Philippians 2 - Iñupiatun Mumiksat Uqalugiksuat

Christ Kamanaiqsauruq Kamanaqsipkaqtauruġlu

¹ Tavra uvagut atausiŋŋuqatigiŋavlugu Christ qapiŋaisaaġutiyumiñaqtugut avanmun, suli Christ piviuttaqqutaata ikayuutipkaqtaġumiñaġmatigut avanmun, suli piqasiutiŋavluta Ilitqusiġiksuamun nagliktuutiraġaġumiñaqsiŋavlutalu avanmun iḷunŋusuutikullu,

² quviatchaksapiaġataqsiŋa isummasiñiglusi uvaptun, piviuttaqqutilusi avanmun atunim, atisiŋalusi ilitqutchivsiññi isumavsiññiḷu.

³ Siŋñatiqaġnasi piġuqtiġnasiḷu aglaan kamasaaġutaiḷḷusi avanmun, isumaqaŋaiġḷusi nakuułhaaġasugalusi allaniñ iñuŋniñ.

⁴ Ilivsiññun kisian kipiġniuġutigiŋaiġḷusi, aglaallu allat iñuich kipiġniuġutilugich.

⁵ Isumaqaqtuiññaqtuksraurusi Christ Jesus isumaqausiatun.

⁶ Jesus Christ Iġñiq taimaŋŋaqaŋa God-tauruaq Aapamisun, ilaan taamna tainna irrusiñi piġuqtiġutigiŋaitkaa atiqasiutiniaġluni God-mun.

⁷ Aglaan inmiñik pisuksiññaqłuni ilaan atuŋisaallaŋagaa God-mun nalliummatinini, aasii kamanaiqł̣uni kivgaġuŋaruq. Ilaa aniŋaruq aakamiñ iñuktun, qiññaqanikłuni iñugruiññatun.

⁸ Aasii iñuguqami kamasaaŋił̣ł̣uni kamagiŋagaa God supayaakun, tuquvluni unnii kikiaktuurrauvluni aŋarrauramun pitquranik navguiritun.

⁹ Taamna pisigivlugu God-im atqunaqługu kamanaqsipkaŋagaa suli atchiqł̣ugu atiġmik kamanałhaaqtuamik atipayaaniñ,

¹⁰ iluqaġmiŋ qiḷaŋmiittuat nunamiittuallu nunam ataaniittuallu sitququvlugich qiksiksrautikun Jesus-mun.

¹¹ Suli iluqaġmiŋ iñuich iḷisimanaqsiḷugu uqallausiġiniaġaat Jesus Christ Atanġuniḷugu. Tainna pikparruŋ God-tauq Aapa nanġaqtauniaġmiuq.

Ukpiqtuat Ittut Qaummaqtun Nunam Iñuŋiñun

¹² Tavraasii piviuttaġikkavsii, kamagisuuŋakavsiŋa nayuqavsi, naumałhaaqtuq kamagiugaġuvsiŋa nayuqtigiŋitkaluaqtillusi uvamnun. Iñuusitchi uvluutiraġimmasi qanuq annaurrauŋaruat iñuutqusiaŋatiktun, kamagiugaġlugu God qiksigilugu atqunaq, sivuuġagilugu kamaksriŋiññiksraqsi ilaanik.

¹³ Qanuq God savaktuq iḷuvsiññi piyummasiqsuqłusi sunik ilaan pitqukkaġmiñik suli taŋŋiqsillavlugich.

¹⁴ Supayaat pisigik uqaalaŋaiġḷusi naagga qapiqtaiḷḷisigiŋaiġḷugich,

¹⁵ pasiñaġumiñaitchumausi iḷumutuuqtuagulusiḷu God-im miqłiqtuŋi, qanuqinniġausiaksraiḷḷusi iñuullavsi akunġanni pigiitchuat uniuŋaruallu iñuich. Akunġanni tainnatchich iñuich taaqtuatun ittuat, ilivsi qaummaġiksuksraurusi qaummatitun,

¹⁶ quliaqtuaġutilugich iliŋich God-im uqaluŋiñik iñuupkaiḷḷaruanik. Tainna piguvsi, quviasuutigiyumiñaġniaġivsi Christ qaġġivia uvluq tikitpan, iḷitchuġiluŋa savaaġa ilivsiññi anniqsuutauŋatilaaŋanik.

¹⁷ Tuqutauyumaaġaluaġumaunnii, quyaruŋa quviasuqatigigivsiḷu iluqasi. Qanuq aŋaiyyuliqsiqpaum kuvviqivlugu naimasuġnaqsiḷaaġmatun ikipkaun ikipkaiviŋmi, tainnatulli auga maqigumi iḷḷatauniaġmiuq ukpiġutivsiññun akuqtuġnaġumiñaqsiḷaaġutauluni aitchuun God-mun.

¹⁸ Tainnatulli ilivsi quyaruksraummiusi, suli quviasuutivsiññi piqatigiluŋa.

Timothy-lu Epaphroditus-lu

¹⁹ Atanġum Jesus pisuutigikpagu, piyummatigigiga tilisukługu Timothy ilivsiññun qilamipayaaq, quviasaaqtausukłuŋa tusaalluataġuma ilivsigun.

²⁰ Piitchuŋa allamik iñuŋmik Timothy-tun ittuamik, kipiġniupiaġataġluni uŋiarrisaqaġniaqtuamik anniqsuġumavlusi.

²¹ Iñuich maani allat iluqaġmiŋ qaunagigaich ilaisa kipiqqutitiŋ, qaunagiŋaiqł̣ugich kipiġniuġutit Jesus Christ-kun.

²² Aglaan Timothy-m nalliummatiniŋa iḷisimagiksi savaqasiqsuġmaŋa alġaqsriuñiġmi tusaayugaaġiksuamik. Savaqasiqsuŋagaaŋa iġñiqtun savaqatauruatun aapamiñun.

²³ Tavraasii tiliyumaaġiga ilivsiññun iḷitchuġipqauraġuma qanuqtauniaqtilaamnik,

²⁴ aasii ukpiġigiga Ataniq uvaŋaptauq qaiñiaqtilaamnik qilamipayaaq.

²⁵ Isummatigiŋagiga tiliraksraġipiaqługu ilivsiññun Epaphroditus aniqatikput savaqatiga aŋuyaqatigalu, ilivsivsauq kivgaqsi savaktitaqsi ikayuqtigipkaqługu uvamnun,

²⁶ ilaan kipiqqutigimmigaasi tautugukłusi iluqasi, suli isumaaluŋammiuq tusaaŋaniqavsi naŋitilaamiñik.

²⁷ Naŋipiaġataŋaruq tuquqqayaqtaallaġmi. Aglaan God-im nagligiŋagaa, kisianami nagligiŋitkaa aglaan uvaŋalu, iḷaanni isumaaġutiqavsaaġasugaluŋa.

²⁸ Kipiġniuttaġiłhaaġiga tilisukługu quviatchaquvlusi taututqikkuvsiuŋ, aasiiḷi uvaŋa isumaaluutaiġḷuŋa.

²⁹ Paġlayumagiksi quviasuutiqpakun paġlammatuttauq allat ukpiqtuaguqatisi. Suli isummatigilluataġaġusigik iñuich ilaatun ittuat,

³⁰ qanuq ilaan tuqqutigiqqayaŋagaa savaani Ataniġmun, anayasaaqługu iñuggunni naatinniaqługu savaaqsi uvamnun.