Philippians 4 - Iñupiatun Mumiksat Uqalugiksuat

Iḷisaurrutit

¹ Aniqatiitkaa, taamna pisigilugu asiñuutipkaqsaiḷipiaġitchi tamatkunaŋŋa iḷisaurrutiniñ Atanġum iñuusiġitqukkaŋiñiñ ilivsiññun. Piqpagnapiaqtusi uvamnun suli tautugulipiaġataġivsi. Ukpiqtuaġuġniqsi pisigivlugu quviasugniaqtuŋa akiḷiusiaqaġluŋalu qiḷaŋmi.

² Apiġigiptik Euodia Syntyche-lu atisitquvlutik aniqatigiisun iḷiḷutik atausiŋŋuqatigiŋakaptitku Ataniq.

³ Aasii apiġimmigikpiñ iḷumun savaqatiiŋ, ikayuquvlugik taapkuak aġnak, qanuq siġġaqivlutik savaqatigiiŋaruk ikayuqłuŋa tusaayugaaġiksuaq siaminman, piqatigivluguptauq Clement allallu savaqatitka, atiŋich ittuat makpiġaaŋiñi God-im iñuuruatigun.

⁴ Atanġum quviasuusiġḷisi ataramik. Uqallautigivsaaġiga, quviasugitchi.

⁵ Iñupayaat piavsaurraŋaiġḷugich. Ataniq qaiyasiruq.

⁶ Uŋiarrisigiŋaiġḷugich supayaat aglaan supayaat aŋaiyyutigiguvsigik apiġilugu God pigiraksraġikkavsiññik, ataramik quyyavigilugu.

⁷ Tainna piguvsi piginiaġiksi God-im tutqiksirrutaa kaŋiqsianikkumiñaisaktakkaqsi. Ilaan tutqiutiqaqtinmasi suuramikunnii uŋiarrisiqaġniaŋitchusi, qanuq atausiŋŋuqatigiŋagiksi Christ Jesus.

⁸ Aqulliq uqallautiksraġa tuyuutimni uvva aniqatiitkaa, isumagituiññaqsigik taŋŋiqsimaaġuglugich sut nakuuruat nanġausiaqaġnaġumiñaqtuallu, ami sut iḷumun ittuat, nakuuniqsrauruat, nalaunŋaruat, piḷuutaitchuat, iviġaumanaqtuat, uqautikkusiaqaġluataġnaqtuallu.

⁹ Iñuusiġisigik sut iḷisasi akuqtukkasiḷu uvaŋa uqalumniñ iñuusimñiḷḷu. Aasii God-im tutqiutiqaqtitchiruam uvaptiŋnik nayuġniaġaasi.

Quyanaaġutit Aitchuutitigun

¹⁰ Qanutun quyatchaktigiruŋa suli qanutun nanġaqtigigiga Ataniq pisigivlugu ikayutqiksalgiññavsiŋa. Iḷisimaruŋa ataramik tuyuġumasuugaluaqtilaavsiññik ikayuutiksravsiññik piyumiñaqsiraġikavsi, aglaan piviksraisiqtuŋavlusi tuyulaiñŋarusi.

¹¹ Taamna uqallausiġiŋitkiga pisigilugu piiḷḷiuġniġa qanuq iḷitchiŋaruŋa apaigiyumiñaqsiŋavlugu pigikkaġa.

¹² Iḷisimaruŋa qanuqitilaaŋanik piiḷḷiuqtuni, iḷisimammiuŋa-suli qanuqitilaaŋanik iḷaŋaniiqsuni. Uumiŋa iḷitchiŋaruŋa, sumipayaaq qanutchimun tikiutigaluaqama niqaiḷḷisaaŋiññama naagga kaaksiugaluaqama, piiḷḷisaaŋitkaluaqama naagga piiḷḷiuliġaluaqama qanuqpallayuitchuŋa.

¹³ Suaŋŋatiqaqtuŋa manimmiyumiñaqługu qanusiḷimaaq nalautaksraq suaŋŋatigivlugu Christ suaŋŋasiutaa uvamnun.

¹⁴ Aasiivsauq nagliktauŋammiusi piqataukavsi iłuiḷḷiuġutimni.

¹⁵ Ilivsi Philippi-ġmiut iḷisimarusi, alġaqsruisugaaqama tusaayugaaġiksuanik aullaqłuŋa Macedonia-miñ, nalliataunnii aŋaiyyuliqiruat ikayuŋaitkaanŋa aitchuiḷutiŋ aglaan ilivsi kisivsi.

¹⁶ Thessalonica-miitilluŋa tuyuŋarusi uvamnun ikayuutinik malġuiqsuaqłusi.

¹⁷ Aitchuusiaqaqsiññaġuŋitkaluaġmiuŋa, aglaan akiḷiusiaqallasitqummigivsi taimanigu pisigilugu nagliktuiñiqsi uvamnik.

¹⁸ Paŋmapak piqaqtuŋa iluqaiññik pigiraksraġikkamnik, sippaksraqaqtuŋaunnii, aitchuusiaqaqłuŋa iḷaŋaniñ aitchuutivsiññik tuyuutigikkavsiññik Epaphroditus qaimman. Tamatkua tivraġiksuatun ikipkautitun aitchuutauruatun God-mun ittut, akuqtuġnaġumiñaqłutiŋ iviġaumanaqłutiglu ilaanun.

¹⁹ Aasiiḷi God-igikkaġma piqaqtinniaġaasi iluqapayauraŋiññik pigiraksraġikkavsiññik inuaŋaitchuanik quviasaaġusianik qiḷaŋmiñ, pisigilugu atausiŋŋuqatauŋaniqsi Christ Jesus-mun.

²⁰ God-ikput Aapalu nanġaqtauli isuitchuamun. Amen.

Paġlasuiqsaaġutit

²¹ Paġlagivut iluqaisa Christ Jesus ilaaguaqtaŋi God-mun. Aniqatiit nayuutiruat uvamnun paġlagaasi.

²² Iluqaġmiŋ ukpiqtuat paġlagaasi, paġlałhamaaġaasi umialgum Caesar-m igluqatiŋisa.

²³ Ataniq Jesus Christ naglikkutiqpaqaġli ilivsiññun.