Proverbs 1 - Iñupiatun Mumiksat Uqalugiksuat

Sivuniŋat Alġaqsruutit

¹ Alġaqsruutiŋi Solomon-gum, iġñiŋata David suli umialiŋata Israel.

² Uvva alġaqsruutit ikayuutiksratin iḷitchuġisaġlugich isumattutiksrat suli iluaqtuakun uqaluich, kaŋiqsiḷḷayumagitin uqaluich sivuniqturuat.

³ Iḷisautiniaġaatin iñuuniaġniġmik isumatunakun sivuniqaqtuq sagluuġutaiññikun, nalaunŋanikun suli atilugich aŋalatchiñikun.

⁴ Iḷitchiŋaitchuaq iñuk isumatusiñiaqtuq suli nutaqqat isumalaallasiḷugich.

⁵ Ukua alġaqsruutit iḷaniaġaat iḷisimmataat isumaturuat suli iḷisautilugu iḷisaqpaŋaruaq,

⁶ kaŋiqsiḷḷayumagaich nalunaġaluaqtuat sivuniŋich uqalugaat suli kaŋiqsiḷḷalugich isumaturuat uqausiġikpatigik.

Silġiksuutit Nutaqqanun

⁷ Qiksiksrautiqaġniq Ataniġmun aullaqisaaguruq iḷisimmanmun, aglaan naluvyaaqtuat iñuich qiksiksrautaitchut isumattutiqaġniġmun suli iḷisaġnigmun.

⁸ Miqłiqtuuŋ, naalaġnikkich qanuq uqautikpatin aapaviḷḷu aakaviḷḷu.

⁹ Iḷisaurrutaisa iluaqsivsaaġniaġaa iñuusiñ, qiññaġiksuam niaquġutim naagga quŋusiġutim qiññaġiksivsaaġmatun qiññan.

¹⁰ Miqłiqtuuŋ, piḷuusiqirit pitqusaaqpatin, qaiññak ilaiññun.

¹¹ Innaqpatin, “Qaiñ; iñugmik tuqutaksraqsiuqta! Piyuglavut suŋitkaluaqtuat iñuich aliasuŋisaaqsiññaġuta!

¹² Iñuuniaġaluaqtut surruiḷḷutiglu paqitkuptigich, aglaan tuquaniaqtut naatkuptigik!

¹³ Paqinniaqtugut qanusipayaanik umialgutinik aasii igluvut siḷivillugich tigliaptignik!

¹⁴ Qaiñ piqasiqsigut, aasii autaaġniaġivut tigliktavut.”

¹⁵ Miqłiqtuuŋ, malignagich tainnatchich iñuich. Tuvliraġnagich apqutiŋich.

¹⁶ Piḷuktuamik piyumalaaqtut. Tuqutchisiññaurut.

¹⁷ Ikayuutauŋitchuq matutaliqsuni qupałuk qiñiqtuaqtillugu,

¹⁸ aglaan iñuich tainnaittuat inmignun savautirut, naniġiamun tuquviginiaqtamignun.

¹⁹ Tigligaġniġum iñuum iñuggutaa piññaktaaġisuugaa. Tainnaġuuruq tavra iñuk iñuusiqaqtuaq piaqłuktaunmik.

Isumattun Ququaqtuq

²⁰ Atta! Isumattun ququularuq apqutiniḷu ininiḷu iñuich katirvianni,

²¹ ququularuq nipatuvluni upkuaqpagniḷu allaniḷu iñuich katinmata:

²² “Isumalluaġiitchuasii! Qanutuaglaaġlugu makautaŋaaġniaqpisi? Qanutuaglaaġlugu kipaginiaqpisiuŋ iḷisimman? Iḷitchiḷġataġumiñaitpisi?

²³ Naalaġnisitchi siḷġiqsuqavsi; uqautiniaġivsi iluaqtuanik suli iḷisimaratka qaiññiaġitka.

²⁴ Ququularavsi, aayugaaqłusi qaitquvlusi, aglaan naalaġniŋitchusi. Suliqutigiŋitkivsiñŋa.

²⁵ Suliqutigiŋiñŋagitin uqalutka suli iñiqtiquŋiñmivḷutin.

²⁶ Tavraasii iluirrutiqpaum tikitpatin, iglautiginiaġikpiñ. Kipaginiaġikpiñ iqsiñaqtuam tikitpatin—

²⁷ tikitpan siḷaqłukpaktun, anuqłiqpaguni iluitchuanik, aasii ilvich anniġñaqpagutillu nagliksaaqpagutillu.

²⁸ Tavraasii apiqsriñiaqtutin isumattunmik, aglaan kiusiñiaŋitchuŋa. Ivaġniaġaluaġiŋma sumiḷiqaa, aglaan paqinniaŋitkigma.

²⁹ Iḷisimmatiqaġuŋiñŋarutin aasii qiksiksrautaiḷḷutin Ataniġmun.

³⁰ Siḷġiqsuutitka suliqutigiŋiñŋagitin naaggaunnii naalaġniḷutin natqiksruġapkiñ.

³¹ Tavraasii, piññagniaqtutin nalliumaruamik savaaġnun, aasii ilvich savaaqpich iluiḷḷiuqtinniaġaatin.

³² Sunigliqaa uuktuŋaitchuat iñuich tuqusuurut qanukkii ayaktuġaat isumattun. Isumalluaġiitchuat maqutauniaqtut iliŋisa isumalaaġutaiññimiktigun.

³³ Aglaan kiñaliqaa uvamnik naalaġniruaq payaŋaiññiaqtuq. Annaksimaaġniaqtuq, sumik patchisaiḷḷuni sivuuġanaġniaqtuamik.”