Philippians 1 - Iñupiatun Mumiksat Uqalugiksuat

¹ Ukua tuyuutit qairut ilivsiññun Paul-miñ Timothy-miḷḷu, kivgauruaŋniñ Jesus Christ-mun. Tuyuutaurut iluqaiññun Philippi-miittuanun ilaaguaqtauruanun God-mun ukpiqłutiŋ Christ Jesus-mun, taputivlugich umialiŋnallu tiikallu.

² God-tiptuq Aapapta Atanġuvlu Jesus Christ tutqiutiqaqtillisi nagliktuusiaqpaqaqtillusiḷu.

Paul Aŋaiyyutigai Taiguaqtuksrat Tuyuunmiñik

³ Quyyavigisuugiga God-tiga itqalimaaqavsi,

⁴ ataramik aŋaiyyutipayaamni aŋaiyyutisuugivsi quviasuutiqaqłuŋa,

⁵ quyyatigivlugu ikayuqavsiŋa savaamni alġaqsruivḷuŋa tusaayugaaġiksuamik uvlumiñqaŋa ukpiliqqaaġataġnivsiññiñ paŋmapaŋmun aglaan.

⁶ Aasii nalupqisuŋitchuŋa God-im isagutipkaiŋaruam savaaġiksuamik iḷuvsiññi iglaupkaġniaġaa taamna naatiḷġataġlugu qaiñiŋanun aglaan Jesus Christ.

⁷ Piviuttaġiqpakkivsi. Nalaunŋaruamik quviasuutiqaġumiñaqtuŋa nalupqigiŋiḷḷusiḷu qanuq piqatigiŋagivsiŋa savaaksrirrutaani God-im paŋmapaglu tigutaaqtaukama tigutaaqtauŋaiñŋaġmalu kukiḷullaŋŋaġma ukpiliqsinniaqługich iñuich tusaayugaaġiksuaq Jesus Christ-kun kisimi annautauyumiñaġnivḷugu, aasii ukpiġiraksraġinivḷugu.

⁸ God iḷisimaruq iḷumun uqaqtilaamnik uqallakama kipiġniuttaġipiaġnivḷugu nayuqsiutisukłusi, Christ Jesus tainna irrusiqaqtitkaaŋa iḷumni.

⁹ Uvva aŋaiyyutigivsi inna. Aŋaiyyutigivsi piviuttaqqutiliqsaiññaquvlusi, iḷumun ittuaġlu iḷitchuġisaiññaquvlugu, suli nalaunŋaniqsrauruamik sivunniutiksravsiññik,

¹⁰ sivuniksraqtaaġiyumiñaqsiḷugu iłuaġniqsrauruaq. Tainna piguvsi, piḷuutiqaġniaŋitchusi pasirauniaŋitchusiḷu Christ qaikpan.

¹¹ Aasiisuli tainna piguvsi, ataramik iłuatun iñuuniaqtusi supayaakun ikayuqtiqaġlusi Jesus Christ-mik, iñuŋnun nanġaġumiñaqsiḷugu God kamanaqsiḷiġlugulu.

Iñuuniq Sivuniqaqtuq Christ-mik

¹² Aniqatiitkaa, iḷisimatqugivsi tigutaaqtaunimni piruat uvamnun siamitivsaaqsiññaŋagaat tusaayugaaġiksuaq.

¹³ Uvuŋaqamaqaŋa iluqaġmiŋ munaqsrich umialgum igluqpaŋani iluqaġmiglu allat uvaniittuat iḷitchuġiŋarut tigutaaqtautilaamnik pisigivlugu Christ-mun kivgauniġa.

¹⁴ Suli tigutaaqtauniġma qapiŋaiqsaaŋagai aniqatit nalupqisuŋaimmaġiksaaqługich ukpiġunmiŋni Ataniġmun, aasii iqsisaiqsiññaqłutiŋ alġaqsruutigivlugu God-im uqalua sivuuġaŋaiqł̣utiŋ.

¹⁵ Iñuich iḷaŋisa alġaqsruutigiŋagaat Christ killuqsraqłutiŋ qanaaġuksiññaqłutiŋ, aglaattauq allat alġaqsruutigiŋagaat pisuutigikł̣utiŋ.

