Philippians 3 - Iñupiatun Mumiksat Uqalugiksuat

Ukpiqtuaġuġniq Nalaunŋaruakun

¹ Tavraasii aniqatiitkaa, quviasuutigisiuŋ Ataniq, Tuyutqigaġniq ilivsiññun pitqigaqługich sivuani tuyuutigiŋaratka ilivsiññun piḷaiġñaitchut uvamnun, anayanaiyautaugiññaqtut ilivsiññun.

² Quviqtaiḷisitchi iñuŋniñ pigiiḷḷiqiruaniñ, taigitka qimmiñik, iñuich uqaqtuat nalunaigutchigaksraunivḷusi timivsiññi annaurrauniaġuvsi.

³ Uvagut iḷumun God-im miqłiqtuġigaatigut pisigisuŋaġnagu timivut nalunaiñŋutchiŋaniḷugich, aglaan savautivlugu God ilaan Ilitqusiġiksuaŋan ikayuqłuta, suli nanġaqługu Jesus Christ iñuggutiqaqtitchiruaq isuitchuamik. Ukpiŋitchugut qaałhiñakun piraġausiñun annautiniaġniḷuta.

⁴ Tavra kiñaliqaa annaurrauyumiñaġniqpan pisigilugu Jew-gunini, qaałhiñakullu piraġautchich kamagilugich, nalupqisuŋił̣haaġayaqtuŋa annaurrauniaqtilaamnik allaniñ iñuŋniñ.

⁵ Nalunaiñŋutchiqsauŋaruŋa anikama tallimat piŋasuni uvlianikama. Israelite-guruŋa aniñipkun, maŋŋuġivlugu Benjamin, auga allamik avuiḷaaq Hebrew-piaġataq. Kamagiŋagitka Jew-guruat pitquraŋich qaunakłaapiaqłuŋa Pharisee-guvluŋa.

⁶ Suli kipiġniuqpaił̣ł̣uŋa iñupayaanun kamagitquvlugich pitqurat nagliksaaqtinŋagitka aŋaiyyuliqiruat. Iñuk qanutun nalaunŋasiyumiñaqtigiŋakpan kamagilugich pitqurat piraksriutiŋich, pasiñaġumiñaiñŋaruŋa.

⁷ Aglaan tamatkua isummatigisuuŋaratka anniqsuutaunasugalugich annaurrauniksrapkun paŋmapak isummatigiliġitka piñaiḷutauvlugich annaurrauniksramun, qanuq Christ kisimisualuk annautigaaŋa.

⁸ Isummatigiłhiñaŋiñmigitka tainna tamatkua kisiisa, aglaallu supayaat suksraallapiaġitka anniqsuutauŋaiqł̣ugich urriqatausaqpata anniqsuutaułhamaaqtuamun iḷitchuġivlugu Jesus Christ uvaŋa Ataniġa. Ilaa pisigivlugu isummatigiliġitka tamatkua iluqaisa iktaksratun, igiłługich anniqsuutauyumiñaiñmata, pigisukługu Christ,

⁹ suli atausiŋŋuqatigisupiallakługu. Tavraŋŋaaglaan isumaqaŋaiqsuŋa uvamnik nalaunŋasiyumiñaġluŋa sivuġaani God-im kamagiugaqsiññaġlugich pitquraŋi. Paŋmapak akuqtuġumiñaqsigaaŋa God-im qanuq ukpiġigiga Jesus Christ. God-im nalaunŋasipkaġaaŋa sivuqqamiñi ukpiġikapku Jesus Christ.

¹⁰ Pigisutualukkiga iḷitchuqsriñiq Christ-mik aunniummaġiksiḷugu, suli iḷisimallasiḷugu iḷumni suaŋŋan aŋipkaiŋaruaq tuqqunmiñ ilaanik, suli iḷaŋiutiluŋa nagliksaaqtirrusiaŋiñiñ, nagliksaaqtitauluŋa ilaa pisigilugu, tuquyumaluŋa ilaatun,

¹¹ qakugukpan aŋipkaqtitauyumiñaġumauŋa tuqqunmiñ iñuggunmun.

Aqpauġniq Akimasaqłuni

¹² Uqallautiga sivuniqaŋitkiga naamasipiaġataŋaniḷuŋa ataramik iñuullasiḷuŋa Christ-tupiaġataq, aglaan siġġaqiruŋasuli Christ Jesus-tun iḷisaiññaġukłuŋa qanuq taamna pisigivlugu ilaan annautiŋagaaŋa.

¹³ Aniqatiit, iḷisimaruŋa tainnaiḷiŋaisilaamnik-suli. Atausiq sivuniġiliutiŋagiga iñuusimñi, itqaumaŋaiġukługich iluqaisa sivuani piŋaratka, aasii paŋmapaŋmiñaglaan pisuqtilaaġluŋa iñuulluatapiaġniaġluŋa Christ-tun.

¹⁴ Aqpaliurraqtitun siġġaqiruŋa sivunmun tikitqaurraqługu killi, akiññaktaaġisukługu iñuuniksraq paŋmani. Taamna pisigivlugu God-im ququaŋagaaŋa Christ Jesus-kun.

¹⁵ Tainnauvva iluqata isumaqaqtuksraugaluaqtugut, iluqata agliraksraiŋaruaguut ukpiqtuaguniptiŋni. Aglaattauq iḷasi isumaqaqpata allauruamik, God-im sivuniqsipkaġniaġmigaasi uqalutka nalaunŋatilaaŋannik.

¹⁶ Qanupayaaq taamna isummatigigaluaġuvsiuŋ, pisuqtilaavsisun iñuulluataġniḷugitchi paŋmapak kaŋiqsisilaavsisun qanuq God-mun nalaunŋaruakun iñuutqutilaavsiññik.

¹⁷ Aniqatiit, iluqasi tuvraqsiŋa nalaunŋaruakun iñuuniaġusimñi. Iñuusiġa naipiqtuutauli iñuŋnun iḷisimanaġumiñaqsiḷugich kisuutilaaŋat iḷumutun ukpiqtuaguruat,

¹⁸ qanuq iñugiaktuat iñuich iñuusiqaqtut akiḷḷiḷiqsuġmatun pivḷugu Christ tuqqutaa aŋarraurami. Uqautiŋagivsi tainnaittuanik iñuŋnik sivuani, aasii paŋmapak uqallautivsaaġivsi qulvisigivlugich.

¹⁹ Kaŋŋiññiaqtut nagliksaaġviŋmun god-tiqaqtut timimiŋ pisuguukkaŋiññik, kamasaaġutigigaich kanŋugiraksraġaluatiŋ, isumagiqpaksiññaqługich nunamiŋŋaqtauruat sut.

²⁰ Aglaan uvagut aimaaġviksrautigigikput qiḷak. Tatpaŋmaŋŋa niġiugipiaġikput utiġumaaqtuaq Ataniq Jesus Christ annaurrikput.

²¹ Ilaan allaŋŋuġniaġai tuqusuuruat timivut iḷipkaqsaġlugich ilaan aŋipkaqtauŋaruatun timimisun, suaŋŋatikun atanniqsimapkaiḷḷasiruakun ilaanik supayaanun.