Philemon 1 - Iñupiatun Mumiksat Uqalugiksuat

¹ Ukua tuyuutit qairut Paul-miñ tigutaaqtauruamiñ pisigivlugu Christ Jesus, Timothy-miḷḷu aniqatiptiŋniñ, avilaitqatiptiŋnun savaqatiptiŋnullu Philemon-mun,

² aŋaiyyuliqiruanullu katitchuuruanun igluŋni, aniqatiptiŋnullu aġnamun Apphia-mun, aŋuyaktauqatiptiŋnullu Archippus-mun.

³ God-im aapapta Atanġuvlu Jesus Christ nagligiqpaglisi tutqiutiqaqtillusiḷu.

Philemon Piviuttaqqutaa Ukpiġutaalu

⁴ Quyyavigisuugiga God-iga ataramik itqaqapkiñ aŋaiyyukama,

⁵ qanuq tusaasuuvluŋa piviuttaqqutiŋnik iluqaiññun God-im iñuŋiñun, ukpiġutiŋniglu pigikkaġnik Ataniġmun Jesus-mun.

⁶ Aŋaiyyutigigiga piqatigiigñiqput ukpiqtuaguvluta pipkaiyumiñaquvlugu kaŋiqsisiḷḷuatamik quviasaaġusiatigun iluqaisigun pigikkaptigun atausiŋŋuqatigiŋavlugu Christ.

⁷ Aniqatiiŋ, piviuttaqqurvich quviatchapiaġataġaaŋa qapiŋaisaapiaġataqłuŋalu, qanuq quviatchaŋagitin iluqaisa God-im iñuŋi.

Apiqsrisigaa Onesimus

⁸ Taamna pisigivlugu attaġiyumiñaitkaluaġikpiñ piraksriqsaġupkiñ sumik piraksraġnik, aniqatigivlutin Christ-mi.

⁹ Aglaan piviuttaqqutim apiqsripkaġaaŋa piyumiñaġmagaaqpich. Tainna piuŋa, uvaŋa Paul kivgaŋa Christ Jesus, aasii paŋmapak tigutaaqtauvluŋa ilaa pisigivlugu.

¹⁰ Tavra apiqsrisigiga Onesimus iliŋnun, iġñiġimmatun iḷiŋakkaġa ukpiliqsinŋavlugu Christ-mun. Tigutaaġviŋmiinŋaġma aapagimmatun iḷiŋagaaŋa ukpiqtinŋavlugu Christ-mun.

¹¹ Qaŋauvlugu anniqsuutauŋaitkaluaqtuq iliŋnun, aglaan paŋmapak anniqsuutiġuqtuq iliŋnullu uvamnullu.

¹² Utiqtitchaaqsigiga iliŋnun, piviuttaġivaił̣ł̣ugu iḷaviñiġaunnii tuyuġimmatun iliŋnun.

¹³ Pigisukkaluaġmigiga uvaŋa tigutaaqtaullaġma, pisigivlugu tusaayugaaġiksuaq, ikayuquvluŋa ilaanun iniksrakkaluaġni.

¹⁴ Aglaan nunuriḷutin ikayuquyumaŋiñmiuŋa, ikayuquyumałhaaġikpiñ iliŋnik pisuksiññaġlutin. Sumik pisuŋitchuŋa aŋiŋisuaġumŋa.

¹⁵ Onesimus iḷaanni una pisigivlugu aullaullaŋasugnaġniqsuq iliŋniñ, iliŋnun tasuquvlugu iñiġlugu.

¹⁶ Tavraŋŋaaglaan kivgałhiñauŋaiqsuq, aglaan aniqatiliutiruq ukpiqtuaġuqami Christ-mun. Qanutułhaaq anniqsuutiġuqtuq uvamnun, suli qanutupayauraq anniqsuutiġuġmiuq iliŋnun kivgauniġmi aniqatiġuqamiḷu ukpiliqł̣uni Ataniġmun.

¹⁷ Avilaitqatigipiaġluŋa isummatigigumŋa, paġlayumagiñ utiqpan paġlasiksraqtun uvamnik.

¹⁸ Ilaan pimaqłuŋakpatin sumik naagga akiiḷaqtuŋakpatin, akiiḷḷiutiyumagiñ uvamnun.

¹⁹ Uvva aglaaqsiruŋa uvaŋapiaġataq inna, akiḷiiviginiaġikpiñ. Itqautiŋitkupkiñ unnii suŋitkaluaqtuq akiiḷaqtuġmatun itilaaġnik uvamnun annaurraunġiñ pisigivlugu uvapkun.

²⁰ Aasii aniqatiiŋ, iviġaksallaŋniaŋŋa pisigilugu Ataniq, quviatchaksaġluŋa aniqatigikamŋa atausiŋŋuqatigiŋavlugu Christ.

²¹ Tuyuqapkiñ nalupqisuŋitchuŋa piñiaqtilaaġnik apiqsriaptun, ami iḷisimaruŋa piñiaqtilaaġnik qaaŋiġḷuguunnii apiqsriaġa.

²² Aasiivsauq itqanaiyaġumautin iniksramnik, qanuq niġiuktuŋa God-mun kiuniaqtualivḷugich aŋaiyyutisi iluqavsi, aasii utiqtitauluŋa ilivsiññun.

Paġlasuiqsaaġutit

²³ Epaphras, tigutaaqtauqatiŋma pisigivlugu Christ Jesus, tuyuġaatin paġlanmiñik.

²⁴ Mark-guvlu Aristarchus-lu Demas-lu Luke-guvlu savaqatiima paġlammigaatin.

²⁵ Atanġum Jesus Christ nagligiqpaglisin.