¹⁶ Tamatkuali aqulliich alġaqsruirut piviuttaġivluŋa iḷisimavlutiŋ God-mun savaaksriñŋatilaamnik, taluqsraŋaiġḷuŋa uqautigitquvlugu tusaayugaaġiksuaq nalaunŋaruakun.

¹⁷ Allalli iñuich alġaqsruutigiŋitkaat Christ pipiaġataġlutiŋ, aglaan uvaŋa killuġivluŋa. Tainna alġaqsruirut isumavlutiŋ iłuiḷḷiuqtivsaaġukkaluaqłuŋa tigutaaqtaunnamni.

¹⁸ Suŋitchuq. Quviasuutigigiga Christ alġaqsruutigiyumiñaġmarruŋ qanusipayaakun piñaġumiñaqtuakun, sunŋutikkaluakun naagga iḷumi nalaunŋaruakun irrusikun. Quviasuutigivsaaġniaġmigiga,

¹⁹ iḷisimavluŋa pisigilugich aŋaiyyurriñisi uvamnik, ikayuusiaġalu Ilitqusiġiksuaŋaniñ Jesus Christ, tigutaaqtauŋaiqsitauniaqtuŋa.

²⁰ Kipiġniupiaġataqtuŋa piyummatigipiaġigalu suuramikunnii inuqtitchisuŋił̣ł̣uŋa piraksriusiamnik Christ-miñ, aglaan ataramik paŋmapak-unnii qapiŋairrutiqapiaġuktuŋa supayaatigun pikkapkun Christ nanġausiaqaquvlugu, iñuugaluaġuma naagga tuqugaluaġuma.

²¹ Qanuq iñuunimni iñuusiġisutualukkiga savautilugu Christ. Aasii tuqugaluaġuma uvamnun anniqsuutaułhaaġniaqtuq.

²² Aglaan iñuuguma anniqsuutauvsaaġumiñaġmiuŋa savaapkun. Nalliaŋnik tigusisausiitchuŋa.

²³ Qanuqsausiitchuŋa, iñuuluŋa naagga ullaglugu Ataniq. Qimagupiaġaluaġiga maani iñuuniq aasii nayuqsiutilugu Christ, qanuq taamna nakuułhaasaktaqtuq.

²⁴ Aglaan ilivsi pisigilusi iñuuruksraułhamaaqtuŋa.

²⁵ Iñuuniaqtilaaġasuli nalupqigiŋitkiga, Iḷisimaruŋa tuqutauniaŋisilaamnik uvani tigutaaġviŋmi. Iñuuniaqtuŋasuli ikayuġuglusi suaŋasiḷaaġuglugu quvianaqsiḷaaġuglugulu ukpiġurri.

²⁶ Aasii pisigilugu tigutaaqtauŋaiġñiġa utaqqiguvsi atqunaġlugu nanġaġniaġiksi Christ Jesus.

²⁷ Uvva una naumałhaaqtuq. Iñuuruksraupiaqtusi Christ iñuutqutaatun iñuŋmiñun, uvaŋa tautukkaluaġuvsi naagga tautuŋitkaluaġuvsi, tusaayumiñaġumauŋa atipiaġataqłusi iñuutilaavsiññik atausiq sivuniġivlugu una, taluqsraŋaiqł̣usi quliaqtuaġitilaaŋanik tusaayugaaġiksuaq iñuich ukpiqtirrutiksraŋat God-mun.

²⁸ Iqsitchaktinnasi akiḷḷiḷiqsuqtivsiññun. Qulluaŋairrutivsi qanuqpisiiḷḷiñiaġai suksraunġiqsauniaqtilaaŋannik, suli ilivsi annaurrauyumaaqtilaavsiññik, qanuq God-im akimmasiġaasi.

²⁹ Qanuq Christ ukpiġumiñaqsigiññaŋaitkaasi inmiñun aglaallu nagliksautigipkaġumiñaqsivḷuni ilivsiññun.

³⁰ Tavra iḷaalliutiyumiñaqsiŋarusi uvamnun qapiyaiḷḷusi quliaqtuaġiguvsiuŋ tusaayugaaġiksuaq. Aŋuyaŋniqtun taamna ittuq qiñiġaġikavsiŋa qaŋapak qulluaŋaitchuaŋaa suli tusaavlusiḷu paŋmapak-unnii qapiyaisilaamnik.