruat uqaluŋich killukuaġutausuurut.